ចាប់តាំងពីកើតមានវិបត្តិកូវីដ-១៩ រហូតមកដល់ពេលនេះ វិនិយោគិនចិន ហាក់មិនទាន់មានវត្តមានច្រើននៅឡើយ ចូលមកវិនិយោគនៅកម្ពុជា។

អ្នកសេដ្ឋកិច្ច បានលើកឡើងថា ភាពមិនច្បាស់លាស់នៃសង្រ្គាមរុស្ស៊ី និងអ៊ុយក្រែន អាចបង្កហានិភ័យណាមួយ​កើតឡើង ដូច្នេះរាល់ការវិនិយោគទាំងអស់ ត្រូវរង់ចាំមើលទៅលើសភាពការនៃវិបត្តិទាំងនេះ។

លោកបណ្ឌិត គី សេរីវឌ្ឍន៍ អ្នកជំនាញ​សេដ្ឋកិច្ច​នៃ​រាជបណ្ឌិត្យសភា​កម្ពុជា បានលើកឡើងថា វិបត្តិបង្កឡើងដោយ​មហាអំណាចរុញច្រានគ្នា ធ្វើឱ្យកើតមានភាពមិនច្បាស់លាស់សេដ្ឋកិច្ចសកល។ ហេតុដូច្នេះហើយ ការព្យាករណ៍​អំពីវិនិយោគិនចិន ហូរចូលមកកម្ពុជា ក៏មិនអាចទស្សទាយបានឡើយ។ ប៉ុន្តែលោកបណ្ឌិត គី សេរីវឌ្ឍន៍ បានទាញ​ហេតុផល តាមរយៈទឡ្ហីករណ៍មួយចំនួន ដោយរំពឹងថា ចិននឹងចូលមកវិនិយោគនៅកម្ពុជាឡើងវិញ នាឆ្នាំ ២០២៥​ខាងមុខ។ តាមរយៈទឡ្ហីករណ៍នេះ លោក គី សេរីវឌ្ឍន៍ មើលឃើញថា សង្គ្រាមរុស្ស៊ី និងអ៊ុយក្រែន នឹងមិនអាចអូស​បន្លាយវែងឆ្ងាយទៅមុខទៀតទេ ព្រោះបញ្ហាដែលធ្ងន់ធ្ងរជាងនេះទៀត គឺវិបត្តិនៅអឺរ៉ុប ដែលរងគ្រោះដោយសារ​បាត់បង់ប្រាក់ចំណូល។

លើសពីនេះទៀត មូលហេតុដែលនាំឱ្យចិន បន្តចូលមកវិនិយោគនៅពេលខាងមុខ គឺទាក់ទិននឹងការអភិវឌ្ឍអគារ​ជាប់គាំងនៅខេត្តព្រះសីហនុ។  លោកបណ្ឌិត បានលើកឡើងដូច្នេះថា« អគារច្រើនណាស់ជាទ្រព្យសម្បត្តិរបស់ចិន​ដែលនៅកំពង់សោម ទ្រព្យសម្បត្តិទាំងអស់នេះ គេមិនទុកចោលនោះទេ គេ(ចិន) នឹងស្វែងរកដំណោះស្រាយ ដើម្បីរុញឱ្យអគារទាំងអស់នេះមកប្រើឡើងវិញ ដូច្នេះវិនិយោគចិន នឹងអាចត្រឡប់មកវិញ»។

លោកបណ្ឌិត សង្កត់ធ្ងន់ថា ទំនាក់ទំនងរវាងកម្ពុជា ចិន មិនអាចខ្វះគ្នាបានឡើយ ពិសេសលើការវិនិយោគ។ ការវិនិយោគរបស់ចិន នៅកម្ពុជាមានសារៈសំខាន់ ពោលគឺពលរដ្ឋខ្មែរជាង ១លាននាក់ បម្រើក្នុងវិស័យកាត់ដេរ គឺកើតឡើងពីការវិនិយោគភាគច្រើនរបស់ចិន។ លោកលើកឡើងទៀតថា ពាណិជ្ជកម្មកម្ពុជា ចិន កើនឡើងជិត ១២ពាន់លានដុល្លារ នៅឆ្នាំ ២២០២២ បើទោះជាស្ថិតក្នុងវិបត្តិកូវីដ។

អ្នកសេដ្ឋកិច្ចរូបនេះ បានគូសបញ្ជាក់ថា បច្ចុប្បន្ននេះកម្ពុជា កំពុងមានកំណើន ទោះជាមានវិបត្តិនានាក៏ដោយ ភាពធន់ និងរឹងមាំរបស់កម្ពុជា នៅតែដើរបានក្រោមនយោបាយរបស់រាជរដ្ឋាភិបាល ឆ្លុះបញ្ចាំងតាមរយៈពលរដ្ឋនៅតែមាន​ការងារធ្វើ កំណើនវិនិយោគនៅតែមាន ពោលគឺមានរោងចក្រកើន ១៤៨ ដែលបើកដំណើរការថ្មី ខណៈការបិទមាន​ចំនួនតែជាង ៨០រោងចក្រ ប៉ុណ្ណោះ៕