គម្រោងវិនិយោគ៣ឆ្នាំរំកិលរបស់ក្រសួងអភិវឌ្ឍន៍ជនបទមានទំហំថវិកាជាង ៤៦លានដុល្លារ

ក្រសួងអភិវឌ្ឍន៍ជនបទសម្រេចបានសមិទ្ធផលធំៗជាច្រើន និងបានរួមចំណែកយ៉ាងសំខាន់ ក្នុងការ​អនុវត្តការងារកែទម្រង់ការ គ្រប់គ្រងហិរញ្ញវត្ថុសាធារណៈ ជាពិសេសក្នុងដំណាក់កាលទី៣ គឺការផ្សារភ្ជាប់ ថវិកាទៅនឹងគោលនយោបាយ ។

យោងតាមរបាយការណ៍សមិទ្ធផលសម្រេចបានរយៈពេល ៥ឆ្នាំ (២០១៨-២០២២) របស់ក្រសួងអភិវឌ្ឍន៍ជនបទ បានបង្ហាញថា ក្រសួងបានរៀបចំផែនការវិនិយោគសាធារណៈ ៣ ឆ្នាំរំកិល(ឆ្នាំ​២០២១-២០២៣) ដោយសម្រេច​បានគម្រោង វិនិយោគសរុបចំនួន ៤០ គម្រោង ដែលមានទឹកប្រាក់សរុបចំនួន ៤៦៣ ១៦  ៨០០ ដុល្លារអាមេរិក។ ក្នុងនោះគម្រោងកំពុងដំណើរការមានចំនួន ១១ គម្រោង មានទឹកប្រាក់សរុបចំនួន ៣៧០ ៩៤៨ ៩០០ ដុល្លារអាមេរិក និងទឹកប្រាក់ចំនួន ១១២ ៦៧៥ ៦០០ ដុល្លារអាមេរិក សម្រាប់ឆ្នាំ២០២១។

បើតាមរបាយការណ៍ដដែល បានឱ្យដឹងទៀតថា គម្រោងជំនួយបច្ចេកទេសកំពុងដំណើរការមានចំនួន ៧ គម្រោង ដែលមានទឹកប្រាក់សរុបចំនួន ៩ ៨៦០ ៩០០ ដុល្លារ សម្រាប់ឆ្នាំ(២០២១-២០២៣) ទឹកប្រាក់ចំនួន ៣ ២៦៣ ១០០ ដុល្លារ សម្រាប់ឆ្នាំ ២០២១ និងគម្រោងអនុវត្តផែនការ យុទ្ធសាស្រ្តអភិវឌ្ឍន៍ជាតិមានចំនួន ២២ គម្រោង​។

ក្រសួងបានដាក់​ចេញ​​នូវ​គោលនយោ​បាយ ​​ស្តីពីការអភិវឌ្ឍធនធានមនុស្ស សំដៅបង្កើនសមត្ថភាពមន្រ្តីរាជ​ការទាំងនៅថ្នាក់ជាតិ និង​ថ្នាក់​ខេត្ត ដើម្បីរួមចំណែក ក្នុងការអនុវត្តកម្មវិធីកំណែទម្រង់រដ្ឋបាល   សាធារណៈ កំណែទម្រង់ការគ្រប់គ្រង​ហិរញ្ញវត្ថុ​សាធារណៈ​ និងកំណែទម្រង់វិមជ្ឈការនិងវិសហមជ្ឍការនៅថ្នាក់ក្រោមជាតិ ​ឱ្យកាន់តែមានប្រសិទ្ធភាពខ្ពស់ផងដែរ។

លើសពីនេះទៀត រាជរដ្ឋាភិបាល​ បានដាក់ចេញនូវ​ក្របខណ្ឌ​យុទ្ធសាស្រ្ត​អភិវឌ្ឍ​រយៈពេល​មធ្យម និង​រយៈពេលវែង​ ដែល​ដូចជា កម្មវិធីគោលនយោបាយ និង​​យុទ្ធសាស្រ្តចតុកោណ ផែនការយុទ្ធសាស្រ្ត​ អភិវឌ្ឍន៍ជាតិ និងក្របខណ្ឌ​គោលដៅ​អភិវឌ្ឍប្រកបដោយ​ចីរភាព​កម្ពុជា​ ​ក្នុងគោលបំណងនាំប្រទេស​កម្ពុជា ឈាន​ឆ្ពោះទៅ​សម្រេច​បាន​​ជាប្រទេសដែល​មានការ​អភិវឌ្ឍ  និងរីក​ចម្រើនជឿនលឿន។ រាជរដ្ឋាភិបាល បាននិងកំពុងបន្ត​អនុវត្តយុទ្ធសាស្រ្ត​ចតុកោណដំណាក់​កាលទី៤ សម្រាប់​រាជរដ្ឋាភិបាល​នីតិកាលទី​៦    ឆ្នាំ​២០១៨-២០២៣ ​ដើម្បីបង្កើនវឌ្ឍនភាពបន្ថែម ​​និង​ឈាន​ទៅសម្រេចឱ្យបាន​នូវគោលដៅ​​​ប្រែក្លាយប្រទេសកម្ពុជា ជាប្រទេស​ដែលមានចំណូលមធ្យមកម្រិតខ្ពស់នាឆ្នាំ​២០៣០ និងជាប្រទេស​មានចំណូលខ្ពស់ នាឆ្នាំ​២០៥០៕