សេដ្ឋកិច្ច

ពាណិជ្ជកម្មទ្វេភាគីកម្ពុជា-អាមេរិក សម្រេចបានជិត ៩០០ លានដុល្លារ កើនជិត ៤០% ក្នុងខែមករា

បានផុស

១ year មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ការដោះដូរទំនិញកម្ពុជា-អាមេរិកសម្រេចបានទឹកប្រាក់ជិត ៩០០ លានដុល្លារ នៅក្នុងខែមករា ឆ្នាំ ២០២៥ កើនឡើង ៣៨,៦ ភាគរយ ធៀបនឹងរយៈពេលដូចគ្នានៅឆ្នាំ ២០២៤។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ GDCE បានបង្ហាញថា នៅក្នុងខែមករា ការនាំចេញ-នាំចូលទំនិញរវាងប្រទេសទាំងពីរមានទឹកប្រាក់សរុបជាង ៨៩២ លានដុល្លារ កើនឡើង ៣៨,៦ ភាគរយ ក្នុងនោះកម្ពុជានាំចេញទំនិញទៅអាមេរិកមានតម្លៃជាង ៨៦៨ លានដុល្លារ កើន ៣៨,៦ ភាគរយ និងទំនិញអាមេរិកនាំចូលមកកម្ពុជាតម្លៃជិត ២៤ លានដុល្លារ កើន ៣៧,៧ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាប្រាប់កម្ពុជាថ្មីថា អស្ថិរភាពក្នុងតំបន់ដូចជា ភូមា បង់ក្លាដេស បានធ្វើឱ្យអ្នកវិនិយោគរើរោងចក្រមកកម្ពុជា បង្កើនការផលិតហើយនាំចេញទៅអាមេរិក។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានប្រាប់ថា កម្ពុជា មានទំនាក់ទំនងល្អជាមួយអាមេរិក ខណៈការបញ្ជាទិញរបស់អាមេរិកពីកម្ពុជាមានកំណើនរាល់ឆ្នាំ។

លោកថា គោលនយោបាយការបរទេសរបស់អាមេរិក នឹងនៅតែបន្តការផ្ដល់ការអនុគ្រោះក្នុងការនាំចូលទំនិញពីកម្ពុជា។ ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត។

យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ការដោះដូរទំនិញកម្ពុជាជាមួយអាមេរិក សម្រេចបានទឹកប្រាក់ជាង ១០ ពាន់លានដុល្លារ កើនឡើងជើង ១១ ភាគរយ ធៀបនឹងឆ្នាំ ២០២៣ ក្នុងនោះកម្ពុជានាំចេញទំនិញទៅអាមេរិកមានតម្លៃជាង ៩,៩១ ពាន់លានដុល្លារ និងអាមេរិកនាំចូលមកជាង ២៦៤ លានដុល្លារ៕

អត្ថបទ៖ ឡេង ដេត