ជនបរទេសស្នាក់នៅកម្ពុជា និងវិស័យឯកជនសាទរចំពោះការផ្តល់ប័ណ្ណទស្សនា​អង្គរពិសេសដោយឥតគិតថ្លៃ

តំណាងសមាគមទេសចរណ៍ និងភ្ញៀវទេសចរបរទេស សាទរចំពោះកម្មវិធីផ្តល់កាតទស្សនាប្រាសាទអង្គរពិសេស (Special Pass) ដល់ជនបរទេសដែលកំពុងស្នាក់នៅ ធ្វើការ និងប្រកប​របរនៅប្រទេសកម្ពុជាចាប់ពី២ឆ្នាំឡើងទៅ ដែលជាយន្តការដ៏ទាក់ទាញ ការផ្តល់ភាពងាយស្រួល និងការកាត់បន្ថយចំណាយដល់ពួកគេនៅពេលទៅទស្សនាប្រាសាទនានានៅខេត្តសៀមរាប។

យោងតាមមន្រ្តីនៃគ្រឹះស្ថានអង្គរបានថ្លែងប្រាប់កម្ពុជាថ្មីនៅថ្ងៃទី១៧ ខែតុលានេះថា រាជរដ្ឋាភិបាលកម្ពុជាបានដាក់ឱ្យដំណើការនៃការផ្តល់ Special Pass ដល់ភ្ញៀវទេចរបរទេសដែលបានស្នាក់នៅប្រទេសកម្ពុជាចាប់ពី២ឆ្នាំ តាំងពីឆ្នាំ២០២៣ បន្ទាប់ពីការរីករាលដាលនៃជំងឺកូវីដ១៩ថមថយ ក្នុងគោលបំណងដើម្បីជួយសម្រួលបន្ទុកចំណាយទិញសំបុត្រទស្សនា ក៏ដូចជាទាក់ទាញភ្ញៀវទេចរបរទេសមកទស្សនាប្រសាទនានានៅខេត្តសៀមរាបផងដែរ។

មន្រ្តីដដែលបានលើកឡើងថា សម្រាប់ភ្ញៀវទេចរបរទេសដែលមានបំណងទទួលបានប័ណ្ណទស្សនាប្រសាទពិសេសនេះគឺអាចដាក់ពាក្យស្នើសុំដោយភ្ជាប់មកជាមួយរូបថត ឯកសារបញ្ជាក់អំពីរយៈពេលនៃការស្នាក់នៅប្រទេសកម្ពុជា។

«នៅពេលដែលភ្ញៀវបរទេសគាត់ដាក់ពាក្យស្នើសុំប័ណ្ណទស្សនាពិសេសនេះរួចហើយ វាទាមទារពេលវេលាប្រមាណជា៧ទៅ១០ថ្ងៃប៉ុណ្ណោះ នោះពួកគាត់នឹងទទួលបានប័ណ្ណពិសេសដែលអនុញ្ញាតឱ្យពួកគាត់មានសិទ្ធិចូលទស្សនាប្រសាទនានាដោយពុំគិតថ្លៃរយៈពេល២ឆ្នាំ»។

លោក ធួន ស៊ីណាន ប្រធានសមាគមទេសចរណ៍អាស៊ី បាស៊ីហ្វិក(PATA) ក៏បានថ្លែងមកកាន់កម្ពុជាថ្មីនៅថ្ងៃទី១៧ ខែតុលានេះផងដែរ សមាគមលោកបានស្នើដល់រដ្ឋាភិបាលជាច្រើនឆ្នាំមកហើយចាប់តាំងពីការផ្ទុះនៃការរីករាលដាលជំងឺកូវីដ១៩ក្នុងការដាក់ចេញនូវយន្តការនានារួមទាំងការផ្តល់នូវប័ណ្ណចូលទស្សនាពិសេសដល់ជនបរទេសដែលបានកំពុងធ្វើការ​ ស្នាក់នៅនិងរកស៊ីទទួលទាននៅកម្ពុជាសំដៅធ្វើយ៉ាងណាផ្តល់លទ្ធភាពដល់ពួកគេអាចចូលទស្សនាប្រសាទនានាដោយពុំគិតថ្លៃដើម្បីលើកកម្ពស់វិស័យទេសចរណ៍កម្ពុជា។

លោកបានថ្លែងថា៖«នៅពេលដែលជនបរទេសដែលស្នាក់នៅប្រទេសកម្ពុជាយើងគាត់បានប័ណ្ណពិសេសនេះទៅទស្សនាដោយពុំគិតថ្លៃ ពួកគាត់នឹងកាន់តែជួយផ្សព្វផ្សាយអំពីសក្តានុពលវិស័យទេចរណ៍របស់យើងទៅកាន់ប្រជាជនគាត់បានកាន់តែទូលំទូលាយ។ ដូច្នេះយន្តការនេះបើទោះបីជាយើងខាតបង់នូវចំណូលពីការលក់សំបុត្របន្តិចក៏ពិតមែន ប៉ុន្តែអ្វីដែលយើងទទួលបាននោះការជួយផ្សព្វផ្សាយពីពួកគាត់ទៅកាន់ពិភពលោក»។

លោក Thomas Starkey ដែលជាជនបរទេសបានកំពុងស្នាក់នៅប្រទេសកម្ពុជាសរសេរនៅ​លើហ្វេសប៊ុកផ្ទាល់ខ្លួននៅព្រឹកថ្ងៃទី១៧ ខែតុលានេះថា​លោកពិតជារំភើបណាស់ដែល​លោកបានទទួលប័ណ្ណទស្សនាពិសេសនេះដើម្បីចូលទៅទស្សនាប្រាសាទនានានៅតំបន់អង្គរសដោយពុំគិតថ្លៃរយៈពេល២ឆ្នាំ។

លោកបានលោកឡើងថា៖ វោវ! អរគុណកម្ពុជា!ខ្ញុំ​បាន​ទទួល​សំបុត្រ​ចូល​​ទស្សនា​រមណីយ​​ដ្ឋាន​អង្គរ​ដ៏​អស្ចារ្យ… ដោយមិនគិតថ្លៃ! គំនិតផ្តួចផ្តើមនេះគឺសម្រាប់ជនបរទេសដែលបានរស់នៅក្នុងប្រទេសកម្ពុជាអស់រយៈពេលជាង ២ ឆ្នាំ ហើយវាគឺជាវិធី​មួយដ៏អស្ចារ្យ​ក្នុងការទទួលស្គាល់ជនបរទេសដែលស្នាក់នៅរយៈពេលវែង។ វាមិនត្រឹមតែអនុញ្ញាតឱ្យយើងស្វែងយល់ពីបេតិកភណ្ឌវប្បធម៌ដ៏ស្ញប់ស្ញែងរបស់ប្រទេសកម្ពុជាប៉ុណ្ណោះទេ ប៉ុន្តែថែមទាំងពង្រឹងទំនាក់ទំនងដែលយើងមានអារម្មណ៍ចំពោះប្រទេសដ៏ស្រស់ស្អាតមួយនេះទៀតផង»។

​លោកក៏បានរំលេចឡើងផងដែរថា កម្មវិធីនេះគឺជាការលើកទឹកចិត្តដ៏ល្អសម្រាប់អ្នកជំនាញ និងជនបរទេសមករស់នៅ និងធ្វើការនៅទីនេះ លើកកម្ពស់វិស័យទេសចរណ៍ក្នុងស្រុក ខណៈពេលដែលជំរុញទំនាក់ទំនងកាន់តែស៊ីជម្រៅនៅក្នុងសហគមន៍–«គុណតម្លៃដ៏អស្ចារ្យនេះគឺវាបានផ្តល់នូវតម្លៃបន្ថែមដល់ការរស់នៅក្នុងព្រះរាជាណាចក្រកម្ពុជា! សូមអរគុណ!»។

គ្រឹះស្ថាន​អង្គរ គឺជា​គ្រឹះស្ថានសាធារណៈរដ្ឋបាល​ដែល​បង្កើតឡើង​កាលពី​ឆ្នាំ​ ២០១៦ ដោយ​ស្ថិតនៅក្រោម​អាណាព្យាបាល​បច្ចេកទេស​នៃ​ក្រសួង​ទេសចរ​ណ៍ និង​ក្រោម​អាណាព្យាបាល​ហិរញ្ញវត្ថុ​នៃ​ក្រសួង​សេដ្ឋកិច្ច និង​ហិរញ្ញវត្ថុ​។  ការប្រមូល​ចំណូល​របស់​គ្រឹះស្ថាន​អង្គរ គឺ​រួមមាន រមណីយដ្ឋាន​អង្គរ​, ប្រាសាទ​​កោះ​កេរ​, និង​សំបុត្រ​ទូក​នៅ​កំ​ពង់​ផែ​ចុង​ឃ្នៀ​ស​។ ​

កាលពីថ្ងៃទី១១ ខែកញ្ញា ឆ្នាំ២០២៤កន្លងទៅនេះ គ្រឹះស្ថានអង្គរ​បានចេញសេក្តីជូនដំណឹងមួយស្តីអំពីការសម្រួលដល់ភ្ញៀវទេសចរបរទេស ​ ដោយការកែទម្រង់ដំណាក់កាលទី១នេះ មានដូចជាលុបចោលទាំងស្រុង​នូវព័ត៌មានតម្រូវពីភ្ញៀវទេសចរអន្តរជាតិ ដូចជា រូបថត សញ្ជាតិ ក្រុមអាយុនិងភេទ សម្រាប់បណ្ណចូលទស្សនារមណីយដ្ឋានអង្គរ​រយៈពេល១ថ្ងៃ។ ជាមួយគ្នានេះសម្រាប់បណ្ណទស្សនា រយៈពេល៣ថ្ងៃ និង៧ថ្ងៃ រក្សារូបថត និងលុបចោលនូវព័ត៌មាន សញ្ជាតិ ក្រុមអាយុ និងភេទ ដោយអនុវត្តរហូតដល់ថ្ងៃទី៣១ ខែធ្នូ ឆ្នាំ២០២៤។

ដោយឡែកការត្រួតពិនិត្យប័ណ្ណចូលទស្សនារមណីយដ្ឋានអង្គរ ក៏មានការផ្លាស់ប្តូរដែរ ដោយបានផ្លាស់ប្តូរការត្រួតពិនិត្យបណ្ណ ពីរមណីយដ្ឋានអង្គរទាំងមូល មកធ្វើការត្រួតពិនិត្យនៅតាមច្រក​​ចូលប្រាសាទវិញ។

​គ្រឹះស្ថានអង្គរបានបន្ថែមថាចំពោះការកែទម្រង់ដំណាក់កាលទី២នៃការលក់បណ្ណតាមប្រាសាទរាជរដ្ឋាភិបាលគ្រោងនឹងប្រកាសដាក់ឱ្យអនុវត្ត នៅដើមឆ្នាំ២០២៥ ខាងមុខនេះ។

គិតត្រឹមរយៈពេល ៩ ខែ ឆ្នាំ ២០២៤ ឆ្នាំ ២០២៤ មានភ្ញៀវទេសចរបរទេសចំនួនជិត ៧០ ម៉ឺន​នាក់បានទិញសំបុត្រ​ចូលទស្សនារមណី​យដ្ឋាន​អង្គរគិតជាទឹក​ប្រាក់​​​ប្រមាណ​ជាង ៣២,៥ លានដុល្លារ កើនឡើង ៣០,៣២% ប្រៀបធៀបរយៈពេលដូចគ្នានៅឆ្នាំ ២០២៣៕