កម្ពុជា-វៀតណាម ប្តេជ្ញាជំរុញទំហំពាណិជ្ជកម្មឱ្យបានលើសពី ១០ ពាន់លានដុល្លារ នៅឆ្នាំនេះ

កម្ពុជា និងវៀតណាមបានប្តេជ្ញានឹងជំរុញទំហំពាណិជ្ជកម្ម ទ្វេភាគីនេះឱ្យបានលើសពី ១០ ពាន់លានដុល្លារអាមេរិក នៅឆ្នាំ២០២២នេះ ទោះបីជំងឺកូវីដ-១៩ មិនទាន់បានផុតរលត់ក៏ដោយ។

ការប្តេជ្ញានេះបានធ្វើឡើងនៅក្នុងជំនួបពិភាក្សាការងាររវាងលោក សុខ សុភ័ក្រ្ត រដ្ឋលេខាធិការក្រសួងពាណិជ្ជកម្មជាមួយលោក Tran Quoc Khanh អនុរដ្ឋមន្រ្តីនៃក្រសួងឧស្សាហកម្ម និងពាណិជ្ជកម្ម នៃសាធារណរដ្ឋសង្គមនិយមវៀតណាម តាមប្រព័ន្ធវីដេអូកាលពីពេលថ្មីៗនេះ។

ក្នុងឱកាសនោះ ភាគីទាំងពីរបានកត់សម្គាល់ពីវឌ្ឍនភាពនៃកិច្ចសហប្រតិបត្តិការដ៏ល្អប្រពៃល្អរវាងកម្ពុជា-វៀតណាម ពិសេសលទ្ធផលកំណើនពាណិជ្ជកម្មទ្វភាគីដែលសម្រេចបានប្រមានជិត ៩ ពាន់លានដុល្លារក្នុងឆ្នាំ ២០២១ ស្របតាមទិសដៅដាក់ចេញដោយប្រមុខរាជរដ្ឋាភិបាលនៃប្រទេសទាំងពីរ ក្នុងដំណើរទស្សនៈកិច្ចរបស់ឯកឧត្តមប្រធានាធិបតីវៀតណាម មកកាន់កម្ពុជានាថ្ងៃទី២១-២២ ខែធ្នូ ឆ្នាំ២០២១ កន្លងទៅ។

ភាគីទាំងពីរក៏បង្ហាញការប្តេជ្ញាចិត្តតាមរយៈការដោះស្រាយបញ្ហាជួបប្រទះ ដោយធ្វើយ៉ាងណាជំរុញទំហំពាណិជ្ជកម្ម ទ្វេភាគីនេះឱ្យបានលើសពី ១០ ពាន់លានដុល្លារអាមេរិក នៅឆ្នាំ២០២២នេះ ទោះបីជំងឺកូវីដ-១៩ មិនទាន់បានផុតរលត់នៅឡើយក៏ដោយ។

ជាងនេះទៅទៀត ភាគីទាំងពីរបានពិភាក្សាផ្លាស់ប្តូរយោបល់ដើម្បីស្វែងរកដំណោះស្រាយលើវិធានបូកបន្ថែម​(Extended Cumulation) សម្រាប់ផលិតកម្មកង់ ដែលកម្ពុជានាំទៅសហភាពអឺរ៉ុប ក្រោយកិច្ចព្រមព្រៀងពាណិជ្ជកម្ម សេរីវៀតណាម-សហភាពអឺរ៉ុប បានចូលជាធរមានកាលពីឆ្នាំ២០២០​​ កន្លងទៅ ដែលបទប្បញ្ញត្តិលេខ ២០១៥/២៤៤៦ របស់សហភាពអឺរ៉ុប តម្រូវឱ្យភាគីកម្ពុជា-វៀតណាមបំពេញនីតិវិធីចាំបាច់ក្នុងការទទួលបានវិធានបូកបន្ថែមនេះ។

លើសពីនេះ ភាគីទាំងពីរបានពិភាក្សាស្វែងរកដំណោះស្រាយលើបញ្ហាការនាំស្វាយចន្ទី និងស្ករសពីកម្ពុជាទៅប្រទេសវៀតណាម ដែលមានការរាំងស្ទះផ្នែកបច្ចេកទេសមួយចំនួន ហើយក៏បានប្តេជ្ញាចិត្តសហការដោះស្រាយកិច្ចការនេះបន្តទៀត ដោយយកចិត្តទុកដាក់ខ្ពស់បំផុត។

ជាងនេះទៀតភាគីទាំងពីរក៏បានពិភាក្សាលើបញ្ហាផ្សេងទៀតពាក់ព័ន្ធវិស័យពាណិជ្ជកម្មតាមព្រំដែនដោយបានឯកភាពចាត់តាំងឱ្យក្រុមការងារពិនិត្យសេចក្តីព្រាងកិច្ចព្រមព្រៀងស្តីពី ការធ្វើពាណិជ្ជកម្មតាមព្រំដែន សម្រាប់ដាក់ជូនថ្នាក់ដឹកនាំពិនិត្យនិងសម្រេច។

ក្នុងឱកាសនោះដែរ ភាគីទាំងពីរបានប្តេជ្ញាចិត្ត បន្តពង្រឹងទំនាក់ទំនង និងកិច្ចសហប្រតិបត្តិការដ៏ជិតស្និទ្ធលើគ្រប់វិស័យ ពិសេសវិស័យពាណិជ្ជកម្ម-វិនិយោគ៕

អត្ថបទ៖ សំអឿន