សេដ្ឋកិច្ច

ការដោះដូរទំនិញកម្ពុជា-ថៃ ធ្លាក់ចុះជិត ៤០% នៅក្នុងរយៈពេល ៥ ខែ ឆ្នាំនេះ

បានផុស

៦ នាទី មុន

នៅ

ថ្ងៃពុធ ១០ មិថុនា ២០២៦

ដោយ

ការដោះដូរទំនិញរវាងកម្ពុជា-ថៃ សម្រេចបាននូវទំហំទឹកប្រាក់ជាង ១,១ ពាន់លានដុល្លារ នៅក្នុងរយៈពេល ៥ ខែ ២០២៦ ធ្លាក់ចុះ ៣៨,៧% ធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជានាំចេញទៅថៃ មានតម្លៃជាង ២៩៦ លានដុល្លារ ធ្លាក់ចុះ ២៥% ខណៈថៃនាំចូលមកវិញមានតម្លៃ ៨៥៤ លានដុល្លារ ធ្លាក់ចុះ ៤២,៤%។ នេះបើយោងតាមរបាយការណ៍របស់អគ្គនាយករដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ មិថុនា ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ការនាំចូលទំនិញពីប្រទេសថៃ បានធ្លាក់ចុះយ៉ាងគំហុក បន្ទាប់ពីមានជម្លោះព្រំដែនកម្ពុជា-ថៃ ខណៈមានមុខទំនិញមួយចំនួនបានធ្លាក់ចុះជាង ៧០%។

លោកបានបញ្ជាក់ថា៖ «ទំនិញខ្លះថយចុះ ៧០% ប៉ុន្តែការនាំចូលមិនមែនអត់ទាំងស្រុងទេ គ្រឿងបន្លាស់រថយន្តមួយចំនួន ដែលត្រូវនាំចូលមក ពីព្រោះកាលពីមិនទាន់ឈ្លោះគ្នា រោងចក្រធ្វើម៉ាស៊ីននៅនោះ រោងចក្រធ្វើគ្រឿនៅឯនេះ រោងចក្រតម្លើងនៅឯនេះ គ្រឿងបន្លាស់កសិកម្មក៏មានការនាំចូល ប្រេង ឧស្ម័ន បន្លែ ផ្លែឈើបិទទាំងស្រុង»។

លោក បែន សុវិជាតិ បន្ថែមថា ទំនិញខ្លះនៅមាននាំចូលតាមផ្លូវទឹក និងផ្លូវអាកាស ពីព្រោះយើងមិនមែនផ្ដាច់ចរន្តពាណិជ្ជកម្មទាំងស្រុងទេ យើងនៅមានចរន្តពាណិជ្ជកម្មទៅមករវាងប្រទេសទាំងពីរមិនមែនសង្គ្រាម ពាណិជ្ជកម្មត្រូវបិទទ្វារទាំងស្រុងទេ ប៉ុន្តែភាគីថៃទេដែលបិទព្រំដែនជាឯកតោភាគី ដែលគាត់គិតថា នឹងស្លាប់ ប៉ុន្តែកម្ពុជាកាន់តែរីកចម្រើន។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ ពាណិជ្ជកម្មទ្វេភាគីកម្ពុជា-ថៃ មានទំហំទឹកប្រាក់ ៣,៦៥ ពាន់លានដុល្លារ ធ្លាក់ចុះ ១៤,៨៦% ធៀបនឹងឆ្នាំ ២០២៤ ក្នុងនោះកម្ពុជានាំចេញទៅថៃ ៧៣២ លានដុល្លារ ធ្លាក់ចុះ ១៤,១៥% ចំណែកថៃនាំចូលមកវិញមានតម្លៃ ២,៩ ពាន់លានដុល្លារ ធ្លាក់ចុះ ១៥%៕

អត្ថបទ៖ ឡេង ដេត

Related Topics:ពាណិជ្ជកម្មកម្ពុជា-ថៃ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា