លោក គង់ វិបុល៖ អ្នកខ្លះមិនដែលបង់ពន្ធ​មួយរៀល តែរអ៊ូថា រដ្ឋជាន់ករាស្រ្ត

ប្រធានពន្ធដារ បានលើកឡើងថា បច្ចុប្បន្នមានសគ្រាសជាច្រើនដែលគេចមិនព្រមបង់ពន្ធជូនរដ្ឋ ដែលនាំឱ្យរដ្ឋបាត់បង់ចំណូលក្នុងការអភិវឌ្ឍប្រទេសជាតិ។

លោក គង់ វិបុល អគ្គនាយកពន្ធដារ បានឱ្យដឹងថា សហគ្រាសខ្លះបើកទីតាំងលក់ទំនិញរាប់ឆ្នាំមកហើយ តែមិនបាន​បង់ពន្ធ ពិសេសហាងរបស់ជនជាតិចិន។ អាជ្ញាធរពាក់ព័ន្ធត្រូវជំរុញសហគ្រាសទាំងនោះ ឱ្យមកបង់ពន្ធជូនរដ្ឋ។ លោកថ្លែងបែបនេះ ក្នុងកម្មវិធីពិសេស«វិក្កយបត្រនាំសំណាង- GDT Lucky Draw» កាលថ្ងៃទី២មិថុនា ។

លោកថា «អ្នកខ្លះមិនដែលបង់ពន្ធមួយរៀលទេ តែរអ៊ូថា យើងជាន់ករាស្រ្ត ខ្ញុំធ្វើនេះ គឺសមធម៌ អ្នកមាន​ចំណូលគឺបង់ពន្ធ អ្នករកស៊ីចុះបញ្ជីឱ្យបានត្រឹមត្រូវ»។

លោកបន្តថា មានសហគ្រាសខ្លះ ចង់តែជាប់ពន្ធតូចបង់ពន្ធតែ ២០ម៉ឺនរៀលទៅ ៤០ម៉ឺនរៀល ក្នុងមួយឆ្នាំ ទោះសហគ្រាស​ខ្លួនធំ មានចំណូលរាប់ម៉ឺន លានដុល្លារក៏ដោយ ជាពិសេសអាជីវកម្មផ្នែកគ្រឿងសម្អាង។

នៅក្នុងយុទ្ធសាស្រ្តកៀរគចំណូលធ្វើយ៉ាងណា ត្រូវបង់ពន្ធនៅក្នុងប្រទេសស្មើភាពគ្នា។ គោលនយោបាយរបស់រដ្ឋប្រមូល​ពន្ធឱ្យអស់ និងត្រូវមានសក្តានុពល។ បច្ចុប្បន្ននេះ រដ្ឋមិនបង្កើតពន្ធថ្មីទេ គឺត្រូវប្រមូលពន្ធឱ្យអស់លទ្ធភាពសិន ហើយរដ្ឋ​ក៏មិន​ដំឡើង​ពន្ធដែរ គឺមានតែបន្ធូរបន្ថយ។ ជាក់ស្តែងនៅក្នុងវិបត្តិកូវីដ មានការលើកលែងពន្ធចំពោះ​សហគ្រាស​ជាច្រើន។ ចំពោះការបង់ពន្ធ ធ្វើយ៉ាងណាឱ្យមានសមធម៌ និងយុត្តិធម៌។ នេះគឺជាការបញ្ជាក់របស់លោក គង់ វិបុល។

បើតាមលោក គង់ វិបុល ការខិតខំប្រមូលពន្ធរាល់ថ្ងៃនេះ គឺដើម្បីយកទៅកសាងប្រទេសជាតិឱ្យរីកចម្រើន ដូចប្រទេសគេ ដែលមានហេដ្ឋារចនាសម្ព័ន្ធទំនើប និងទាន់សម័យ។

ប្រធានពន្ធដារ បានលើកទឹកចិត្តដល់ប្រជាពលរដ្ឋទាំងអស់ ចូលរួមថតវិក្កយបត្រទិញទំនិញឬសេវាគ្រប់ប្រភេទ ហើយបញ្ជូនចូលក្នុងកម្មវិធីវិក្កយបត្រនាំសំណាង (GDP Lucky Draw App) ដើម្បីពង្រឹងការប្រមូលចំណូល​ចូលជាតិ។ ចំណែកពលរដ្ឋ​ដែលបញ្ជូនវិក្កយបត្រទិញទំនិញនិងសេវាកម្ម ទៅកម្មវិធីវិក្កយបត្រនាំសំណាងនេះ អាចមានឱកាសឈ្នះរង្វាន់រថយន្ត ម៉ូតូ ​ និងទូរសព្ទដៃទំនើបផងដែរ។ 

 សូមបញ្ជាក់ថា អគ្គនាយកដ្ឋានពន្ធដារ ប្រមូលចំណូលពន្ធ-អាករ បានជាង ១,៥០១ លានដុល្លារ គិតចាប់ពីខែ មករា ដល់ខែ មេសា ឆ្នាំ ២០២២។ ចំណូលសរុបនេះ គឺស្មើនឹង ៥៣,២៧ភាគរយនៃផែនការ​ ច្បាប់ហិរញ្ញវត្ថុប្រចាំឆ្នាំ ២០២២ ក្នុងទំហំសរុប​២ ៨១៩,៥៤លានដុល្លារ៕ ទួន សុផល