គម្រោងជាង ១០០ ត្រូវបានអនុម័តលើទុន​វិនិយោគជាង ៣ពាន់លានដុល្លារ ៨ខែមកនេះ

ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា(CDC) បានអនុម័តគម្រោងវិនិយោគចំនួន១១២គម្រោង មានទុនជាង​៣០៤៣លានដុល្លារអាមេរិកបង្កើតឱកាសការងារជូនប្រជាពលរដ្ឋចំនួន៧៥៣៤៣កន្លែង នៅក្នុងរយៈពេល​៨ខែឆ្នាំ២០២២នេះ។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងចំណោមគម្រោងវិនិយោគ១១២ ក្នុងនោះ នៅខែមករា បានអនុម័តច្រើនជាងគេ រហូតដល់ទៅចំនួន២៤ក្រុមហ៊ុន ដែលមានទុនវិនិយោគជាង ២២៧៧​លានដុល្លារអាមេរិក និងផ្តល់ការងារជូនប្រជាពលរដ្ឋចំនួន ១៩៩០៥កន្លែង។

បន្ទាប់មកខែឧសភាឆ្នាំ២០២២នេះ មានគម្រោងវិនិយោគចំនួន ២០ក្រុមហ៊ុន មានទុនវិនិយោគចំនួន ១៩៨,១​លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន១២៣៩៥កន្លែង។

ខែសីហាអនុម័តគម្រោងវិនិយោគចំនួន ១៧គម្រោងដែលមានទុនវិនិយោគចំនួន ២០៣,១លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន ១១១៩៧នាក់។ខែមិថុនាអនុម័តគម្រោងវិនិយោគចំនួន ១៥គម្រោងដែលមានទុនវិនិយោគចំនួន ១២៣លានដុល្លារអាមេរិក ដោយផ្តល់ឱកាសការងារ​ជូនដល់ប្រជាពលរដ្ឋ​ចំនួន១១៥៧០នាក់។

ខែកម្ភៈ អនុម័តមានគម្រោងវិនិយោគចំនួន ១២ក្រុមហ៊ុនមានទុនវិនិយោគចំនួន៨៨,៦៤៥លានដុល្លារអាមេរិក​ដោយផ្តល់ឱកាសការងារជូនដល់​ប្រជាពលរដ្ឋចំនួន១១៥៥៣កន្លែង។

ខែមេសា មានគម្រោងវិនិយោគចំនួន ១២ក្រុមហ៊ុនមានទុនវិនិយោគចំនួន ៧១,៧លានដុល្លារអាមេរិកដោយផ្តល់​ឱកាសការ​ងារជូនដល់ប្រជាពលរដ្ឋចំនួន៨២៧៤កន្លែង។ខែកក្កដាអនុម័តគម្រោងវិនិយោគចំនួន៨គម្រោង​ដែលមានទុនវិនិយោគចំនួន​១១៧,៨លានដុល្លារអាមេរិកដោយផ្តល់ឱកាសការងារជូនដល់ប្រជាពលរដ្ឋចំនួន​៧៩១៧នាក់និងខែមីនាឆ្នាំ២០២២មានគម្រោងវិនិយោគចំនួន៤ដែលមានទុនវិនិយោគប្រមាណ១៣,៦លានដុល្លារអាមេរិកដោយបានផ្តល់ឱកាសការងារជូនប្រជាពលរដ្ឋ២៩៣០កន្លែង។

ក្នុងចំណោមក្រុមហ៊ុនចំនួន ១១២គម្រោង ក្នុងនោះមានគម្រោងបោះទុនវិនិយោគធំៗចំនួន៤រួមមាន អាជីវកម្មសណ្ឋា​គារថ្នាក់ផ្កាយ៥ ចំនួន ៥២៨បន្ទប់ ដែលមានទីតាំងវិនិយោគស្ថិតនៅមហាវិថីព្រះមុនីវង្ស សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ មានទុនវិនិយោគចំនួន ១២៩ លានដុល្លារអាមេរិក ។ គម្រោងបង្កើតរោង​ចក្រផលិតសំបកកង់យានយន្តគ្រប់ប្រភេទស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, មានទុនវិនិយោគប្រមាណ ២៩៧លានដុល្លារអាមេរិក។

គម្រោងវិនិយោគអភិវឌ្ឍន៍វារីអគ្គិសនីស្ទឹងតាតៃលើ អានុភាព ១៥០ MW ដែលមានទីតាំងវិនិយោគស្ថិតនៅស្រុកថ្មបាំង និងស្រុកកោះកុង ខេត្តកោះកុង មានទុនវិនិយោគប្រមាណ ៣៨៩ លានដុល្លារអាមេរិក ។គម្រោងវិនិយោគអភិវឌ្ឍន៍មណ្ឌល     ភ័ស្តុភារកម្ម និងកំពង់ផែពហុបំណង ដែលមានទីតាំងវិនិយោគស្ថិតនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត មានទុនវិនិយោគចំនួន ១.៣០០លានដុល្លារអាមេរិក៕ សំអឿន