ការនាំចេញផ្លែមៀនស្រស់កម្ពុជា សម្រេចបានជាង ១ ម៉ឺន ៤ ពាន់តោន មានកំណើន ១២០%

ការនាំចេញផ្លែមៀនស្រស់របស់កម្ពុជាទៅទីផ្សារអន្តរជាតិ សម្រេចបានជាង ១ ម៉ឺន ៤ ពាន់តោន នៅក្នុងឆមាសទី០១ ឆ្នាំ ២០២៤ កើនឡើងជាង ១២០ ភាគរយ បើធៀបនឹងរយៈ​ពេលដូច​គ្នា​កាល​​ពីឆ្នាំមុន។ នេះបើយោងតាមរបាយការណ៍របស់​ក្រសួងកសិកម្ម រុក្ខាប្រមាញ់ និងនេ​សាទ​។

លោក​ សួន ជុំ អនុប្រធានសមាគមមៀនប៉ៃលិនប្រាប់កម្ពុជាថ្មីថា មៀនបានចេញផ្លែហើយ ដែលគ្រោងនឹងប្រមូលផលនៅខែសីហាខាងមុខ ខណៈមានក្រុមហ៊ុនមួយចំនួនបានចុះកិច្ចសន្យា​ទិញ​បណ្ដើៗហើយ។ ហើយថា នៅឆ្នាំនេះ ​តម្លៃផ្លែមៀននឹងមានភាពល្អប្រសើរដូចឆ្នាំមុន​ដែរ ដែល​មានតម្លៃចាប់ពី ៤ ០០០ រៀលឡើងក្នុងមួយគីឡូក្រាម។​

បើគិតត្រឹម ៥ ខែ ឆ្នាំ ២០២៤នេះ កម្ពុជាបានធ្វើការនាំចេញផ្លែមៀនប៉ៃលិនក្នុងទំហំទឹកប្រាក់ ២២ លានដុល្លារ ការកើនឡើង ១៣២ ​ភាគរយ ​បើធៀបនឹងរយៈពេលដូចគ្នាកាលពីឆ្នាំមុន។ នេះ​បើ​យោងតាមរបាយការណ៍របស់អគ្គនាយកដ្ឋានគយ ​និងរដ្ឋាករកម្ពុជា។​

នៅក្នុងឆ្នាំ២០២៣ កម្ពុជាបាននាំចេញផ្លែមៀន​ស្រស់​មានបរិមាណសរុបជាង ១៧ ៤៩៧ តោន កើនឡើងជាង ៤៥៤ ភាគរយ ប្រៀបធៀបឆ្នាំ ២០២២ គិតជាទឹកប្រាក់សរុបចំនួន ២៤,៧៥ ​លានដុល្លារ។ នេះបើតាមក្រសួងកសិកម្ម។

​ក្នុងនោះ​ការនាំ​ចេញទៅ​ប្រទេស​ចិន​មានចំនួន​ ១៧ ៣៨០,៧០ ​តោន ទទួលបាន​ទឹកប្រាក់​ចំនួន ២៤ ៥៩៣ ៦៩០,៥០​ ដុល្លារ​ និង​ប្រទេស​វៀតណាម​ចំនួន ១១៦,៦៩ ​តោន​ទទួលបាន​ទឹកប្រាក់​ចំនួន ១៦៥១១៦,៣៥​ ដុល្លារ៕ ​

អត្ថបទ៖ ឡេង ដេត