ព័ត៌មានអន្ដរជាតិ

តៃវ៉ាន់បិទផ្លូវ Uber មិនឱ្យទិញយក Foodpanda ដោយខ្លាចប៉ះពាល់ដល់ការប្រកួតប្រជែង

បានផុស

១ year មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

គណៈកម្មការពាណិជ្ជកម្មប្រកបដោយយុត្តិធម៌តៃវ៉ាន់ (FTC) បានប្រកាសកាលពីថ្ងៃពុធថា តៃវ៉ាន់បានបិទផ្លូវ ក្រុមហ៊ុនដឹកជញ្ជូនអាមេរិក Uber Technologies មិនឱ្យទិញយកអាជីវកម្មរបស់ក្រុមហ៊ុនកម្ម៉ង់ និងដឹកជញ្ជូនចំណីអាហារ Foodpanda នៅលើកោះនេះ ដោយបារម្ភថា វានឹងប៉ះពាល់ដល់ការប្រកួតប្រជែង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Uber និង Foodpanda មិនទាន់ប្រតិកម្មយ៉ាងណាទេ ចំពោះការសម្រេចចិត្តនេះ ប៉ុន្តែក្រុមហ៊ុនដឹកជញ្ជូនអាល្លឺម៉ង់ Delivery Hero ដែលជាក្រុមហ៊ុនមេរបស់ Foodpanda បានឱ្យដឹងថា ក្រុមហ៊ុន Uber ប្រហែលជាអាចនឹងតវ៉ាចំពោះការសម្រេចចិត្តរបស់ FTC ឬក៏លុបចោលការទិញយករបស់ខ្លួន។

ក្នុងសន្និសីទសារព័ត៌មានកាលពីថ្ងៃពុធ FTC បាននិយាយថា ផលប៉ះពាល់អវិជ្ជមាននៃទិញយក នឹងមានច្រើនជាងអត្ថប្រយោជន៍សេដ្ឋកិច្ចទាំងមូល ហើយវិធានការកែតម្រូវ នឹងមិនអាចដោះស្រាយកង្វល់នៃការប្រកួតប្រជែងបានទេ។

អនុប្រធាន FTC លោក Chen Chih-min បានថ្លែងយ៉ាងដូច្នេះថា៖ «សម្រាប់ទីផ្សារវេទិកាដឹកជញ្ជូនម្ហូបអាហារ សម្ពាធប្រកួតប្រជែងជាចម្បងរបស់ UberEats គឺមកពី Foodpanda ។ ការទិញយក នឹងលុបបំបាត់សម្ពាធប្រកួតប្រជែងនេះ»។ UberEats សំដៅលើវេទិការបស់ Uber ដែលមានមុខងារដូច Foodpanda។

លោកបន្តទៀតថា៖ «ក្រោយការទិញយក UberEats នឹងមានឧបសគ្គតិចជាងមុនក្នុងការប្រកួតប្រជែង ដោយនឹងលើកទឹកចិត្តបន្ថែមទៀតឱ្យវាបង្កើនតម្លៃសម្រាប់អ្នកប្រើប្រាស់ និងថែមទាំងបង្កើនកម្រៃជើងសារសម្រាប់ប្រតិបត្តិករភោជនីយដ្ឋានផងដែរ»។ លោកបន្ថែមថា បើក្រុមហ៊ុនទាំង២បូកបញ្ជូលគ្នា នោះវានឹងកាន់កាប់ចំណែកទីផ្សារដឹកជញ្ជូនម្ហូបអាហាររហូតដល់ ៩០ ភាគរយ។

គួររំឭកថា ក្រុមហ៊ុន Uber និង Delivery Hero បានប្រកាសពីការទិញយក Foodpanda កាលពីខែឧសភាកន្លងទៅ ក្នុងតម្លៃព្រមពៀង ១,២៥ ប៊ីលានដុល្លារ ដោយមាន ៩៥០ លានដុល្លារជាលុយសុទ្ធ និង ៣០០ លានដុល្លារ ជាភាគហ៊ុនទើបចេញថ្មី៕