ព័ត៌មានអន្ដរជាតិ

ចិនព្រមទិញយន្តហោះ ប៊ូអីង ២០០ គ្រឿង តែតិចជាងការរំពឹងទុកឆ្ងាយ

បានផុស

២ ខែ មុន

នៅ

ថ្ងៃសុក្រ ១៥ ឧសភា ២០២៦

ដោយ

ប្រទេសចិនបានយល់ព្រមទិញយន្តហោះពីក្រុមហ៊ុនផលិតរបស់អាមេរិក ប៊ូអីង (Boeing) ចំនួន ២០០ គ្រឿង។ ប្រធានាធិបតីអាមេរិក លោក ដូណាល់ ត្រាំ បានប្រាប់បណ្ដាញព័ត៌មាន Fox News យ៉ាងដូច្នេះកាលពីថ្ងៃព្រហស្បតិ៍ អំឡុងទស្សនកិច្ចទៅទីក្រុងប៉េកាំង ប្រទេសចិន ដោយជួបជាមួយមេដឹកនាំលោក ស៊ី ជីនពីង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ ចំនួនដដែលគឺទាបជាងអ្វីដែលគេរំពឹងទុកឆ្ងាយ ដោយប្រភពមន្រ្តីអាមេរិកបានប្រាប់ទីភ្នាក់ងារសារព័ត៌មានរ៉យទ័រប៉ុន្មានថ្ងៃមុនថា ចិនអាចបញ្ជាការទិញយន្តហោះប៊ូអីងរហូតដល់ទៅ ៥០០ គ្រឿង។

លោក ត្រាំ បានថ្លែងប្រាប់ Fox News យ៉ាងដូច្នេះថា៖ «ចំណុចមួយដែលលោក(ស៊ី)បានយល់ព្រមថ្ងៃនេះ គឺថា លោកនឹងបញ្ជាទិញយន្តហោះ ២០០ គ្រៀង។ វាគឺជាចំណុចដ៏សំខាន់ សម្រាប់ប៊ូអីង»។ លោកបន្ថែមថា៖ «ប៊ូអីង រំពឹងទុក ១៥០ គ្រឿង តែបាន ២០០ គ្រឿង»។

មកទល់ពេលនេះ ព័ត៌មានលម្អិតបន្ថែមស្ដីពីការបញ្ជាទិញ មិនទាន់ត្រូវបានបង្ហាញនៅឡើយទេ រួមទាំងប្រភេទយន្តហោះ ប៉ុន្តែកន្លងមក មានសេចក្ដីរាយការណ៍ថា ចិនទំនងនឹងទិញ Boeing 737 MAX ។

មែនទែនទៅ ក្រុមហ៊ុន ប៊ូអីង មិនទទួលបានការបញ្ជាទិញធំៗណាមួយពីចិនជិត ១ ទសវត្សមកហើយរាប់តាំងពីឆ្នាំ ២០១៧ មក ខណៈចិនបានបង្កើនការទិញពីក្រុមហ៊ុនផលិតយន្តហោះនៅអឺរ៉ុប Airbus ដែលជាគូប្រជែងទៅវិញ។

គួរគូសបញ្ជាក់ថា លោក Kelly Ortberg នាយកប្រតិបត្តិក្រុមហ៊ុន ប៊ូអីង និងនាយកប្រតិបត្តិជាន់ខ្ពស់នៃក្រុមហ៊ុនយក្សអាមេរិកជាច្រើនរូបទៀត រួមទាំងលោក អេឡុន ម៉ាកស៍ របស់ក្រុមហ៊ុន Tesla និង SpaceX កំពុងស្ថិតនៅទីក្រុងប៉េកាំងជាមួយលោក ត្រាំ ក្នុងទស្សនកិច្ចដ៏កក្រើនលើកនេះ។

លោក Ortberg បាននិយាយក្នុងកិច្ចប្រជុំស្តីពីប្រាក់ចំណូលរបស់ក្រុមហ៊ុនកាលពីខែមុនថា កិច្ចប្រជុំកំពូលរវាងសហរដ្ឋអាមេរិក និងចិន អាចជា «ឱកាសដ៏មានអត្ថន័យសម្រាប់ពួកយើង» ដែលអាចរួមបញ្ចូលទាំងការបញ្ជាទិញយន្តហោះ។ លោកបន្ថែមយ៉ាងដូច្នេះថា៖ «ខ្ញុំមិនប្រាប់អ្នកពីចំនួនយន្តហោះទេ ប៉ុន្តែវាមានចំនួនដ៏ច្រើន»៕

ក្នុងដំណើរទស្សនកិច្ចរបស់លោក ត្រាំ ទៅប្រទេសចិនក្នុងឆ្នាំ ២០១៧ ចិនបានបញ្ជាទិញយន្តហោះ ប៊ូអីង ៣០០ គ្រឿង។

អ្នកវិភាគនិយាយថា បច្ចុប្បន្ន ចិនត្រូវការទិញយន្តហោះទាំងពី ប៊ូអីង និង Airbus ដើម្បីយកទៅប្រើប្រាស់តាមកំណើនដ៏ខ្លាំងក្លានៃតម្រូវការអាកាសចរណ៍របស់ខ្លួន។ អ្នកវិភាគជាច្រើនបានប៉ាន់ប្រមាណថា ប្រទេសចិនត្រូវការបញ្ជាទិញយន្តហោះថ្មីរហូតដល់ ១ ០០០ គ្រឿងឥឡូវនេះ ហើយចំនួននេះ នឹងកើនដល់យ៉ាងហោចណាស់ ៩ ០០០ គ្រឿង នៅឆ្នាំ ២០៤៥៕