កម្ពុជា មានអ្នកចិញ្ចឹមត្រចៀកកាំប្រមាណ​៣ពាន់ផ្ទះ និងនាំចេញសំបុកក្នុង១ឆ្នាំជាង​១០០តោន

លោកស្រី វ៉ា សូជិន ប្រធានសមាគមអ្នកផលិត និងនាំចេញសំបុកត្រចៀកកាំកម្ពុជា មានប្រសាសន៍ថា បច្ចុប្បន្ននេះកម្ពុជាមានអ្នកចិញ្ចឹមត្រចៀកកាំប្រមាណ ៣ពាន់ផ្ទះនៅទូទាំងប្រទេស ដោយបាននាំចេញ​ផលិតផលសំបុកត្រចៀកកាំប្រមាណជាង១០០តោនក្នុង១ឆ្នាំៗ។

នៅក្នុងអនុស្សារណៈយោគយល់គ្នាមួយស្តីពីការនាំចេញសំបុកត្រចៀកកាំទៅកាន់ទីផ្សារចិនរវាងអគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម និងសមាគមមជ្ឈមណ្ឌលពាណិជកម្មឯកជនកម្ពុជាប្រចាំទីក្រុងសៀមិន ប្រទេសចិននៅ​រសៀលថ្ងៃទី២៧តុលានៅទីស្តីការក្រសួងពាណិជ្ជកម្មលោកស្រី បានបន្តថា សំបុកត្រចៀកកាំដែលនាំចេញ​ភាគច្រើនទៅ​ប្រទេសថៃ និងវៀតណាម។ ចំណែកម៉ាឡេស៊ីមានតិចតួចនិងទៅកាន់ទីផ្សារប្រទេសចិនក៏មិនមានច្រើនដែរ ដោយនាំឆ្លង​កាត់ពីប្រទេសវៀតណាម។

លោកស្រីបានបន្តទៀតថា នៅពេលដែលកម្ពុជា បានចុះកិច្ចព្រមព្រៀងនាំចេញសំបុកត្រចៀក​កាំទៅកាន់ទីផ្សារប្រទេស​ចិននេះ នឹងធ្វើឱ្យអ្នកចិញ្ចឹមសំបុកត្រចៀកកាំកាន់តែមានជំនឿថែមទៀតក្នុងការថែទាំផ្ទះឱ្យបានកាន់តែស្អាត ដើម្បីឱ្យ​ផលិតផល​ដែលចិញ្ចឹមបានស្អាតងាយស្រួលទៅកែកែឆ្នៃនាំចេញ។

លោកស្រីបានបន្ថែមថា ការនាំចេញសំបុកត្រចៀកកាំនេះ ត្រូវការនូដំណើរការចំនួន៣៖ ទី១ការលាងរោមត្រចៀក​កាំសម្រាប់​សម្លាប់មេរោគ ធ្វើឱ្យសំបុកត្រចៀកកាំស្អាតអនាម័យ មានគុណភាពខ្ពស់មិនឆ្លងមេរោគ, ទី២ ការលាង​សម្អាតសំបុក ដែលរើសដោយដៃជាផលិតផលពាក់កណ្តាលសម្រេច និងទី៣ផលិតចេញ​ជាទឹក​ច្រចៀក​កាំដែលជា​ផលិតផលសម្រេច។ ប៉ុន្តែនៅស្រុកខ្មែរមានតែទីពីរទេ គឺទី១និងទី៣មិនមានទេ។

លោកស្រីបានពន្យល់ថា« ភាគច្រើនអ្នកចិញ្ចឹមសំបុកត្រចៀកកាំពេលបានទឹករោមត្រចៀកកាំហើយ គាត់តែងតែយក​ទៅលក់តាមប្រទេសជិតខាង ព្រោះថា នៅស្រុកខ្មែរយើងការដំណើរការផលិតនៅមានកម្រិតនៅឡើយ។ លក់នៅ​ប្រទេសជិតខាងសិនឥឡូវចាប់ផ្តើមពង្រឹងស្តង់ដារអនាម័យឱ្យបានកាន់តែច្រើន ហើយសង្ឃឹមថា នៅឆ្នាំក្រោយ​ផលិតកម្មនៅក្នុងស្រុកយើងកាន់តែកើនអីចឹងកំណើនសេដ្ឋកិច្ចរបស់យើងកាន់តែប្រសើរ»។

លោកស្រី បានណែនាំដល់អ្នកចិញ្ចឹមសំបុកត្រចៀកកាំត្រូវស្វែងយល់បន្ថែមទៀតពីស្តង់ដារ​អនាម័យចំណីអាហារ​ព្រោះថា សំបុកត្រចៀកកាំ គឺសម្រាប់មនុស្សចាស់ និងអ្នកដែលសម្រាលកូនហើយ បើមិនមានអនាម័យ​នឹងធ្វើ​ឱ្យប៉ះពាល់ដល់សុខភាពពួកគាត់។

លោក ឈួន ដារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជារដ្នលេខាធិការក្រសួងពាណិជ្ជកម្មបានមានប្រសាសន៍ថា អនុស្សារណៈនៃការយោគយល់គ្នា ការនាំចេញផលិតផលសំបុកត្រចៀកកាំទៅកាន់ទីផ្សារចិននេះ គឺជាជំហានបើក​ផ្លូវមួយក្នុងការនាំចេញផលិតផលត្រចៀកកាំពីកម្ពុជា ទៅទីផ្សារប្រទេសចិន ដែលនឹងជួយឱ្យអ្នកចិញ្ចឹមត្រចៀក​កាំក្នុងស្រុកកាន់តែមានលទ្ធភាពពង្រីកខ្លួនកាន់តែច្រើនថែមទៀត។

លោកបានបន្តថា បន្ទាប់ពីចុះកិច្ចព្រមព្រៀងនេះទៅការងារដែលនៅសល់គឺអ្នកចិញ្ចឹមសំបុកត្រចៀកកាំ​ត្រូវធ្វើយ៉ាងណារក្សាឱ្យបាននូវគុណភាពផលិតឱ្យបានល្អដើម្បីនាំចេញទៅប្រទេសចិនឱ្យបានរលូន។

លោក ZENG Yo min ប្រធានសមាគមមជ្ឈមណ្ឌលពាណិជកម្មឯកជនកម្ពុជា ប្រចាំទីក្រុងសៀមិននៃប្រទេសចិន​សង្ឃឹមថា តាមរយៈកិច្ចព្រមព្រៀងនេះ នឹងជួយជំរុញសំបុកត្រចៀកកាំទៅទីផ្សារចិន​កាន់តែរលូននិងជោគជ័យទៅ​ថ្ងៃអនាគត។

លោកបានបន្តទៀតថា«យើងក៏សូមស្វាគមន៍ក្រុមហ៊ុន និងអ្នកចិញ្ចឹមសំបុកត្រចៀកកាំកម្ពុជាដើម្បីធ្វើការយ៉ាង​ជិតស្និទ្ធជា​មួយគ្នា ហើយយើងនឹងជំរុញឱ្យមានរោងចក្រដករោមត្រចៀកកាំនៅកម្ពុជា​ដើម្បីផលិតសំបុកត្រចៀកកាំកាន់តែមានគុណ​ភាព​ល្អសម្រាប់នាំចេញទៅទីផ្សារប្រទេសចិននិងប្រជាជនចិន»៕ សំអឿន