កីឡា

សុផល ឌីម៉ង់ បង្ហាញខ្លួនលើកដំបូងយ៉ាងល្អក្នុងក្រុមជម្រើសជាតិកម្ពុជា

បានផុស

៨ ខែ មុន

នៅ

ថ្ងៃសុក្រ ១៤ វិច្ឆិកា ២០២៥

ដោយ

ខ្សែបម្រើការពារ សុផល ឌីម៉ង់ ត្រូវបានគេបង្វឹកប្តូរចូលឲ្យលេងក្នុងវគ្គទី២ នៅពេល ក្រុមបាល់ទាត់ជម្រើសជាតិ ប្រកួតជាមួយ ហុងកុង កាលពីយប់ថ្ងៃទី១៣ ខែវិច្ឆិកា ឆ្នាំ ២០២៥ នៅទីក្រុងហុងកុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតនៅវគ្គទី១ ក្រុមហុងកុង បានដាក់សម្ពាធខ្លាំងតាមរយៈការវាយលុក និងគៀបសង្កត់លើកម្ពុជា ហើយក៏មានឱកាសស៊ុតជាច្រើនលើក។ ពួកគេដាក់សម្ពាធខ្លាំងធ្វើឲ្យកីឡាករកម្ពុជាគ្រប់គ្រងបាល់មិនបានយូរទេតាមរយៈការលេងគ្រប់គ្រងពីក្រោម ប៉ុន្តែជួបការលំបាកខ្លាំង។

ក្រុម ហុងកុង បានទម្លាយសំណាញ់ទីរបស់កម្ពុជានៅនាទី៣១ ដោយកីឡាករ Wong Wai ដើម្បីមុខ ១-០ ប៉ុន្តែការនាំមុខរបស់ហុងកុង បានត្រឹមតែ ២ នាទីប៉ុណ្ណោះ ត្រូវបានកម្ពុជា រកបានគ្រាប់បាល់តាមស្មើ ១-១ តាមរយៈការតែតចូលដោយខ្សែការពារ សារ៉េត គ្រីយ៉ា នៅនាទី៣៣ បន្ទាប់ពី ញាណ សុស៊ីដាន លើកបាល់ជ្រុង។

នៅវគ្គទី២ លោក Koji Gyotoku បានដូរកីឡាករមួយចំនួនចូលដែលបានធ្វើឲ្យទម្រង់លេងប្រែប្រួល និងបង្កើតឱកាសវាយបកបានច្រើន ស្របពេល ហុងកុង ក៏បន្ថយការវាយសម្រុក បន្ទាប់ពីមិនអាចទម្លាយរបាំងការពាររបស់កម្ពុជាស្រួល។

ក្នុងចំណោមកីឡាករប្តូរចូលក៏មាន សុផល ឌីម៉ង់ ដែលជាខ្សែការពារនៅក្លិបព្រះខ័នរាជស្វាយរៀង ត្រូវបានប្តូរចូលជំនួយកីឡាករ សុះ ស៊ូហាណា នៅតំបន់បម្រើការពារកណ្តាល។ កីឡាករដែលមានដើមកំណើតនៅខេត្តសៀមរាបបានបង្ហាញខ្លួនយ៉ាងសកម្មនៅតំបន់កណ្តាលដោយបានចែកបាល់ កាត់ផ្តាច់ និងអូសបាល់បញ្ជូនទៅតំបន់ជួរមុខបានយ៉ាងល្អ។

នេះជាការបង្ហាញខ្លួននៅក្រុមជម្រើសជាតិកម្ពុជា ក្រុមធំលើកដំបូងរបស់ សុផល ឌីម៉ង់ ហើយរូបគេពិតជាធ្វើបានល្អរហូតទទួលបានការកោតសរសើរពីអ្នកគាំទ្រ។ អ្នកគាំទ្របានចាត់ទុករូបគេស្ថិតនៅផ្លូវដ៏ល្អទាំងនៅក្លិប និងជម្រើសជាតិ។

កន្លងមក សុផល ឌីម៉ង់ ធ្លាប់បានជាប់ជម្រើសជាតិកម្រិតយុវជន ប៉ុន្តែមិនធ្លាប់ជាប់ក្រុមធំទេ។ ការចាកចេញពីក្រុម អង្គរថាយហ្គឺរ រូបគេបានដាក់គោលដៅសម្រាប់ការជាប់ជម្រើស ១១ នាក់ដំបូងនៅក្លិបព្រះខ័នរាជស្វាយរៀង និងជាប់ជម្រើសជាតិកម្ពុជា ហើយពេលនេះបានសម្រេចគោលដៅទាំងពីរ៕