ការស្ទង់មតិ៖ ប្រជាជនថៃរំពឹងឱ្យរដ្ឋាភិបាលដោះស្រាយបញ្ហា​ទំនិញឡើងថ្លៃ និងជម្លោះព្រំដែនជាមួយកម្ពុជា

លទ្ធផលនៃការស្ទង់មតិរបស់ការិយាល័យស្ថិតិជាតិ (NSO) បានរកឃើញថា ប្រជាជនថៃជាង ១/៣ ដែល​បាន​ឆ្លើយតប បាន​រំពឹង​ឱ្យ​​​រដ្ឋាភិបាល​ដោះស្រាញបញ្ហា​ទំនិញឡើងថ្លៃ ដែលបង្កើន​ការចំណាយ​សម្រាប់ជីវិតរស់នៅប្រចាំថ្ងៃ និង​គ្រប់គ្រងតម្លៃទំនិញប្រើប្រាស់។ នេះបើតាមការចុះផ្សាយរបស់កាសែតបាងកកប៉ុស្តិ៍។

ការស្ទង់មតិដដែល ធ្វើឡើងចន្លោះពីថ្ងៃទី ១៧-២៣ ខែតុលា កន្លងទៅ ដោយ​ប្រមូលសំណាកពីប្រជាជន ៥ ០០០ នាក់ ដែលមាន​អាយុ ១៨ ឆ្នាំឡើងទៅ ទូទាំងប្រទេស។ ​

លទ្ធផលបង្ហាញថា អ្នកឆ្លើយតប ៤០,៣% រំពឹងថារដ្ឋាភិបាលនឹង​កាត់បន្ថយតម្លៃនៃការរស់នៅ(ការចំណាយប្រចាំថ្ងៃ) និងគ្រប់គ្រងតម្លៃទំនិញប្រើប្រាស់។

ប្រហែល ៣១,៥% រំពឹងថា រដ្ឋាភិបាលនឹងរៀបចំ​ស្ដារសេដ្ឋកិច្ចឡើង​, ៣០,៨% ​សុំឱ្យ​ដោះស្រាយបញ្ហាព្រំដែនថៃ-កម្ពុជា, ១៩,៤% ​សុំឱ្យ​ដោះស្រាយបញ្ហាកសិកម្មដូចជាការធ្លាក់ចុះនៃតម្លៃដំណាំ និងការបញ្ចុះតម្លៃជី និង ១៨,១% ចង់ឱ្យរដ្ឋបាលដោះស្រាយបញ្ហាគ្រឿងញៀន។

ទាក់ទងនឹងទំនុកចិត្តរបស់ពួកគេលើសមត្ថភាពរបស់រដ្ឋាភិបាលក្នុងការដោះស្រាយបញ្ហា អ្នកឆ្លើយតប ៣១% បាននិយាយថាទំនុកចិត្តរបស់ពួកគេខ្ពស់ ៥២,៦% ឆ្លើយថាមធ្យម និង ៣,១% មានទំនុកចិត្តទាប៕