តម្លៃផ្ទះល្វែងនៅ វៀតណាម ស្ទុះងើបឡើងវិញនៅក្នុងត្រីមាសទី ៣ ឆ្នាំនេះ

តម្លៃផ្ទះល្វែងលើទីផ្សារបឋមនៅក្នុងទីក្រុងហាណូយបានកើនឡើង ១៤ ភាគរយ បើប្រៀបធៀបនឹងឆ្នាំមុន ខណៈនៅទីក្រុងហូជីមិញកើនឡើង ១៥ ភាគរយក្នុងត្រីមាសទី ៣ ហើយអ្នកវិភាគចាត់ទុកថា ការកើនឡើងនេះគឺមកពីមានតម្រូវការខ្ពស់ឡើងវិញសម្រាប់វិស័យលំនៅឋាន ។

ប្រធាននាយកដ្ឋានគ្រប់គ្រងទីផ្សារលំនៅឋាន និងអចលនទ្រព្យរបស់ក្រសួងសំណង់វៀតណាមបាននិយាយថា តម្លៃលក់ផ្ទះល្បែងជាមធ្យមនៅទីក្រុងហាណូយមានចំនួនជិត ៥១ លានដុង ប្រហែល ២,១២៥ ដុល្លារក្នុងមួយម៉ែត្រការ៉េ ។

តម្រូវការនេះ បានបង្ហាញពីសញ្ញានៃការងើបឡើងវិញពីសំណាក់ប្រជាពលរដ្ឋដែលកំពុងស្វែងរកទិញ និងជួលផ្ទះស្នាក់នៅ ដោយកើនឡើងពី ១ ភាគរយដល់ ៦ ភាគរយនៅក្នុងត្រីមាសទី ២ ។

ក្នុងនោះផ្ទះល្វែងដែលមានតម្លៃពី ២ ទៅ ៤ ពាន់លានដុងមានការពេញនិយមជាងគេ ។ ចំណែកនៅទីផ្សារបន្ទាប់បន្សំក្នុងទីក្រុងហាណូយ តម្លៃបានកើនឡើងនៅគ្រប់ស្រុកខណ្ឌទាំងអស់ រួមទាំង ៣ ភាគរយ នៅ Dong Da, Thanh Xuan, Nam Tu Liem, Tay Ho និង Gia Lam ផងដែរ ។

បើយោងតាមរបាយការណ៍ពីក្រុមហ៊ុនប្រឹក្សាអចលនទ្រព្យ Cushman & Wakefield បានឲ្យដឹងថា នៅទីក្រុងហូជីមិញ តម្លៃទីផ្សារបឋមជាមធ្យមនៅតែមិនផ្លាស់ប្តូរពីត្រីមាសទីពីរ ប៉ុន្តែបានកើនឡើង ១៥ ភាគរយ ហើយបើប្រៀបធៀបនឹងឆ្នាំមុន ឡើងដល់ជាង ៦០ លានដុង ប្រហែល ២,៤៤១ ដុល្លារក្នុងមួយម៉ែត្រការ៉េ ខណៈពីមួយឆ្នាំទៅមួយឆ្នាំវិញ តម្លៃអចលនទ្រព្យនៅលើទីផ្សារបន្ទាប់បន្សំបានកើនឡើងជាង ៣ ភាគរយ។

យោងតាមក្រសួងសំណង់វៀតណាមបានឲ្យដឹងថា គម្រោងផ្ទះល្វែងចំនួន ២១ ដែលមានច្រើនជាង ៧,៦០០ យូនីត ត្រូវបានបញ្ចប់នៅក្នុងត្រីមាសទី ៣ ដែលចំនួននេះកើនឡើង ៣ ដងពីត្រីមាសមុន ខណៈគម្រោង ៨៦០ ផ្សេងទៀតដែលមានជិត ៤៥ ម៉ឺនយូនីត កំពុងដំណើរការសាងសង់ ៕

ប្រែសម្រួល៖ នាង រតនៈ

ប្រភព៖​ VN Express