និយ័តករបរធនបាលកិច្ចផ្តល់អាជ្ញាបណ្ណជាផ្លូវការដល់ធនាគារប្រៃសណីយ៍

ភ្នំពេញ៖ធនាគារប្រៃសណីយ៍កម្ពុជាបានក្លាយជាធនាគារពាណិជ្ជទី១៧ដែលទទួលបានអាជ្ញាបណ្ណពីនិយ័តករបរធនបាលកិច្ច (ន.ប.ធ.)ក្នុងការ​ផ្តល់សេវារក្សាសុវត្ថិភាពឬសេវារក្សាទុក(Escrow Service) ក្នុងវិស័យបរធុនបាលកិច្ចសម្រាប់ប្រតិបត្តិការបរធនបាលកិច្ចពាណិជ្ជកម្មនៅកម្ពុជា។

យោងតាមសេចក្តីជូនដំណឹងពីនិយ័តករបរធនបាលកិច្ច បានជូនដំណឹងដល់បរធនបាល​ទាយក ឬអ្នកផ្តល់វិភាគទានបរធនបាលកិច្ច បរធនបាល បុគ្គលផ្តល់សេវាពាក់ព័​ន្ធក្នុងវិស័យបរធនបាលកិច្ច និងសាធារណជនទាំងអស់ថា ធនាគារប្រៃសណីយ៍កម្ពុជាទទួលបានអាជ្ញាបណ្ណពីនិយ័តករបរធនបាលកិច្ចជាប្រតិបត្តិករបរធនបាលផ្តល់សេវារក្សាសុវត្ថិភាពឬសេវារក្សាទុក(Escrow Service) ក្នុងវិស័យបរធុនបាលកិច្ចសម្រាប់ប្រតិបត្តិការបរធនបាលកិច្ចពាណិជ្ជកម្ម ដោយបានបំពេញតាមលក្ខខណ្ឌតម្រូវគ្រប់គ្រាន់តាមច្បាប់ និងបទប្បញ្ញត្តិពាក់ព័ន្ធជាធរមាន។

«បរធនបាលទាយកឬអ្នកផ្តល់វិភាគទានបរធនបាលកិច្ច បរធនបាល បុគ្គលផ្តល់សេវាពាក់ព័ន្ធក្នុងវិស័យបរធនបាលកិច្ច និងសាធារណជនទាំងអស់ ដែលមានបំណងប្រើប្រាស់សេវារក្សាទុកសុវត្ថិភាព ឬសេវារក្សាទុកក្នុងវិស័យបរធនបាលកិច្ចសម្រាប់ប្រតិបត្តិការបរធនបាលកិច្ចពាណិជ្ជកម្ម អាចទំនាក់ទំនងទៅកាន់ធនាគារប្រៃសណីយ៍កម្ពុជា»។ នេះបើយោងតាមសេចក្តីជូនដំណឹងនេះ។

 លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជាបានថ្លែងប្រាប់កម្ពុជាថ្មីថា ដោយមើលឃើញអំពីកំណើននៃតម្រូវការរបស់អតិថិជនលើសេវាបរធនបាលកិច្ចនេះ ទើបធនាគាររបស់លោកបានដាក់ពាក្យស្នើសុំអាជ្ញាបណ្ណនេះ។

លោកបានថ្លែងថា៖«កាលពីមុនយើងមិនចង់ស្នើសុំអាជ្ញាបណ្ណនេះទេ ប៉ុន្តែបច្ចុប្បន្ននេះយើងទទួលបានការសួរនាំច្រើនអំពីសេវាកម្មនេះ ដោយសារតែអតិថិជនមានទំនុកចិត្តរវាងគ្នានិងគ្នានៅពេលដែលគេទិញអចលនទ្រព្យដូច្នេះធនាគារដែលមានអាជ្ញាបណ្ណនេះដើរតួជាអ្នកធានា»។

លោកសុខ ដារ៉ា អគ្គនាយក​នៃនិយ័តករ​បរធនបាលកិច្ច ធ្លាប់បានលើកឡើងក្នុងសិក្ខាសាលា​មួយ​កន្លង​មកថា វិស័យនេះ បាននិងកំពុងចូលរួមអភិវឌ្ឍដំណើរ​ការសេដ្ឋកិច្ចកម្ពុជា លើបីចំណុចសំខាន់ៗ ទី១ បង្កើត និងបង្កើន ក៏ដូចជាទាក់ទាញទំនុកចិត្តពីអ្នកវិនិយោគ ពិសេស​វិនិយោគិនបរទេស, ទី២ យន្តការរបស់បរធនបាលកិច្ច ជាយន្តការតាមដានត្រួតពិនិត្យអនុលោមភាពតាមច្បាប់ ក៏ដូចជាបញ្ចៀសហានិភ័យប្រតិបត្តិការលំហូរមូលធនពីវិស័យពាក់ព័ន្ធនានា, និងទី៣ យន្តការនេះ មានភាពទន់ភ្លន់ បទបែន និងមានប្រសិទ្ធភាពអនុវត្ត ដែលអាចអនុញ្ញាតឱ្យវិនិយោគិនបរទេសមានការជ្រើសរើសប្រកបដោយទំនុកចិត្ត។

លោក សុខ ដារ៉ា មានសុទិដ្ឋិនិយមថា វិស័យបរធនបាលកិច្ច មានអត្រាកំណើនខ្ពស់ និងបានកើនឡើងក្នុងរយៈពេល​ដ៏ខ្លី។​ លោក លើកឡើងថា កត្តាដែលជួយឱ្យវិស័យបរធនបាលកិច្ចរីកចម្រើនលឿនក្នុងរយៈពេលដ៏ខ្លី រួមមាន កត្តាស្ថានភាពកម្ពុជាទាំងមូល មានសន្តិភាព ស្ថេរ​ភាព​នយោបាយ ស្ថេរភាពសេដ្ឋកិច្ច និងទំនុកចិត្តពីបរទេស ​។ ​

​សូមបញ្ជាក់ថា បរធនបាលកិច្ច គឺជាសេវាហិរញ្ញវត្ថុមួយមិនមែនធនាគារ មានតួនាទីគ្រប់គ្រង មើលថែរក្សា ឬចាត់ចែក​ទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុង​អនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។ បរធនបាលកិច្ចនេះ ជាវិស័យមួយ​ដែលជួយដល់ការ​អភិវឌ្ឍវិស័យពាណិជ្ជកម្ម និងសង្គមជាតិ តាមរយៈការទាក់ទាញនូវមូលនិធិសង្គមនានា និង​លំហូរទុនវិនិយោគទាំងក្នុង និងក្រៅប្រទេស៕