ព័ត៌មានអន្ដរជាតិ

ឥណ្ឌូណេស៊ីទាញការវិនិយោគជាង ៥០ លានដុល្លារ ពីវេទិកាវិនិយោគទេសចរណ៍អន្តរជាតិឆ្នាំ ២០២៤

បានផុស

៣ សប្តាហ៍ មុន

នៅ

ថ្ងៃពុធ ៤ កញ្ញា ២០២៤

ដោយ

រដ្ឋាភិបាលឥណ្ឌូណេស៊ីបានប្រកាសកាលពីថ្ងៃចន្ទដើមសប្ដាហ៍នេះថា ប្រទេសឥណ្ឌូនេស៊ីបានទាក់ទាញកិច្ចព្រមព្រៀងវិនិយោគដ៏មានសក្តានុពលតម្លៃប្រហែល ៥២,៩ លានដុល្លារ ពីក្នុងឯវេទិកាវិនិយោគទេសចរណ៍អន្តរជាតិឆ្នាំ ២០២៤ (ITIF)។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្ត្រីជាន់ខ្ពស់របស់ក្រសួងទេសចរណ៍ឥណ្ឌូណេស៊ី លោកស្រី Nia Niscaya វេទិកាទេសចរណ៍ដែលរៀបចំឡើងកាលពីខែមិថុនា មានអ្នកចូលរួមចំនួន ៧៥០ នាក់ មកពី ២៩ ប្រទេស។ វេទិកានេះ ក៏មានអ្នកវិនិយោគសក្តានុពលចំនួន ៤៤៥ នាក់ ចូលរួមផងដែរ។

លោកស្រី Nia បានប្រាប់អ្នកយកព័ត៌មានយ៉ាងដូច្នេះថា៖ «ការវិនិយោគសក្តានុពល មានទំហំប្រហែល ៥២,៩ លានដុល្លារ»។

គួរគូសបញ្ជាក់ថា ការទាក់ទាញវិនិយោគិនឱ្យរួមចំណែកក្នុងការអភិវឌ្ឍវិស័យទេសចរណ៍ គឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលឥណ្ឌូណេស៊ី ក្នុងការជំរុញវិស័យដែលសំខាន់សម្រាប់កំណើនសេដ្ឋកិច្ចមួយនេះ។

ក្នុងរយៈពេល ៨ ខែដើមឆ្នាំ ២០២៤ នេះ ឥណ្ឌូណេស៊ីបានទទួលស្វាគមភ្ញៀវទេសចរអន្តរជាតិប្រមាណ ១៣ លាន ខណៈរដ្ឋាភិបាលដាក់គោលដៅទាក់ទាញភ្ញៀវឱ្យបាន ១៧ លាននាក់ ពេញមួយឆ្នាំ ដោយ ៧ លាននាក់ក្នុងនោះ រំពឹងទៅលេងកោះបាលី៕