សារព័ត៌មាន Newsweek៖ សម្ព័ន្ធមិត្តសន្ធិសញ្ញារបស់អាមេរិក កំពុងសាកល្បងអំណាចរបស់ ត្រាំ 

ស្របពេលនាយករដ្ឋមន្ត្រីថៃ អនុទីន ឆាន់វីរៈគុល គំរាមឈប់រកស៊ីជាមួយសហរដ្ឋអាមេរិក ប្រសិនបើ លោក ​ដូណាល់ ត្រាំ ដំឡើងពន្ធដើម្បីដាក់សម្ពាធក្រោយទីក្រុងបាងកក ប្រកាសផ្អាកកិច្ចព្រមព្រៀងសន្តិភាពជាមួយកម្ពុជា ដែលមានប្រមុខសេតវិមាននិងប្រធានអាស៊ានឆ្នាំ២០២៥ ធ្វើជាសាក្សីនោះ ស្រាប់តែសារព័ត៌មានដ៏ល្បីឈ្មោះអាមេរិក Newsweek បានចេញផ្សាយអត្ថបទមួយ ដោយដាក់ចំណងជើងធំៗថា សម្ព័ន្ធមិត្តសន្ធិសញ្ញារបស់សហរដ្ឋអាមេរិក កំពុងសាកល្បងអំណាចរបស់លោក ត្រាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងខ្លឹមសារអត្ថបទដែលផ្សាយកាលពីថ្ងៃពុធទី១២ខែវិច្ឆិកាឆ្នាំ២០២៥, អ្នកសារព័ត៌មាន Newsweek លោក Micah McCartney បានសរសេរថា៖ នាយករដ្ឋមន្ត្រីថៃ អនុទីន ឆាន់វីរៈគុល បានប្រកាសកាលពីថ្ងៃពុធថា ប្រទេសថៃនឹងកំណត់មាគ៌ាដោយខ្លួនឯង បន្ទាប់ពីដកខ្លួនចេញពីកិច្ចព្រមព្រៀងសន្តិភាពជាមួយកម្ពុជា ដែលមានការគាំទ្រពីសំណាក់ប្រធានាធិបតីសហរដ្ឋអាមេរិក លោក ដូណាល់ ត្រាំ។

ភាពតានតឹងដែលកំពុងកើនឡើងយ៉ាងគំហុកនេះ បានគំរាមកំហែងអូសទាញប្រទេសជិតខាងអាស៊ីអាគ្នេយ៍ទាំងពីរ ឲ្យវិលទៅរកជម្លោះវិញ ត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីកិច្ចព្រមព្រៀងសន្តិភាពត្រូវបានចុះហត្ថលេខានៅទីក្រុងគូឡាឡាំពួ កាលពីថ្ងៃទី ២៦ ខែតុលា ដើម្បីធ្វើឲ្យបទឈប់បាញ់ដែលបញ្ចប់ការប្រយុទ្ធគ្នារយៈពេលប្រាំថ្ងៃកាលពីខែកក្កដា ក្លាយជាបទឈប់បាញ់ផ្លូវការ។

លោក ត្រាំ បានទាញយកកិត្តិយសចំពោះបទឈប់បាញ់រវាងកម្ពុជានិងថៃ ដែលសហរដ្ឋអាមេរិកចាត់ទុកជា «សម្ព័ន្ធមិត្តសំខាន់ក្រៅណាតូ» តាមរយៈការគំរាមបញ្ឈប់កិច្ចចរចាពាណិជ្ជកម្មជាមួយភាគីនីមួយៗ។ សង្រ្គាមរយៈពេលខ្លីនេះគឺជាជម្លោះ មួយក្នុងចំណោមប្រាំបី ដែលលោកប្រធានាធិបតីអះអាងថា បានបញ្ចប់។

ជុំវិញរឿងនេះដែរ មន្ត្រីជាន់ខ្ពស់នៃរដ្ឋបាលលោក ត្រាំ ម្នាក់ បានប្រាប់ Newsweek កាលពីថ្ងៃចន្ទថា៖ «លោកប្រធានាធិបតី ត្រាំ ប្តេជ្ញាចិត្តចំពោះ ការបញ្ឈប់អំពើហិង្សាជាបន្តបន្ទាប់ ហើយរំពឹងថា រដ្ឋាភិបាលកម្ពុជា និងថៃ នឹង គោរពយ៉ាងពេញលេញ នូវការប្តេជ្ញាចិត្តរបស់ខ្លួនដើម្បីបញ្ចប់ជម្លោះនេះ»។

សូមជម្រាបជាថ្មី លោកអនុទីន បានប្រកាសនៅឯមហាវិទ្យាល័យការពារជាតិក្នុងទីក្រុងបាងកកកាលពីថ្ងៃពុធទី១២ខែវិច្ឆិកាឆ្នាំ២០២៥ថា ថែនឹងស្វែងរកដៃគូធ្វើពាណិជ្ជកម្មជំនួសអាមេរិក បើទីក្រុងវ៉ាស៊ីនតោន យកពន្ធលើសនេះទៀត។ លោកក៏ប្រាប់ទៅរដ្ឋាភិបាលទីក្រុងបាងកកផងដែរថា ទុករឿងពន្ធនៅមួយឡែកសិនទៅ ត្រូវគិតរឿងជាតិនិងប្រយោជន៍ពលរដ្ឋជាមុនសិន។

យ៉ាងណា មកទល់ពេលនេះ មិនទាន់មានប្រតិកម្មណាមួយពីសំណាក់មេដឹកនាំមហាអំណាចផុតលេខអាមេរិក ដូណាល់ ត្រាំ តបទៅការព្រមានរបស់នាយករដ្ឋមន្ត្រីថៃនោះទេ ប៉ុន្តែសម្តីនេះប្រហែលលោកត្រាំបានជ្រាបរួចហើយ៕

អត្ថបទ៖ សុខ សុវណ្ណ

ចុចអាន៖ សារព័ត៌មានធំៗលើពិភពលោក ផ្សាយពីការបាញ់ប្រហាររបស់ទាហានថៃ លើពលរដ្ឋខ្មែរ