សេដ្ឋកិច្ច

ការដោះដូរទំនិញកម្ពុជា-ថៃ មានទំហំជាង ៩០០ លានដុល្លារ ធ្លាក់ចុះជិត ៤០% ក្នុងរយៈពេល ៤ ខែ

បានផុស

២ ខែ មុន

នៅ

ថ្ងៃចន្ទ ១១ ឧសភា ២០២៦

ដោយ

ការដោះដូរទំនិញរវាងកម្ពុជា និងប្រទេសថៃ សម្រេចបាននូវទំហំទឹកប្រាក់ជាង ៩២៥ ដុល្លារ ធ្លាក់ចុះ ៣៨,១% នៅក្នុងរយៈពេល ៤ ខែ (មករា-មេសា) ២០២៦ ធៀបនឹងរយៈពេលដូចគ្នានៅឆ្នាំ ២០២៥ ក្នុងនោះកម្ពុជានាំចេញទៅថៃ មានតម្លៃ ២៣៥ លានដុល្លារ ធ្លាក់ចុះជាង ២៨% ចំណែកថៃនាំចូលមកវិញមានតម្លៃ ៦៩០ លានដុល្លារ ធ្លាក់ចុះ ៤០,៨%។ នេះបើយោងតាមរបាយការណ៍របស់អគ្គនាយករដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១១ ឧសភា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា ជម្លោះព្រំដែនកម្ពុជា-ថៃ បានធ្វើឱ្យព្រំដែននៃប្រទេសទាំងពីរបិទ ហើយទំនិញពុំអាចឆ្លងកាត់បាន ប៉ះពាល់ដល់ខ្សែច្រវាក់ផ្គត់ផ្គង់របស់សហគ្រាសមួយចំនួន ដែលពឹងផ្អែកលើការនាំធាតុចូលផលិតកម្មឆ្លងកាត់ព្រំដែន។ រាជរដ្ឋាភិបាល បានជំរុញឱ្យបង្វែការដឹកជញ្ជូនតាមផ្លូវគោល មកដឹកតាមផ្លូវទឹកឆ្លងកាត់កំពង់ផែវិញ។

លោកបណ្ឌិត គុណ ញឹម មានប្រសាសន៍កាលពីពេលថ្មីៗនេះថា ការដោះដូរទំនិញទ្វេភាគីកម្ពុជា-ថៃ បានធ្លាក់ចុះយ៉ាងគំហុក បន្ទាប់ពីមានការបិទព្រំដែនគោក និងការផ្ទុះសង្គ្រាម។ ទំនិញដែលនៅបន្តនាំចូលពីប្រទេសថៃ មានទំនិញប្រើប្រាស់ប្រចាំថ្ងៃ និងផលិតផលកម្មន្តសាល។

លោកបណ្ឌិត គុណ ញឹម បន្ថែមថា៖ «ទំនិញដែលនាំចូលមកប្រើប្រាស់មានការធ្លាក់ចុះជាបន្តបន្ទាប់ ទំនិញដែលហាមឃាត់ធ្លាក់ចុះដល់សូន្យ ប្រេងឥន្ធនៈ និងឧស្ម័នគឺធ្លាក់ចុះដល់សូន្យតែម្ដង»។

ប្រភេទទំនិញមួយក្រុមទៀត ដូចជា គ្រឿងម៉ាស៊ីន និងធាតុចូលផលិតកម្ម ដូចជាគ្រឿងចក្រ គ្រឿងយន្តកសិកម្ម ដែលជាមធ្យោបាយផលិតកម្ម ដែលមានត្រាក់ទ័រ គោយន្ត ម៉ាស៊ីនច្រូត គឺនៅមានការនាំចូលដើម្បីបម្រើវិស័យរបស់យើង ដែលជាធាតុចូលផលិតកម្មរបស់ក្រុមហ៊ុនវិនិយោគធំៗ មួយចំនួន ដូចជាក្រុមហ៊ុនមេនីបៀ ក្រុមហ៊ុន DENSO ជាដើម ដែលមិនមែនជាទំនិញប្រើប្រាស់ប្រចាំថ្ងៃនោះទេ។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ពាណិជ្ជកម្មទ្វេភាគីកម្ពុជា-ថៃ មានទំហំទឹកប្រាក់ ៣,៦៥ ពាន់លានដុល្លារ ធ្លាក់ចុះ ១៤,៨៦% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅថៃ ៧៣២ លានដុល្លារ ធ្លាក់ចុះ ១៤,១៥% ចំណែកថៃនាំចូលមកវិញមានតម្លៃ ២,៩ ពាន់លានដុល្លារ ធ្លាក់ចុះ ១៥%៕

អត្ថបទ៖ ឡេង ដេត

Related Topics:ពាណិជ្ជកម្មកម្ពុជា-ថៃ