សេដ្ឋកិច្ច

កម្ពុជារកចំណូលបាន ៨០៧ លានដុល្លារ ពីការនាំចេញគ្រាប់ស្វាយចន្ទី ត្រឹមរយៈពេល ១០ ខែ

បានផុស

៨ ខែ មុន

នៅ

ថ្ងៃអង្គារ ១៨ វិច្ឆិកា ២០២៥

ដោយ

កម្ពុជារកចំណូលបានជាង ៨០៧ លានដុល្លារ ពីការនាំចេញគ្រាប់ស្វាយចន្ទី នៅក្នុងរយៈពេល ១០ ខែ ឆ្នាំ ២០២៥ កើនឡើង ៦០,៩៣ ភាគរយ ធៀបនឹងរយៈពេលដូចគ្នានៅឆ្នាំ ២០២៤។ នេះបើយោងតាមរបាយការណ៍របស់ក្រសួងពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាន តារា ប្រធានសហព័ន្ធស្វាយចន្ទីកម្ពុជា ប្រាប់កម្ពុជាថ្មីថា កម្ពុជាជាប់លំដាប់ថ្នាក់លេខ២ នៅលើពិភពលោក ក្នុងការផលិតគ្រាប់ស្វាយចន្ទីដែលមិនទាន់កែច្នៃ ហើយជាប់លេខ១ ខាងគុណភាពគ្រាប់ស្វាយចន្ទី ដោយសារគ្រាប់ស្វាយចន្ទីយើងធំ រសជាតិឆ្ងាញ់ ព័ណ៌សម្បុរល្អ និងមានសារធាតុចិញ្ចឹមផ្សេងៗ ដែលអាចលក់បានតម្លៃថ្លៃជាងគេនៅលើពិភពលោក មួយតោនស្វាយចន្ទីស្ងួតដែលមិនទាន់កែច្នៃ មានតែកម្ពុជាតែដែលក់បានតម្លៃជាង ១៨០០ ដុល្លារ។

លោកបានបន្ថែមថា ការកែច្នៃស្វាយចន្ទីក្នុងស្រុកនៅមានកម្រិតដូច្នេះ យើងនាំចេញស្វាយចន្ទីមិនទាន់កែច្នៃច្រើន។

លោក អួន ស៊ីឡុត ប្រធានសមាគមស្វាយចន្ទីកម្ពុជា មានសុទិដ្ឋិនិយមខ្ពស់ថា ទិន្នផលគ្រាប់ស្វាយចន្ទីកម្ពុជានឹងកើនដល់ ១ លានតោន នៅឆ្នាំ ២០២៦ ខណៈផ្ទៃដីដាំដុះស្វាយចន្ទីបានកើនដល់ប្រមាណ ៧០ ម៉ឺនហិកតា (ទិន្នន័យក្រៅផ្លូវការ) ដែលសមាគមបានធ្វើជំរឿនជាមួយអ្នកលក់កូនស្វាយចន្ទី ដូច្នេះបើយើងគុណ ១,៥ តោន ក្នុងមួយហិកតា ក៏យើងបានជាង១ លានតោនដែរ។

លោកយល់ឃើញថា ការកែច្នៃគ្រាប់ស្វាយចន្ទីក្នុងស្រុកនឹងកើនឡើងនៅឆ្នាំ ២០២៦ ព្រោះមានការវិនិយោគរោងចក្រថ្មីៗចំនួន ២ បន្ថែមទៀត ដែលចាប់ផ្ដើមដំណើរការនៅឆ្នាំ ២០២៦ ខាងមុខនេះ។

របាយការណ៍របស់អគ្គនាយកដ្ឋានគយវៀតណាមបានផ្សព្វផ្សាយថា កម្ពុជាបាននាំចេញគា្រប់ស្វាយចន្ទីស្រស់ទៅកាន់ទីផ្សារវៀតណាមចំនួន ៩៦ ម៉ឺន ៤ ពាន់តោន គិតជាទឹកប្រាក់ ១,៤៧ ពាន់លានដុល្លារ នៅក្នុងរយៈពេល ១០ ខែ ឆ្នាំ ២០២៥។

នៅក្នុងឆ្នាំ ២០២៤ កម្ពុជាសម្រេចបានការប្រមូលទិន្នផលគ្រាប់ស្វាយចន្ទីចំនួន ៨៥ ម៉ឺនតោន ក្នុងនោះនាំចេញគ្រាប់ឆៅបានចំនួន ៨១ ម៉ឺន ៥ ពាន់តោន កើនឡើង ២១% គិតជាទឹកប្រាក់ ១ ពាន់ ១៥០ លានដុល្លារ កើន ២៦,១៥%។ ក្នុងនោះនាំចេញទៅវៀតណាមចំនួន ៧៩ ម៉ឺន ៥ ពាន់តោន។ យោងតាមរបាយការណ៍សមាគមស្វាយចន្ទីកម្ពុជា៕

អត្ថបទ៖ ឡេង ដេត