ប្លាស្ទិកមិនមែនជាសំរាម អាចកែច្នៃជាក្ដារបន្ទះ សម្ភារៈផ្ទះបាយ និងវត្ថុអនុស្សាវរីយ៍

ក្រុមហ៊ុនឯកជនមួយ នៃខេត្តព្រះសីហនុ ដើរប្រមូលទិញប្លាស្ទិក និងដបទឹកតាមសហគមន៍ ដើម្បីយកមកកែច្នៃចេញជាក្ដារបន្ទះសម្រាប់ធ្វើជញ្ជាំងផ្ទះ និងសម្ភារៈប្រើប្រាស់ផ្សេងៗទៀត ផ្ដោតសំខាន់តែខេត្តឬតំបន់ដែលនៅជាប់មាត់សមុទ្រ។

អ្នកគ្រប់គ្រងទូទៅនៃក្រុមហ៊ុនកែច្នៃសំរាម តុនតូតុន ខេត្តព្រះសីហនុ កញ្ញា សាយ លឹមជូរ បានប្រាប់់ឱ្យកម្ពុជាថ្មីដឹងថា ក្រុមហ៊ុនបានបង្កើតឡើងតាំងពីឆ្នាំ ២០២១ មានទីតាំងស្ថិតនៅខេត្តព្រះសីហនុ ដោយប្រមូល​ទិញ​ប្លាស្ទិកពីប្រជាពលរដ្ឋក្នុង​សហគមន៍យកមកកែច្នៃជាក្តារបន្ទះ និងសម្ភារៈប្រើប្រាស់ផ្សេងៗលក់ចេញទៅកាន់ទីផ្សារវិញ។

មូលហេតុដែលក្រុមហ៊ុនជ្រើសរើសខេត្តព្រះសីហនុជាគោលដៅចម្បង ក៏ព្រោះតែខេត្តនេះជាតំបន់ជាប់មាត់សមុទ្រ និងជាតំបន់ដែលងាយរងការបំផ្លាញបរិស្ថាន ពិសេសគឺការបំពុលទឹក ទើបក្រុមហ៊ុនចង់​ចូលរួមជាមួយរដ្ឋាភិបាលក្នុងការការពារបរិស្ថានតំបន់ដែលជាប់មាត់សមុទ្រ តាមរយៈ​ការ​កែច្នៃសំរាមប្លាស្ទិកដែលប្រមូលទិញពីសហគមន៍ជា​សម្ភារៈប្រើប្រាស់ផ្សេងៗ។

បើតាម​កញ្ញា សាយ លឹមជូរ ក្រុមហ៊ុន​មានម៉ាស៊ីនសម្រាប់កែច្នៃសំរាមនិងប្លាស្ទិក ឱ្យចេញទៅជាសម្ភារៈប្រើប្រាស់ក្នុងគេហដ្ឋាន ក្នុងនោះមាន៖ ក្តារបន្ទះ តុ កៅអី ថូផ្កា និង វត្ថុអនុស្សាវរីយ៍ផ្សេងៗទៀត ដែលកើតចេញពីសំរាមប្លាស្ទិករបស់ប្រជាពលរដ្ឋក្នុងសហគមន៍ក្នុងខេត្តព្រះសីហនុតែម្ដង។

កញ្ញា សាយ លឹមជូរ បានបញ្ជាក់ថា គោលដៅថ្ងៃអនាគត ក្រុមហ៊ុន​​នឹងធ្វើការជាមួយសហគមន៍ដើម្បីពន្យល់ណែនាំពលរដ្ឋ​កុំ​ឲ្យ​បោះចោលសំរាម ឬប្លាស្ទិក ចូលទៅក្នុងទឹកសមុទ្រ ដែលនាំឱ្យជាការបំពុលទឹកនិងធ្វើឱ្យខូចបរិស្ថាន៕

អត្ថបទ ៖ សួស សិត