សេដ្ឋកិច្ច

កម្ពុជាស្វាគមន៍រោងចក្រកាត់ដេរបើកថ្មីជាង ៣០០ រោងចក្រ នៅឆ្នាំ ២០២៥

បានផុស

៥ ខែ មុន

នៅ

ថ្ងៃព្រហស្បតិ៍ ២៦ កុម្ភៈ ២០២៦

ដោយ

រោងចក្រនៅក្នុងវិស័យកាត់ដេរកម្ពុជា បានកើនឡើងដល់ចំនួន ១៨៦៧ សហគ្រាស គិតត្រឹមដំណាច់ឆ្នាំ ២០២៥ ឆ្លុះបញ្ចាំងពីការងើបឡើងវិញដ៏រឹងមាំ និងការធ្វើពិពិធកម្មមូលដ្ឋានឧស្សាហកម្មកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ បង្ហាញថា កម្ពុជាទទួលបានរោងចក្រថ្មីនៅក្នុងវិស័យកាត់ដេរចំនួន ៣០១ នៅក្នុងឆ្នាំ ២០២៥ ដែលធ្វើឱ្យចំនួនរោងចក្រកើនដល់ ១៨៦៧ សហគ្រាស។ រោងចក្រមិនមែនកាត់ដេរបានកើនឡើងដល់ចំនួន ៤៤ ៧៨២ សហគ្រាស។ កម្មករនិយោជិតក្នុងវិស័យកាត់ដេរកើនឡើងដល់ចំនួនជាង ១ លាននាក់ (១១៣៤ ០៩១)។

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍នៅក្នុងពិធីសន្និបាតបូកសរុបលទ្ធផលការងារ ឆ្នាំ២០២៥ និងលើកទិសដៅការងារ ឆ្នាំ២០២៦ នៅថ្ងៃព្រសហស្បតិ៍ថា កំណើនទុនវិនិយោគ កំណើនរោងចក្រ និងការងារ ឆ្លុះបញ្ចាំងពីភាពរឹងមាំនៃសេដ្ឋកិច្ចកម្ពុជា ដែលកើតចេញពីគោលនយោបាយត្រឹមត្រូវរបស់រាជរដ្ឋាភិបាលអាណត្តិទី៧ ដែលបានធ្វើកំណែទម្រង់វិនិយោគឱ្យមានភាពងាយស្រួលជាងមុន។

លោក កាំង ម៉ូនីកា អគ្គលេខាធិការរងសមាគមវាយនភណ្ឌ សម្លៀកបំពាក់ស្បែកជើង និងផលិតផលធ្វើដំណើរ (TAFTAC) មានប្រសាសន៍ថា ការនាំចេញផលិតផលក្នុងវិស័យវាយនភណ្ឌកើនឡើង ដោយសារស្ថិរភាពនៃបរិយាកាសវិនិយោគ និងការរក្សាបាននូវភាពប្រកួតប្រជែងដែលបានទាក់ទាញការវិនិយោគថ្មីៗមកបន្ថែមទៀត។ មានរោងចក្រថ្មីៗជាច្រើនបានបើកដំណើរការក្នុងឆ្នាំ២០២៥ កន្លងទៅ។

វិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ ដើរតួនាំទីយ៉ាងសំខាន់ ក្នុងការរួមចំណែកផ្ដល់ចំណូលដល់កម្ពុជាប្រមាណ ៥០% នៃការនាំចេញសរុបរបស់កម្ពុជាដែលមានទំហំជាង ៣១ ពាន់លានដុល្លារ នៅឆ្នាំ ២០២៥។

កម្ពុជាបាននាំចេញសម្លៀកបំពាក់ ស្បែកជើង និងសម្ភារធ្វើដំណើរ សម្រេចបាននូវទំហំទឹកប្រាក់ចំនួន ១៥,៥ ពាន់លានដុល្លារ នៅក្នុងឆ្នាំ ២០២៥ កើនឡើង ១៥,៧% ធៀបនឹងឆ្នាំ ២០២៤ ឆ្លុះបញ្ចាំងពីស្ថិរភាពនៃបរិយាកាសវិនិយោគ និងការរក្សាបាននូវភាពប្រកួតប្រជែងក្នុងតំបន់។ នេះបើយោងតាមក្រសួងពាណិជ្ជកម្ម៕

អត្ថបទ៖ ឡេង ដេត