រដ្ឋមន្ត្រី៖ កម្ពុជាបើកចំហរអ្នកវិនិយោគ ដាក់ទុនលើការកែច្នៃកសិផល ស្រូវ-អង្ករ ស្វាយចន្ទី

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ​កម្ពុជាបើកចំហរ និងស្វាគមន៍អ្នកវិនិយោគមកបោះទុនលើការកែច្នៃកសិផលដូចជា ស្រូវ អង្ករ ស្វាយ ស្វាយចន្ទី សំបុក​ត្រចៀកកាំ។

លោករដ្ឋមន្ត្រីក្រសួងកសិកម្ម បានលើកឡើងនៅក្នុងជំនួបរវាង លោក វ៉ាង​ វិនប៊ិន (Wang Wenbin) ឯកអគ្គរដ្ឋទូតចិនប្រចាំកម្ពុជានៅថ្ងៃទី ០៤ ខែកញ្ញា ឆ្នាំ ២០២៤។

លោករដ្ឋមន្ត្រីបានជំរុញកិច្ចសហប្រតិបត្តិការ «ត្បូងពេជ្រ» ដោយផ្តោតសំខាន់លើវិស័យចំនួន៦ ក្នុងនោះក៏​​មានវិស័យកសិកម្មតាមរយៈច្រកមច្ឆា និងអង្ករ សម្រាប់ការអភិវឌ្ឍកសិកម្មរវាង​ប្រទេស​ទាំង​ពីរឱ្យទទួលបាននូវប្រសិទ្ធភាព និងមានលទ្ធផលផ្លែផ្កា។

លោក ឌិត ទីណាបញ្ជាក់ថា៖ «កម្ពុជាបើកចំហរ និងស្វាគមន៍អ្នកវិនិយោគមក​លើការកែច្នៃ​កសិផល​​កម្ពុជាដូចជា ស្រូវអង្ករ ស្វាយ ស្វាយចន្ទី សំបុកត្រចៀកកាំ ដែលមានគុណភាព​ល្អប្រ​ណីត មានរសជាតិឆ្ងាញ់ ដែលអ្នកវិនិយោគចិនអាចពិចារណាវិនិយោគនៅកម្ពុជា»។

តា​ម​រយៈ​ការ​វិនិ​យោគនៅកម្ពុជាដោយផ្ទាល់ អ្នកវិនិយោគនឹងទទួលបានផលចំណេញ​ទាំងនៅ​លើ​ទី​​ផ្សារចិន និង​​ទីផ្សារអន្តរជាតិ​ និងអាចជួយលើកកម្ពស់ជីវភាពរបស់កសិករកម្ពុជាថែមទៀត៕