តម្រូវការឥណទានលក្ខណៈបុគ្គលធ្លាក់ចុះ នៅត្រីមាសទី ៤ ឆ្នាំ ២០២៤​

ក្រុមហ៊ុនក្រេឌីត ប្យួរ៉ូ ខេមបូឌា (CBC) បានចេញផ្សាយនៅក្នុងរបាយការណ៍នៅថ្ងៃទី ៣០ ខែមករា ឆ្នាំ ២០២៥ នេះថា សន្ទស្សន៍​ឥណទានលក្ខណៈបុគ្គលក្នុងត្រីមាសទី ៤ ឆ្នាំ ២០២៤ បានថមថយចុះ ដែលមានទំហំទឹក​ប្រាក់ឥណទានសរុបមាន​ជាង ២ លានដុល្លារ ។

យោងតាមរបាយការណ៍បង្ហាញថា ពាក្យ​ស្នើសុំឥណទានលក្ខណៈបុគ្គល តំណាងឱ្យចេតនារបស់អ្នកប្រើប្រាស់ក្នុងការទទួល​​បានឥណទានក្នុងទម្រង់ជាឥណទានប្រើប្រាស់ផ្ទាល់ខ្លួន ប័ណ្ណឥណទាន ឬកម្ចីអចល​ន​ទ្រព្យ មានការធ្លាក់ចុះ ១៦ ភាគរយ នៃចំនួនពាក្យស្នើសុំ។

ដំណើរការឥណទានលក្ខណៈបុគ្គល ដែលឆ្លុះបញ្ចាំង​ពីបរិមាណឥណទាន​លក្ខណៈបុគ្គល​គិត​ត្រឹម​ត្រីមាសទី៤ ឆ្នាំ​២០២៤​ បានបង្ហាញពីទីផ្សារឥណទាន​មានការកើនឡើងតិចតួច​ ០,៨៣ ភាគរយ បើធៀបនឹងត្រីមាសទី ៣ ក្នុងឆ្នាំ ២០២៤។

ក្រុមហ៊ុនក្រេឌីត ប្យួរ៉ូ ខេមបូឌា បានបញ្ជាក់ថា គុណភាពឥណទានលក្ខណៈបុគ្គល ដែលវាស់ដោយអនុបាតនៃឥណ​ទាន​សំណងយឺតលើសពី ៣០ ថ្ងៃ (30+DPD) បានកើនឡើង ៦,២៤ ភាគរយ ដែលបង្ហាញថាលទ្ធភាពនៃការប្រើប្រាស់ឥណទាន និងហានិភ័យនៃការខកខា​នបង់ប្រាក់កម្ចីមានការកើនឡើង។

លោក តូច ចៅចេក សមាជិកក្រុមប្រឹក្សាភិបាលនៃសមាគមធនាគារនៅកម្ពុជា និងជាប្រធាន​នា​យក​ប្រតិបត្តិធនាគារ ប្រៃសណីយ៍កម្ពុជា មានប្រសាសន៍ថា ឥណទានមិន​ដំណើរការចាប់​ផ្ដើម​កើន​​ឡើងនៅឆ្នាំ ២០២២ រហូតដល់បច្ចុប្បន្ន។ ប៉ុន្តែនៅដំណាច់ឆ្នាំ ២០២៤ ឥណទានមិន​ដំណើរ​ការធ្លាក់ចុះបន្តិច ហើយទំនងវិស័យនេះ នឹងមានភាពល្អប្រសើរចាប់ពីឆ្នាំ ២០២៥ នេះ។

បើតាមលោក តូច ចៅចេក វិស័យធនាគារនៅក្នុងឆ្នាំ ២០២៤ ជាពិសេសប្រាក់សន្សំធនា​គាររីកចម្រើនច្រើន បើតាមរបាយ​ការណ៍របស់ធនាគារជាតិ កាលពីពាក់កណ្ដាលឆ្នាំ ២០២៤ រីកចម្រើនរហូតដល់ ១៣% ហើយសម្រាប់ឥណទាន គឺរីកចម្រើនជាង ២%។

លោក តូច ចៅចេក បានប្រាប់ថា ប្រាក់កម្ចី និងបញ្ញើ មិនមានហានិភ័យក្នុងវិស័យធនាគារ​នោះទេ ពោលគឺជាសញ្ញាវិជ្ជមានសម្រាប់វិស័យធនាគារទាំងមូល ខណៈ​សមតុល្យប្រាក់​សន្សំ​ទើបតែបាន ៥២ ពាន់លានដុល្លារ រីឯសមតុល្យប្រាក់កម្ចីចំនួន ៥៩ ពាន់លានដុល្លារ។

លោក តូច ចៅចេក៖ «កាលណាសមតុល្យប្រាក់សន្សំកាន់តែច្រើន នៅក្នុងធនាគារគាត់​អាចនឹងទម្លាក់ការប្រាក់សមតុល្យប្រាក់សន្សំ កាលណាអត្រាការប្រាក់សន្សំហ្នឹងទាប អញ្ចឹងធនា​គារមានឱកាសច្រើននៅក្នុងការផ្ដល់ឥណទានកាន់តែច្រើនក្នុងអត្រាការប្រាក់ទាប»។

យោងតាមធនាគារជាតិនៃកម្ពុជា (NBC) គិតត្រឹមឆមាសទី១ ឆ្នាំ ២០២៤ មានអតិ​ថិជន​ប្រមាណ ៥ លាននាក់ កំពុងប្រើប្រាស់កម្ចីពីប្រព័ន្ធធនាគារ និងហិរញ្ញវត្ថុ ក្នុងនោះ​ឥណទាន​អតិថិជនបានកើន ២,៦% ដែលមានទំហំទឹកប្រាក់ប្រមាណ ៥៨,៩ ប៊ីលានដុល្លារ៕

អត្ថបទ៖ ឡេង ដេត