សេដ្ឋកិច្ច

ក្រុមហ៊ុនចិនមកពីខេត្ត Jiangsu ស្វែងរកឱកាសវិនិយោគនៅកម្ពុជា

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅព្រឹកថ្ងៃទី១៣ ខែសីហា ឆ្នាំ២០២៤ បានទទួលជួបពិភាក្សាការងារជាមួយគណៈប្រតិភូចិនដឹកនាំដោយលោក Jiang Xin អគ្គនាយករងទទួលបន្ទុកផ្នែកពាណិជ្ជកម្មនៃ ខេត្តJiangsu ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា វុទ្ធី បានកត់សម្គាល់ពី គម្រោងតំបន់សេដ្ឋកិច្ចពិសេសក្រុងព្រះសីហនុ ដែលត្រូវបានបង្កើតឡើងដោយក្រុមហ៊ុន Sihanoukville Special Economic Zone Co., Ltd. ដែលជាក្រុមហ៊ុនសហប្រតិបត្តិការរួមគ្នារវាងក្រុមហ៊ុន Cambodia International Investment Development Group Co., Ltd. (CIIDG) និងក្រុមហ៊ុន Jiangsu Taihu Cambodia International Economic Cooperation Investment Co., Ltd. លើផ្ទៃដីទំហំ ១.១១៣ ហិកតា នៅខេត្ដព្រះសីហនុដែលទទួលគោលការណ៍អនុញ្ញាតពីក្រុមប្រឹក្សាអភិវឌ្ឍន៍កម្ពុជាតាំង២០០៨។

បច្ចុប្បន្ន តំបន់សេដ្ឋកិច្ចពិសេសនេះជិតនឹងបញ្ចប់ដំណាក់កាលទី១។ ជារួមតំបន់សេដ្ឋកិច្ចពិសេសនេះ បានស្រូបទាញការវិនិយោគមកពីខេត្ត Jiangsu។

លោក Jiang Xin ប្រធានគណៈប្រតិភូ បានថ្លែងអំណរគុណដល់ថ្នាក់ដឹកនាំ ក្រុមប្រឹក្សាអភិវឌ្ឍន៍កម្ពុជា ដែលបានផ្តល់នូវព័ត៌មានពាក់ព័ន្ធនឹងបរិយាកាស វិនិយោគនៅកម្ពុជា, ព័ត៌មានស្តីពីបច្ចុប្បន្នភាពនៃកិច្ចសហប្រតិបត្តិការរវាងប្រទេសទាំងពីរ កម្ពុជា-ចិន ក្នុងវិស័យសេដ្ឋកិច្ច និងព័ត៌មានស្តីពីបច្ចុប្បន្នភាពនៃតំបន់សេដ្ឋកិច្ចពិសេស ខេត្តព្រះសីហនុដែលជាការចូលរួមវិនិយោគរបស់វិនិយោគិនមកពីខេត្តJiangsu។ គណៈប្រតិភូក៏បានធ្វើការកត់សម្គាល់ពីការរីកចម្រើនយ៉ាងឆាប់រហ័សរបស់កម្ពុជា ក្នុងរយៈពេលប៉ុន្មានឆ្នាំចុងក្រោយនេះ។

គោលបំណងចម្បងនៃការជួបពិភាក្សានាពេលនេះគឺដើម្បី ស្វែងរកកិច្ចសហប្រតិបត្តិការបន្ថែមរវាងក្រុមប្រឹក្សាអភិវឌ្ឍន៍កម្ពុជា និងខេត្ត Jiangsu ប្រទេសចិន សំដៅជំរុញការវិនិយោគ និងពាណិជ្ជកម្ម។

នៅក្នុងឆមាសទី១ ឆ្នាំ ២០២៤ ការវិនិយោគរបស់ប្រទេសចិននៅកម្ពុជាមានទំហំទឹកប្រាក់ ១,៣៨ ពាន់លានដុល្លារ ស្មើនឹង ៤២,៦% នៃការវិនិយោគសរុប៕