BYD វ៉ាដាច់ Toyota លើការលក់រថយន្តនៅសិង្ហបុរី

ទិន្នន័យពីរដ្ឋាភិបាលសិង្ហបុរីបានបង្ហាញថា ក្រុមហ៊ុនផលិតរថយន្តអគ្គិសនីចិន BYD បាន​វ៉ាដាច់ក្រុមហ៊ុនផលិតរថយន្តជប៉ុន Toyota លើ​ការលក់រថយន្តក្នុងប្រទេសសិង្ហបុរី ជាលើកដំបូងក្នុងប្រវត្តិសាស្រ្ត ចំពេល BYD បង្កើនយុទ្ធសាស្រ្តជំរុញការលក់លើទីផ្សារបរទេស។ នេះបើតាម​ការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ក្នុងរយៈពេល ៤ ខែដំបូង ដើមឆ្នាំ ២០២៥ ក្រុមហ៊ុន BYD បានលក់រថយន្តចំនួន ៣ ០០២ គ្រឿង ឬស្មើនឹង ២០ ភាគរយ នៃការលក់រថយន្តសរុប​ក្នុងប្រទេសសិង្ហបុរី។ ​គិតត្រឹមរយៈពេលដូចគ្នា ក្រុមហ៊ុន Toyota វិញ លក់រថយន្តបាន ២ ០៥០ គ្រឿង ខណៈ Tesla ដែលជាគូប្រជែងសំខាន់របស់ BYD បានលក់រថយន្តប្រមាណ ៥៣៥ គ្រឿង។ ​

កន្លងមក Toyota នាំមុខគេលើការលក់រថយន្តក្នុងបុរីរដ្ឋសិង្ហបុរី ដោយមានប្រមាណ ៧ ៨៧៦ គ្រឿង កាលពីឆ្នាំ ២០២៤ ខណៈ BYD លក់បាន ៦ ១៩១ គ្រឿង។

កំណើននៃការលក់ដ៏រឹងមាំរបស់ BYD ​​នៅសិង្ហបុរី បានគូសបញ្ជាក់ពីកិច្ចខិតខំប្រឹងប្រែងរបស់​ក្រុមហ៊ុនក្នុងការផ្តោតលើទីផ្សារក្រៅប្រទេស ចំពេលមានការប្រកួតប្រជែងតម្លៃ​ដ៏ខ្លាំងក្លាក្នុងប្រទេសចិន។ រ៉យទ័របានរាយការណ៍នៅខែនេះថា BYD បានកំណត់គោលដៅលក់រថយន្តនៅទីផ្សារ​ក្រៅចិន ឱ្យបាន ៥០ ភាគរយ ត្រឹមឆ្នាំ ២០៣០។

BYD បាន​ចូលទៅកាន់ទីផ្សារសិង្ហបុរីក្នុងឆ្នាំ ២០២២ ពោលគឺក្រោយវត្តមានរបស់ Tesla ជាងមួយឆ្នាំ ប៉ុន្តែឃើញពីកំណើនលក់យ៉ាងឆាប់រហ័ស។ ​BYD បានទទួលជោគជ័យ​នៅថៃរួចហើយ ខណៈមានផែនការពង្រីកខ្លួនទៅទាំងអឺរ៉ុប និងអាមេរិកឡាទីន៕ ​