មជ្ឈមណ្ឌលភស្តុភារកម្មក្រុងព្រះសីហនុនឹងលេចជារូបរាងឡើងឆាប់ៗ ខណៈ​ការសិក្សា​ជិតបញ្ចប់

ស្របពេលដែលរាជរដ្ឋាភិបាលកំពុងរៀបចំផែនការមេ ដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេស​ពហុបំណង មន្រ្តីជំនាញ រួមទាំងវិស័យឯកជនកំពុងចាប់ដៃគ្នាក្នុង ការពន្លឿនការសិក្សានៃការបង្កើត​មជ្ឈមណ្ឌលភស្តុភារកម្មក្រុងព្រះសីហនុ (SHLC) ដែលរំពឹងថានឹងបញ្ចប់ឆាប់ៗ សំដៅរួមចំណែក​ដល់ការគាំទ្រលើវិស័យដឹកជញ្ជូន​ និងភស្តុភារកម្ម​នៃខេត្តតំបន់ឆ្នេរដ៏មានសក្តានុពល​មួយនេះ។

កាលពីថ្ងៃទី ៦ ខែសីហា ឆ្នាំ២០២៤ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្តុភារកម្ម(ក.ជ.ភ.) បាន​ដឹកនាំកិច្ចប្រជុំ ក.ជ.ភ. លើកទី២ អាណត្តិទី៧ ​ផ្តោតលើ​ វឌ្ឍនភាពការអនុវត្តផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្ម ២០២៣-២០៣០ (CITLS);  វឌ្ឍនភាពការសិក្សាសមិទ្ធិលទ្ធភាពគម្រោងមជ្ឈមណ្ឌលភស្តុភារកម្មភ្នំពេញ (PPLC) និង   វឌ្ឍនភាពការសិក្សាសមិទ្ធិលទ្ធភាពគម្រោងមជ្ឈមណ្ឌលភស្តុភារកម្មក្រុងព្រះសីហនុ (SHLC)។

លោក ស៊ិន ចន្ធី ប្រធានសមាគមភស្តុភារកម្មកម្ពុជាដែលលោកក៏បានចូលរួមក្នុងកិច្ចប្រជុំផងដែរនោះបានថ្លែងប្រាប់កម្ពុជាថ្មីនៅថ្ងៃទី៨ ខែសីហាថាសម្រាប់ក្រុមប្រឹក្សាជាតិភស្តុភារកម្មក​ម្ពុជា​​បានប្រជុំ២ដងរួចមកហើយសម្រាប់ឆ្នាំនេះ ដែលហៅថាមជ្ឈមណ្ឌលភស្តុភារកម្មកម្ពុជា​សម្រាប់ជាកន្លែងរៀបចំទំនិញចេញនិងចូលដើម្បីជៀសវាការកកស្ទះនៅកំពង់ផែរបស់យើង។

លោកបានបញ្ចាក់ថា ទាក់ទងនឹងការរៀបចំនេះ​ក្រុមហ៊ុន HYC និងក្រុមហ៊ុនបុត្រសម្ព័ន្ធបាន​ចូលរួម​កមកធ្វើការសិក្សាលើបញ្ហានេះ ហើយការសិក្សានេះក៏យើងបានទទួលផល​ច្រើនដែរ​ហើយ ខណៈដែរតំបន់មួយចំនួនទៀតកំពុងសិក្សាទាំងនៅភ្នំពេញ ខេត្តព្រះសីហនុ និងកំពតផងដែរ។

លោកបានថ្លែងបន្តទៀតថា៖«មកទាល់ពេលនេះយើងមិនទាន់ដឹងថានឹងបញ្ចប់​នៅ​ពេលណា នោះទេ ប៉ុន្តែតាមអ្វីដែលយើងបានចូលរួមប្រជុំពិគ្រោះយោបល់កន្លង​មកគឺ​រដ្ឋាភិបាលនឹង ជំរុញឱ្យបានឆាប់ដោយសារតែប្រទេសកម្ពុជាយើងត្រូវការខ្លាំង ហើយរាជ​រដ្ឋាភិបាល​ក៏កំពុង តែយកចិត្តទុកដាក់ខ្លាំងទាក់ទងនឹងការដឹកជញ្ជូននិងឡូជីស្ទីក នេះដូចដែរ​យើងបានឃើញ អំពីការប្រកាសបើកការរដ្ឋានព្រែកជីកហ្វុណនតេជោកាលពីពេលថ្មីៗនេះជាដើម»។

វឌ្ឍនៈភាពថ្មីនៃទឹកដីតំបន់ឆ្នេរ

ឡុង ឌីម៉ង់ អភិបាលខេត្តរងនៃខេត្តព្រះសីហនុ ក៏បានថ្លែងមកកាន់កម្ពុជាថ្មីនៅថ្ងៃទី៨ ខែសីហានេះដែទាក់ទងទៅនឹងការរៀបចំរបស់រាជរដ្ឋាភិបាលនៃការសាងសង់​តំបន់​ភស្តុភារ​កម្ម ព្រះសីហនុនេះគឺរដ្ឋាភិបាលបានដៅទុកហើយគឺនៅស្រុកស្ទឹងហាវជាទីកន្លែងដែលនឹងយកមកសាងសង់មជ្ឈមណ្ឌលភស្តុរភារកម្មខេត្តព្រះសីហនុនេះ​ ព្រោះថាវានឹងដើរស្របទៅនឹង​ការប្រែក្លាយខេត្តព្រះសីហនុទៅជាទិសដៅសេដ្ឋកិច្ចពហុបំណង។

លោកបានថ្លែងបញ្ចាក់ថា៖« ដូច្នេះការកសាងនូវមជ្ឈមណ្ឌលភស្តុរភារកម្មគឺ​ជារឿងមួយដ៏​សំខាន់ខ្លាំងណាស់ក្នុងការគាំទ្រទៅដល់គោលនយោបាយនៃការកែប្រែខេត្តទៅជាប៉ូលសេដ្ឋកិច្ចពហុបំណងគមិនត្រឹមតែបម្រើទៅដល់សេដ្ឋកិច្ចខេត្តប៉ុណ្ណោះទេ​ប៉ុន្តែវាពិតជា​មានសារៈសំខាន់​ក្នុ​​​ងការជំរុញកំណើនសេដ្ឋកិច្ចជាតិ»។

ការចូលរួមរបស់វិស័យឯកជន

កាលពីថ្ងៃទី១៩ ខែមិថុនា ឆ្នាំ២០២៤ក្រុមហ៊ុនក្រុមហ៊ុន PPLC Super​port & Industrial Co.,LTD​ (PPLCSI) របស់កម្ពុជា និងវិទ្យាស្ថានបណ្តុះបណ្តាលខ្សែច្រវាក់ផ្គត់ផ្គង់ និងភស្តុភាកម្មសិង្ហបុរី (Supply Chain And Logistics Academy-SCALA)ក៏បានចុះហត្ថលេខាលើអនុស្សារណៈនៃការយោគយល់គ្នាដើម្បីបង្កើនកិច្ចសហប្រតិបត្តិការក្នុងការអភិវឌ្ឍ ផ្នែកខ្សែច្រវាក់ផ្គត់ផ្គង់ និងឡូជីស្ទីកកម្ពុជា។ ​

​ជាមួយគ្នានេះដែរ កាលពីថ្ងៃទី​១៦ ខែកុម្ភៈឆ្នាំ២០២៣ សាជីវកម្ម​ហិរញ្ញវត្ថុ​អន្តរ​ជាតិ (IFC)​បាន​ចុះ​កិច្ច​ព្រម​ព្រៀង​ភាពជា​ដៃគូ​ជាមួយ​ក្រុមហ៊ុន PPLCSI ​ សម្រាប់​ការ​អភិវឌ្ឍ​មជ្ឈមណ្ឌល​ឡូជីស្ទីក​ភ្នំពេញ (PPLC) ​ ដែល​ជា​ការ​បណ្តាក់​ទុន​រួម​គ្នា​រវាង​ក្រុមហ៊ុន​ភស្តុភារ​ឈាន​មុខ​គេ​នៅ​អាស៊ី YCH Group និង​ក្រុមហ៊ុន​ផ្តល់​សេវា​កម្ម​ភស្តុភារ​ធំ​ជាង​គេ​របស់​កម្ពុជា​គឺ WorldBridge Group។

យោង​តាម​ក្រុមហ៊ុន IFC ទីតាំង​យុទ្ធសាស្ត្រ​របស់ SuperPortTM​នៅ​រាជធានី​ភ្នំពេញ ជា​ចំណុច​កណ្តាល​នៃ​ប្រទេស និង​ជា​មជ្ឈមណ្ឌល​សេដ្ឋកិច្ច​របស់​ខ្លួន ជាមួយ​នឹង​ការ​តភ្ជាប់​ទៅ​កាន់​គ្រប់​មធ្យោ​បាយ​នៃ​ការ​ដឹក​ជញ្ជូន នឹង​អាច​ឱ្យ​ SuperPortTM ក្លាយ​ជា​កន្លែង​ដឹក​ជញ្ជូន​    ពហុ​ទម្រង់​ពេញ​លេញ​ដំបូង​បង្អស់​របស់​ប្រទេស​កម្ពុជា​។​

កាលពីថ្ងៃទី២៧ ខែកក្កដា ឆ្នាំ២០២០ រាជរដ្ឋាភិបាលកម្ពុជាបានចេញអនុក្រឹត្យ​ស្តីពីការ​រៀបចំ និងការ​ប្រព្រឹត្តទៅនៃគណៈកម្មាធិការសម្របសម្រួលអន្តរក្រសួងរៀបចំផែនការមេ ដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេស​ពហុបំណង ដោយមានសមាសភាពនិងរចនាសម្ព័ន្ធ​មាន​ប្រធាន ១ រូប អនុប្រធាន ៣ រូប និងសមាជិក ២១ រូប ជាតំណាងមកពីក្រសួងស្ថាប័នពាក់ព័ន្ធនានា។

ភស្តុភារ​គឺជា​វិស័យ​សំខាន់​មួយ​សម្រាប់​កម្ពុជា​ក្នុងការ​សម្រេចបាន​នូវ​គោលដៅ​របស់ខ្លួន​ក្នុងការ​ក្លាយជា​ប្រទេស​ដែលមាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០​និង​ជា​ប្រទេស​ដែលមាន​ប្រាក់ចំណូល​ខ្ពស់​នៅ​ឆ្នាំ ២០៥០​៕