Amru Rice ចាប់ដៃជាមួយក្រុមហ៊ុនអូស្ត្រាលីបង្កើតរោងចក្រផលិតចំណីសត្វនៅកម្ពុជា

ក្រុមហ៊ុនក្នុងស្រុក Amru Rice (Cambodia) និង ក្រុមហ៊ុនដ៏ធំមួយរបស់ប្រទេសអូស្រ្តាលីគឺក្រុមហ៊ុន 4 Season បានចុះអនុស្សរណៈយោគយល់គ្នា (MoU) ក្នុងការបង្កើតរោងចក្រផលិតចំណីសត្វនៅកម្ពុជា សំដៅចូលរួមចំណែកដល់ការចិញ្ចឹមសត្វ និងដើម្បីពង្រីកទីផ្សារនេះឱ្យកាន់តែធំ។

លោក សុង សារ៉ន ប្រធានអគ្គនាយករបស់ក្រុមហ៊ុន Amru Rice​ បានលើកឡើងថា ការសម្រេចបាននូវ MoUនេះ ធ្វើឡើងកាលពីថ្ងៃទី២៧ខែសីហា ក្នុងឪកាសដែលលោកបានដឹកនាំក្រុមការងារទៅបំពេញទស្សនកិច្ចនៅបណ្តាក្រុមហ៊ុនធំៗរបស់ប្រទេសអូស្ត្រាលី។

លោកបានលើកឡើងថា ៖«យើងបានសម្រេចបាននូវការចុះហត្ថលេខាលើអនុស្សរណៈនៃការយោគយល់គ្នាជាមួយក្រុមហ៊ុន 4 Season ដើម្បីបង្កើតរោងចក្រផលិតចំណីសត្វនៅកម្ពុជា»។ ​

លោកថា៖«នេះជាសមិទ្ធិផលថ្មីមួយទៀត បន្ទាប់ពីបានចូលរួមកិច្ចប្រជុំកំពូលពិសេសអូស្ត្រាលី-អាស៊ាន ឆ្នាំ២០២៤ កាលពីខែមិនា នៅទីក្រុងមែលប៊ន។ យើងត្រូវការរោងចក្រផលិត​ចំណី​បន្ថែមទៀត ដើម្បីប្រើប្រាស់ខ្សែសង្វាក់តម្លៃបន្ថែមនៃអនុផលស្រូវអង្ករ»។ លោកបានថ្លែងបន្តទៀតថា ថ្នាក់ដឹកនាំរបស់ក្រុមហ៊ុន 4 Season នឹងមកបំពេញទស្សនកិច្ចនៅកម្ពុជា នៅថ្ងៃទី ៩និង ទី១០ ខែកញ្ញាខាងមុខដើម្បីពិភាក្សាលម្អិតលើគម្រោងវិនិយោគមួយនេះ។

កាលពីថ្ងៃទី៥ខែមិនាកន្លងទៅ លោក សុង សារ៉ន ​ក៏បានចូលរួមអមដំណើរសម្តេចធិបតី ហ៊ុន ម៉ាណែត នាយករដ្ឋមន្រ្តីនៃប្រទេសកម្ពុជាទៅកាន់ប្រទេសអូស្ត្រាលីផងដែរ។  លោកសារ៉ន បាន​ជួបប្រជុំ​ដោយផ្ទាល់​ជាមួយ​អគ្គនាយក​ក្រុមហ៊ុន SunRice Group ​ពិភាក្សាលើការនាំចេញ។​​ លុះនៅចុងខែមិថុនា ឆ្នាំ២០២៤​ ក្រុមហ៊ុនលោក​បាននាំចេញអង្ករក្រអូបប្រណិត​ផ្គត់ផ្គង់ដល់ក្រុមហ៊ុ SunRice ចំនួន១០០០តោន​ដែលដាក់ភ្ជាប់នូវយីហោ SunRice  និងក៏គ្រោងនឹងបង្កើនបរិមាណនៃការនាំចេញនាខែតុលាខាងមុខនេះផងដែរ។

បើយោងតាមមន្ត្រីជាន់ខ្ពស់ក្រសួងពាណិជ្ជកម្មបានឱ្យដឹងកាលពីពេលកន្លងមកថា បច្ចុប្បន្ន ក្រុមហ៊ុនស៊ី.ភី.បានផលិតចំណីសត្វបានប្រមាណ ២៧ លានតោនសម្រាប់ផ្គត់ផ្គង់ក្នុងប្រទេស និងនាំចេញទៅក្រៅប្រទេស។ ជាមួយគ្នានេះដែរក្រុមហ៊ុនក៏បានមានការប្រមូលទិញវត្ថុធាតុដើមដូចជា ពោត និងដំឡូងមីពីប្រជាកសិករនៅតាមខេត្តបាត់ដំបង ប៉ៃលិន និងខេត្តបន្ទាយមានជ័យ  ចំនួនប្រមាណ​២០០.០០០​តោនក្នុង១ឆ្នាំ ដើម្បីកែច្នៃធ្វើជាចំណីសត្វ និងផលិតចំណីសត្វ​៕