ក្រសួងកសិកម្ម ជំរុញការកែច្នៃកសិផលឱ្យមានស្ដង់ដា​ ដើម្បីផ្គត់ផ្គង់ទីផ្សារក្នុងស្រុក និងនាំចេញ

លោក ប្រាក់ ដាវីដ រដ្ឋលេខាធិការ ​ក្រសួងកសិកម្ម រុក្ខាប្រមាញ់ ​និងនេសាទ បានឱ្យដឹងថា នៅក្នុងរយៈពេល ២ ឬ ៣ ទស្សវត្សចុងក្រោយនេះ វិស័យកសិកម្មមានការវិវត្តមួយ​ជាវិជ្ជមាន​ ដោយយើងបាន​ចាកចេញពីស្ថានភាព​នៃការខ្វះស្បៀង ​រហូតទៅដល់ស្ថានភាពនៃការមានស្បៀងគ្រប់គ្រាន់​រហូតដល់ការនាំចេញ។

លោក ប្រាក់ ដាវីដ បានលើកឡើងនៅក្នុងវេទិកាពិព័រណ៍កសិកម្មកម្ពុជាឆ្នាំ ២០២៥ នៅថ្ងៃទី ១៣ ខែវិច្ឆិកា ឆ្នាំ ២០២៥។

លោករដ្ឋលេខាធិការក្រសួងកសិកម្ម បានបញ្ជាក់ប្រាប់ឱ្យដឹងថា សុវត្ថិភាពស្បៀង ជាទូទៅយើងផ្ដោត​លើផលិតផលមួយចំនួនដូចជា ស្រូវ អង្ករ បន្លែ ត្រី សាច់។ បញ្ហាយើងនៅត្រង់ថា យើងផលិតបានច្រើន យើងឃើញថា ស្រូវ អង្ករ អាចនៅសល់ ប្រមាណ ៦-៧ លានតោន បន្ទាប់ពីការនាំចេញ។

លោក ប្រាក់ ដាវីដ បន្ថែមថា៖ «យើងក៏ដឹងដែរថា ការនាំចេញ ស្រូវ អង្ករ មួយផ្នែកធំ គឺការនាំចេញស្រូវ មិនទាន់បានកែច្នៃ ហើយបើយើងមើលទៅលើសាច់យើងឃើញថា ឆ្នាំនេះ ក៏មានការវិវត្តជាវិជ្ជមាន ដូចជាការនេសាទមានកំណើនខ្ពស់ ដោយសារតែការសហការរវាងក្រសួង និងអាជ្ញាធរ ​ក្នុងការទប់ស្កាត់ ការនេសាទខុសច្បាប់ នៅបឹងទន្លេសាប»។

បើតាមលោក ប្រាក់ ដាវីដ បើយើងមើលទៅលើផលិតកម្មផ្សេងទៀត ជាពិសេសពាក់ព័ន្ធនឹងសាច់ដូចជា ជ្រូក និង គោ ជាដើមក៏យើងផលិតបានគ្រប់គ្រាន់ផងដែរ ហើយយើងឃើញថា ការផលិតសម្រាប់ផ្គត់ផ្គង់ទីផ្សារក្នុងស្រុក ដើម្បីធានាបាននូវសន្តិសុខស្បៀងនេះ ក៏មានបន្លែ ហើយបន្លែនេះ គឺយើងផលិតបានមួយចំនួនធំហើយ តែបញ្ហាប្រឈមគឺ ការផ្គត់ផ្គង់ឱ្យមានស្ថិរភាព ហើយយើងដឹងថា បន្លែយើងអាចធ្វើបានល្អតែខែប្រាំង ដល់ខែវស្សា មានភ្លៀងធ្លាក់ច្រើន បន្លែវារលួយ ដូច្នេះហើយបានជាយើង ដោះស្រាយបញ្ហានេះ តាមរយៈការរៀបចំជាផ្ទះសំណាញ់ ដែលយើងអាចផ្គត់ផ្គង់បន្លែបានពេញមួយឆ្នាំ ប៉ុន្តែវាត្រូវការទុន។

ដូច្នេះហើយ! បានជាយើងខំប្រឹងបង្កើតតាមរយៈសហគមន៍កសិកម្មទំនើប យើងរុញការផលិតបន្លែមួយដែលអាចផលិតផ្គត់ផ្គង់បានពេញមួយឆ្នាំផង ហើយក៏អាចធានាបាននូវសុវត្ថិភាព។

មន្ត្រីដដែលរូបនេះ បញ្ជាក់ថា៖ «ការផលិត ប្រហែលត្រូវពិនិត្យមើល បើយើងផលិតបន្ថែម ប្រហែលជាមិនអាចធ្វើសម្រាប់កសិផលទាំងអស់នោះទេ។ មានមួយចំនួនយើងអាចផលិតបន្ថែម តែមួយចំនួនទៀត យើងក៏ត្រូវធ្វើការពិនិត្យមើល ជាពិសេសកសិផលមួយចំនួន ដែលយើងកំពុងតែជួបប្រទះបញ្ហាទីផ្សារ»។

លោក ប្រាក់ ដាវីដ បន្ថែមថា អ្វីដែលយើងកំពុងជំរុញបន្ថែម គឺការខិតខំប្រឹងប្រែងជំរុញការកែច្នៃ ឧទាហរណ៍ការផលិតស្រូវ ដែលស្របនឹងស្ដង់ដា អឺរ៉ុប ដើម្បីយើងអាចនាំចញទៅអឺរ៉ុបាន។ នេះជាការខិតខំប្រឹងប្រែងរបស់យើង ដើម្បីឱ្យកសិករ​ផលិតស្របទៅតាមស្ដង់ដា ដែលទីផ្សារអន្តរជាតិអាចទទួលយកបាន។

យោងតាមក្រសួងកសិកម្ម នៅ​ក្នុង​រយៈពេល ៩ ​ខែ ឆ្នាំ ២០២៥ ​កម្ពុជា​បាននាំចេញផលិតផល​កសិកម្មជាង ១១ ​លានតោន កើន​ឡើង​ប្រមាណ ៣០% ​ធៀបនឹងរយៈពេលដូចគ្នានៅឆ្នាំ ២០២៤៕

អត្ថបទ៖ ឡេង ដេត