អគ្គនាយកដ្ឋានគយ ប្រមូលចំណូលពន្ធ​រថយន្តចង្កូតឆ្វេង-ស្តាំ បានជិត ​១០០លានដុល្លារ

គិតត្រឹមរយៈពេល ៩ខែ ឆ្នាំ ២០២២នេះ អគ្គនាយកដ្ឋានគយ និងរដ្ឋាករ ប្រមូលចំណូលពីរថយន្តចង្កូតឆ្វេង និងស្តាំ បានប្រមាណជិត ១០០លានដុល្លារ។ នេះបើតាមការបញ្ជាក់របស់លោក គុណ ញឹម។

លោក គុណ ញឹម ​អគ្គនាយក​នៃ​អគ្គនាយកដ្ឋាន​គយ ​និង​រដ្ឋាករ បានឱ្យដឹងថា គយបានរកចំណូលបានពី​ការបង់ពន្ធអាករ​រថយន្តចង្កូតឆ្វេង ស្តាំ ជិត ​១ម៉ឺនគ្រឿង ដែលគិតជាថវិកាប្រមាណជិត ៨០លានដុល្លារ សម្រាប់ដំណាក់កាលទី១។ ចំណែកដំណាក់កាលទី២ ប្រមូលពន្ធបានពីរថយន្តចង្កូតស្តាំជិត ៦ពាន់គ្រឿង ប្រភេទរថយន្តដឹក ស្មើនឹងថវិកាជិត ២០លានដុល្លារ សរុបទាំងពីរយុទ្ធនាការនេះ បានថវិកាជិត ១០០លានដុល្លារ។

ថ្លែងនៅក្នុងសន្និសីទសារព័ត៌មាន ស្តីពី វឌ្ឍនភាពនៃការអនុវត្តការប្រមូលពន្ធលើយានយន្ត និងអាករនាំចូលដែល​មានស្រាប់ក្នុងប្រទេស ថ្ងៃទី ០៥ ខែ តុលា លោក គុណ ញឹម បានលើកឡើងថា រយៈពេល ៩ខែឆ្នាំនេះ អគ្គនាយក​ដ្ឋានគយ បានបង្រ្កាបរថយន្តចង្កូតឆ្វេង និងស្តាំ ដែលមិនអនុវត្តតាមគោលការណ៍ច្បាប់ បានប្រមាណ ៥១០​គ្រឿង ក្នុងនោះមានរថយន្តចង្កូតឆ្វេងចំនួន ៤៨២គ្រឿង និងចង្កូតស្តាំ ២៨គ្រឿង។

លោក គុណ ញឹម បានសង្កត់ធ្ងន់ថា« យើងមិនអាចបន្ធូរដៃបានទេ ជាពិសេសរថយន្តចង្កូតស្តាំ ដែលយើងមាន​ព្រំដែនវែងក្នុងការបង្រ្កាប ដោយបានដាក់កម្លាំងបន្ថែម ដោយមានបណ្តាញព័ត៌មានគ្រប់ទីកន្លែង និងមិនអនុញ្ញាត​ឱ្យមានការនាំចូលថ្មីទៀតឡើយ»។

សូមបញ្ជាក់ថា អគ្គនាយក​នៃ​អគ្គនាយកដ្ឋាន​គយ ​និង​រដ្ឋាករ ប្រមូលចំណូលបានប្រមាណ ២០២២.០២ លានដុល្លារ ស្មើនឹង ៧៨.៦១% នៃច្បាប់ថវិកាជាតិ រយៈពេល ៩ខែ ឆ្នាំ ២០២២នេះ៕