ឥណ្ឌូណេស៊ីរឹតបន្តឹងការគ្រប់គ្រង​នីកែល ​ខណៈអាមេរិក និងចិន ប្រជែងគ្នា​លើរ៉ែ​កម្រ

ឥណ្ឌូណេស៊ីដែលជាប្រទេសផ្គត់ផ្គង់រ៉ែនីកែលដ៏ធំបំផុតលើពិភព​លោក កំពុងរឹងបន្តឹងលើការគ្រប់គ្រងនីកែល ទោះបីជាតម្រូវការសកលងាកចេញពីការពឹងផ្អែកខ្លាំងលើរ៉ែលោហៈប្រភេទនេះក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP ​នៅថ្ងៃពុធ (១៨ កុម្ភៈ)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះជំហានរបស់ឥណ្ឌូណេស៊ី អាច​ជះឥទ្ធិពលដល់ខ្សែច្រវ៉ាក់ផ្គត់ផ្គង់រថយន្ត​អគ្គិសនី (EV) សកល ខណៈដែលសហរដ្ឋអាមេរិក និងចិនប្រកួតប្រជែងគ្នាលើការគ្រប់គ្រងរ៉ែកម្រ​សំខាន់ៗ។

យោងតាមក្រុមហ៊ុនស្រាវជ្រាវទីផ្សារ ​​​​S&P Global Market Intelligence ​ឥណ្ឌូណេស៊ីរួមចំណែកប្រមាណ ៦០% នៃការផ្គត់ផ្គង់នីកែលលើពិភព​លោក​ក្នុងឆ្នាំ ២០២៤ ដោយ​កើនឡើងពីត្រឹម ៣១,៥% នៅឆ្នាំ ២០២០ ដោយធ្វើឱ្យប្រទេសនេះក្លាយជាចំណុចស្នូលនៃទីផ្សារ។ ​ការកើនឡើងនេះ កើតឡើង​ក្រោយ​អតីតប្រធានាធិបតី ចូកូ វីដូដូ បានហាមឃាត់ការនាំចេញរ៉ែនីកែលឆៅ ដែលជំរុញឱ្យចិនដាក់ការវិនិយោគដ៏ធំក្នុងប្រទេសនេះសម្រាប់ការចម្រាញ់ និងរំលាយនីកែល​។ ​

​ពីមុនមក រដ្ឋាភិបាលឥណ្ឌូណេស៊ី​សង្ឃឹមថា នីកែលនឹងគាំទ្រដល់ឧស្សាហកម្ម EV ​​រាប់ចាប់តាំងពីការជីកយកនីកែល ​រហូតដល់ការផលិតអាគុយ និង​រថយន្ត EV ទាំងមូល​។ យ៉ាងណាមិញ អ្នកជំនាញលើកឡើងថា ការបញ្ជាក់បែបនេះ គឺគ្រាន់តែដើម្បីបិទបាំង​ការកាប់បំផ្លាញព្រៃឈើ និងការពង្រីកការជីកយករ៉ែប៉ុណ្ណោះ ទោះបីជាហានិភ័យអាកាសធាតុកើនឡើង​ក្ដី។

នៅឆ្នាំ ២០២៥ ​ឥណ្ឌូណេ​ស៊ីបានចាត់វិធានការប្រឆាំងនឹងការប្រើប្រាស់ធនធានធម្មជាតិខុសច្បាប់ ដោយនិយាយថា អាជ្ញាប័ណ្ណជីកយករ៉ែ និងចម្ការជាច្រើន ត្រូវបានផ្សារភ្ជាប់ទៅនឹងអំពើពុករលួយ ឬមិនត្រូវបានអនុម័តឱ្យបានត្រឹមត្រូវ។ អាជ្ញាធរនិយាយថា ពួកគេបានរឹបអូសដីជីករ៉ែខុសច្បាប់ជាង ៤ លានហិកតា ចេញពិន័យជាប្រាក់ចំនួន ១,៧ ​ប៊ីលានដុល្លារ ហើយអាចនឹងរឹបអូសដីបន្ថែមទៀតនៅឆ្នាំនេះ។

​យ៉ាងណាមិញ​ អ្នកជំនាញព្រមានថា ​ការបង្រ្កាបរបស់អាជ្ញាធរឥណ្ឌូណេស៊ី ធ្វើឡើងដោយសារតែតម្រូវការនីកែលអាចនឹងចុះខ្សោយ ​ចំពេលដែល​ក្រុមហ៊ុនផលិតរថយន្តអគ្គិសនីចិនជាច្រើនកំពុងប្តូរទៅប្រើអាគុយរថយន្ត​ដែលប្រើប្រាស់នីកែលតិចជាងមុន​។

អ្នកជំនាញមើលឃើញថា ​ចិនជាអ្នកវិនិយោគបរទេសដ៏សំខាន់​ក្នុងវិស័យនីកែលរបស់​ឥណ្ឌូណេ​ស៊ី ហើយប្រើប្រាស់លោហៈនេះ​សម្រាប់ឧស្សាហកម្មដែកថែប និងថាមពលស្អាត។

​ចិនបាននាំចូលនីកែលពី​ឥណ្ឌូណេ​ស៊ីអស់រយៈពេលជាច្រើនទសវត្សរ៍មកហើយ ប៉ុន្តែការវិនិយោគ និងការនាំចូលពីឥណ្ឌូណេស៊ីទៅចិន​បានកើនឡើងខ្លាំង ចន្លោះឆ្នាំ ២០២០-២០២៣ ពោលគឺក្រោយការហាមឃាត់របស់លោក​ ចូកូ។ ​

យោងតាមវិទ្យាស្ថានសេដ្ឋកិច្ចថាមពល និងការវិភាគហិរញ្ញវត្ថុ ទុនបម្រុងនីកែលធំជាងគេគឺនៅលើកោះ Sulawesi ដែលផលិតនីកែលជាងពាក់កណ្តាលនៃតម្រូវការ​ពិភពលោក​។ ដោយឡែក វិទ្យាស្ថានធនធានពិភពលោកបានឱ្យដឹងថា ការជីកយករ៉ែរួមទាំងនីកែល បានបណ្តាលឱ្យបាត់បង់ព្រៃឈើប្រហែល ៣៧០ ០០០ ហិកតា ចន្លោះឆ្នាំ​ ២០០១ និង ២០២០ ហើយការប្រើប្រាស់ធ្យូងធ្មដើម្បីរំលាយនីកែល ក៏ប៉ះពាល់ដល់ការប្ដេជ្ញាចិត្តរបស់ឥណ្ឌូណេស៊ី​លើគោលដៅអាកាសធាតុ។

ផែនការរបស់​ឥណ្ឌូណេស៊ីក្នុងការកសាងឧស្សាហកម្ម EV ដ៏រឹងមាំដោយផ្អែកលើនីកែល ក៏មិនទាន់ទទួលបានជោគជ័យពេញលេញនៅឡើយទេ។

នៅខែកក្កដា ឆ្នាំ២០២៤ ក្រុមហ៊ុន Hyundai Motor Group និង LG Energy Solution បានបើករោងចក្រផលិតអាគុយ EV ដំបូងគេនៅឥណ្ឌូណេស៊ី ប៉ុន្តែក្រោយមក​នៅខែមេសា ឆ្នាំ ២០២៥ ​ក្រុមហ៊ុន LG បានដកខ្លួនចេញពីគម្រោងវិនិយោគ​ដែលមាន​តម្លៃ ៨,៤ ​ប៊ីលានដុល្លារមួយនេះ​។

ក្រុមហ៊ុន​ ​​ BYD និងក្រុមហ៊ុន CATL ឯណោះ​វិញ ក៏កំពុងសាងសង់រោងចក្រផលិតអាគុយ EV នៅឥណ្ឌូណេស៊ី​ផងដែរ។ ​ប៉ុន្តែ ទីផ្សាររថយន្តអគ្គិសនីរបស់ប្រទេសនេះ នៅតែមាន​ទំហំតូចនៅឡើយ។ ក្នុងឆ្នាំ ២០២៤ ឥណ្ឌូណេស៊ីលក់ EV ប្រមាណ ៤៣ ០០០ គ្រឿង ដែលស្មើត្រឹមតែ ៥% នៃការលក់រថយន្តក្នុងសរុបប៉ុណ្ណោះ។ ​

ក្រុមហ៊ុនផលិតរថយន្តអគ្គិសនីជាច្រើន កំពុងប្តូរទៅប្រើថ្មលីចូមជាតិដែកផូស្វាត ដែលប្រើប្រាស់នីកែលតិចជាងមុន​។

អ្នកជំនាញនិយាយថា ការគ្រប់គ្រងរបស់រដ្ឋកាន់តែខ្លាំងលើនីកែល អាចកាត់បន្ថយឥទ្ធិពលរបស់ចិននៅក្នុងផ្នែកខ្លះនៃខ្សែ​ច្រវ៉ាក់ផ្គត់ផ្គង់​នីកែលរបស់ឥណ្ឌូណេស៊ី។ ប៉ុន្តែវាក៏បង្ហាញឱ្យឃើញផងដែរថា ​​ប្រទេសនេះ​ស្ថិតក្នុងស្ថានភាពលំបាកនៃការប្រកួតប្រជែងរបស់អាមេរិក និងចិន​លើបញ្ហារ៉ែសំខាន់ ក៏ដូចជារ៉ែកម្រ។

អ្នកវិភាគម្នាក់បាននិយាយថា អនាគតនៃឧស្សាហកម្មនីកែលរបស់ប្រទេសឥណ្ឌូណេស៊ីគឺមិនប្រាកដប្រជាទេ ហើយភាពមិនប្រាកដប្រជាធ្វើឱ្យវិនិយោគិនមានការប្រុងប្រយ័ត្ន៕