ព័ត៌មានអន្ដរជាតិ

ការលក់រថយន្ត EV កើនឡើង ៧ ខែជាប់ៗគ្នា និងដល់អត្រាខ្ពស់បំផុត៣ដង

បានផុស

១ year មុន

នៅ

ថ្ងៃសុក្រ ១៣ ធ្នូ ២០២៤

ដោយ

ទិន្នន័យពីក្រុមហ៊ុនស្រាវជ្រាវទីផ្សារ Rho Motion បានបង្ហាញនៅថ្ងៃសុក្រថា ការលក់ជាសាកលនៃរថយន្តកូនកាត់ (ស៊ីសាំង និងភ្លើង) និងរថយន្តអគ្គិសនី បានបន្តកើនឡើងក្នុងរយៈពេល ៧ ខែជាប់ៗគ្នាក្នុងខែវិច្ឆិកា និងដល់អត្រា ៣២ ភាគរយ ប្រចាំខែដដែល ដែលជាកំណើនខ្ពស់បំផុតជាលើកទី៣ជាប់ៗគ្នា (ឆ្នាំលើឆ្នាំ)។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនបានបន្តនាំមុខគេលើកំណើននៃការលក់ ដោយរួមចំណែកជិត ៧០ ភាគរយ នៃការលក់រថយន្ត EV សរុបក្នុងខែវិច្ឆិកា ខណៈការលក់នៅអឺរ៉ុបវិញ បានបង្ហាញពីការធ្លាក់ចុះតិចតួច។

ទិន្នន័យរបស់ Rho Motion បានបង្ហាញលម្អិតថា ការលក់រថយន្តអគ្គិសនីគ្រប់ប្រភេទ បានកើនឡើង ៣២,២ ភាគរយ ឬសរុបប្រមាណ ១,៨៣ លានគ្រឿង ក្នុងខែវិច្ឆិកា។ ការលក់ក្នុងប្រទេសចិន បានកើនឡើង ៥០ ភាគរយនៅដោយរួមចំណែកសរុបប្រមាណ ១,២៧ លានគ្រឿង។

នៅសហរដ្ឋអាមេរិក និងកាណាដាវិញ ការលក់រថយន្តះអគ្គិសនី បានកើនឡើង ១៦,៨ ភាគរយ ក្នុងចំនួនសរុបប្រមាណ ០,១៧ លានគ្រឿង ខណៈអឺរ៉ុបលក់បានប្រមាណ ០,២៨ លានគ្រឿង ដោយធ្លាក់ចុះតិចតួចក្នុងអត្រាប្រចាំឆ្នាំ ប៉ុន្តែកើនឡើង ៧,៧ ភាគរយ ធៀបនឹងខែតុលា។

គួរគូសបញ្ជាក់ថា ទីផ្សាររថយន្តអគ្គិសនីកំពុងរីកចម្រើនយ៉ាងសំខាន់ ខណៈតម្រូវការកើនឡើង ហើយការផលិតនៅក្នុងប្រទេសចិនបានគំរាមកំហែងដល់ទីផ្សាររថយន្តប្រភេទនេះនៅតំបន់ផ្សេងៗទៀត។ ជាឧទាហរណ៍ វិស័យរថយន្តអគ្គិសនីអ៊ឺរ៉ុបកំពុងត្រដាបត្រដួសនឹងតម្លៃផលិតកម្ម គោលដៅនៃការបំភាយឧស្ម័នថ្មី ខណៈការប្រកួតប្រជែងកើនឡើង៕