កំណើនជើងហោះហើរចូលខេត្តសៀមរាបកើនឡើងជិត ៤០០ជើង

ក្នុងឆមាសទី១ ឆ្នាំ២០២២នេះ ខេត្តសៀមរាប ទទួលបានទេសចរអន្តរជាតិប្រមាណ៦ម៉ឺននាក់ កើនឡើងក្នុងអត្រា ១ ០២៥% ធៀបរយៈពេលដូចគ្នាឆ្នាំ២០២១ និងទេសចរផ្ទៃក្នុងប្រមាណជាង១លាននាក់ កើនឡើងក្នុងអត្រា ៧៩៨% ធៀបរយៈពេលដូចគ្នាឆ្នាំ២០២១។ ក្នុងនោះជើងហោះហើរមកកាន់ខេត្តសៀមរាប មានចំនួន ៣៨៧ជើង នៅក្នុងឆមាសទី១ ឆ្នាំ២០២២នេះ។ នេះបើតាមការបញ្ជាក់របស់លោក ទៀ សីហា អភិបាលខេត្តសៀមរាប និងជាអនុប្រធានប្រចាំការនៃ គណៈប្រតិបត្តិ នៃគ.អ.ទ.ស.។

លោក អភិបាលខេត្ត បានដាក់ការរំពឹងថា ខេត្តសៀមរាបនឹងទទួលបានទេសចរអន្តរជាតិប្រមាណជាង១០ម៉ឺននាក់ នៅក្នុងឆ្នាំ២០២២នេះ ហើយនឹងកើនដល់ប្រមាណ៥០ម៉ឺននាក់ នៅក្នុងឆ្នាំ២០២៣ខាងមុខ ដោយនឹងស្រូប​យក១/៤នៃភ្ញៀវទេសចរអន្តរជាតិ ដែលមកទស្សនាកម្ពុជា ខណៈដែលភ្ញៀវទេសចរផ្ទៃក្នុងជាង២លាននាក់ នឹងមកទស្សនាខេត្តសៀមរាប នៅក្នុងឆ្នាំ២០២២នេះ ហើយប្រមាណ៤លាននាក់ នៅក្នុងឆ្នាំ២០២៣។

សូមបញ្ជាក់ថា រាជរដ្ឋាភិបាលបានផ្តល់គោលនយោបាយលើកទឹកចិត្តសម្រាប់ការទិញសំបុត្រចូលរមណីយដ្ឋានអង្គរ ដោយបន្ថែមចំនួនថ្ងៃចូលទស្សនា ក្នុងនោះ៖ ទិញបណ្ណប្រភេទ ១ថ្ងៃ អាចចូលទស្សនាបានរយៈពេល២ថ្ងៃ សុពល​ភាពរយៈពេល៥ថ្ងៃ, ទិញបណ្ណប្រភេទ ៣ថ្ងៃ អាចចូលទស្សនាបានរយៈពេល៥ថ្ងៃ សុពលភាពរយៈពេល១០ថ្ងៃ, ទិញបណ្ណប្រភេទ ៧ថ្ងៃ អាចចូលទស្សនាបានរយៈពេល ១០ថ្ងៃ សុពលភាពរយៈពេល១ខែ។ សម្រាប់អ្នក​វិនិយោគ​នៅកម្ពុជា ចាប់ពី២ឆ្នាំឡើងទៅ អាចចូលទស្សនារមណីយដ្ឋានអង្គរបាន ដោយមិនចាំបាច់ទិញសំបុត្រឡើយ។

កាលពីថ្ងៃទី១ ខែសីហា ឆ្នាំ២០២២ រាជរដ្ឋាភិបាលកម្ពុជា បានប្រកាសដាក់ចេញយន្តការអនុវត្តការងារ និងផែនការ​សកម្មភាពគន្លឹះសំខាន់ៗ ដែលចំណុះឱ្យគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ ដើម្បីរួម​ចំណែកទាក់ទាញភ្ញៀវទេសចរអន្តរជាតិបង្កើនការមកទស្សនាខេត្តសៀមរាបឡើងវិញ។

ចំណេក កាលពីថ្ងៃទី៣០ ខែមីនា ឆ្នាំ២០២១កន្លងទៅ រាជរដ្ឋាភិបាលក៏បានអនុម័តនូវ «ផែនការមេអភិវឌ្ឍន៍ទេសចរណ៍​ខេត្តសៀមរាប ឆ្នាំ២០២១-២០៣៥» រួចមកហើយ ជាមួយគ្នាក៏បានសម្រេចគណៈកម្មការគ្រប់គ្រង និងអភិវឌ្ឍន៍​ទេសចរណ៍សៀមរាប-អង្គរ៕