៦ខែឆ្នាំនេះ កម្ពុជា ទទួលបានគម្រោងវិនិយោគ ២ពាន់គម្រោង ស្មើនឹងជាង ១ពាន់លានដុល្លារ

ស្ថិតក្នុងបរិបទដែលប្រទេសជាតិមានស្ថេរភាពនយោបាយ សន្តិសុខសង្គម និងការអភិវឌ្ឍរីកចម្រើនលើគ្រប់វិស័យ ការវិនិយោគក្នុងវិស័យសំណង់ទាំងក្នុងស្រុក និងក្រៅប្រទេសមានសម្ទុះខ្លាំងក្លា និងបានរួមចំណែកដ៏សំខាន់ក្នុងការជំរុញ​កំណើនសេដ្ឋកិច្ចជាតិ។

ជាក់ស្តែងគិតត្រឹម ៦ខែ ឆ្នាំ ២០២២ មាន ២០០០គម្រោង ដែលមានទុនវិនិយោគប្រមាណ ១ ២០៦ លានដុល្លារ បានដំណើរការអភិវឌ្ឍនៅក្នុងប្រទេសកម្ពុជា។ នេះបើតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់។

បើតាមរបាយការណ៍ គិតចាប់ពីផ្តើមអនុវត្តឆ្នាំ ២០០០ ដល់រយៈពេល ៦ខែ ឆ្នាំ ២០២២ ក្រសួងបានចេញលិខិអនុញ្ញាត​សាងសង់នៅទូទាំងប្រទេសចំនួន ៥៧ ៥៩០ គម្រោង និងទុនវិនិយោគសរុបប្រមាណ ៦៦ ២០៥ លានដុល្លារ។

ក្នុងនោះ គម្រោងខ្ពស់ៗ ចាប់ពី ៥ជាន់ឡើង នៅទូទាំងប្រទេសមានចំនួន ២៤៧២ អគារ គម្រោង បុរីលំនៅឋាន និងបណ្តុំលំនៅឋានមានលក្ខណៈជាបុរីមានចំនួន ៤៨២គម្រោង៕