ព័ត៌មានអន្ដរជាតិ

ឥណ្ឌូណេស៊ី៖ បញ្ហាអាកាសធាតុបង្កការខាតបង់ទិន្នផលដូងប្រេងរាប់ប៊ីលានដុល្លារ

បានផុស

២ ខែ មុន

នៅ

ថ្ងៃសៅរ៍ ១៥ កុម្ភៈ ២០២៥

ដោយ

ឥណ្ឌូណេស៊ីព្រមានថា ឧស្សាហកម្មដូងប្រេងប្រឈមមុខនឹងបញ្ហាកាន់តែខ្លាំងឡើងៗពីការប្រែប្រួលអាកាសធាតុ ជាមួយនឹងការអូសបន្លាយនៃគ្រោះរាំងស្ងួត និងកំណើនសីតុណ្ហភាព ដែលគំរាមកំហែងដល់ទិន្នផលដូងប្រេងគិតជាទឹកប្រាក់រាប់ប៊ីលានដុល្លារនៅក្នុងប្រទេសផលិតធំៗ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឥណ្ឌូណេស៊ីផ្ទាល់ ដែលជាប្រទេសនាំចេញដូងប្រេងដ៏ធំបំផុតមួយរបស់ពិភពលោក បានជួបប្រទះនឹងកង្វះខាតទឹកយ៉ាងធ្ងន់ធ្ងរនៅតាមតំបន់ដាំសំខាន់ៗផ្សេងៗ ដែលនាំឱ្យផលិតកម្មដូងប្រេងរបស់ប្រទេសនេះ ធ្លាក់ចុះរហូតដល់ ១០ ភាគរយជារៀងរាល់ឆ្នាំ។ នេះបើយោងតាមវិទ្យាស្ថានស្រាវជ្រាវ SMART ។ ប្រសិនបើនិន្នាការនេះនៅតែបន្ត ឧស្សាហកម្មដូងប្រេងឥណ្ឌូណេស៊ីអាចប្រឈមមុខនឹងការបាត់បង់រហូតដល់ ៤,៦ ប៊ីលានដុល្លារ ក្នុងមួយឆ្នាំៗ។

លោក Reni Subawati អ្នកស្រាវជ្រាវនៅវិទ្យាស្ថានស្រាវជ្រាវ SMART បានលើកឡើងក្នុងសន្និសីទអន្តរជាតិស្តីពីប្រេងដូង និងបរិស្ថាន (ICOPE) ២០២៥ នៅកោះបាលី កាលពីថ្ងៃសុក្រថា៖ «ការប្រែប្រួលអាកាសធាតុ កាន់តែមិនអាចទាយទុកជាមុនបាន ហើយផលប៉ះពាល់របស់វាទៅលើចម្ការ(ដូងប្រេង)គឺធ្ងន់ធ្ងរ។ នោះហើយជាមូលហេតុដែលយើងកំពុងបណ្ដុះគ្រាប់ពូជដូងប្រេងដែលពង្រឹងហ្សែន ដើម្បីធន់នឹងគ្រោះរាំងស្ងួត»។

ក្រៅតែពីឥណ្ឌូណេស៊ី ការប្រែប្រួលអាកាសធាតុក៏កំពុងរំខានដល់ឧស្សាហកម្មដូងប្រេងរបស់ប្រទេសកូឡុំប៊ីផងដែរ។ ថ្លែងនៅ ICOPE ដូចគ្នា លោក Ivan Mauricio Ayala Diaz នៃក្រុមហ៊ុនដូងប្រេង Cenipalma បានព្រមាន ថាការកើនឡើងសីតុណ្ហភាពសកល ការបំភាយឧស្ម័នផ្ទះកញ្ចក់ និងការដូរដីប្រើប្រាស់ កំពុងជះឥទ្ធិពលយ៉ាងធ្ងន់ធ្ងរដល់ប្រព័ន្ធអេកូឡូស៊ី សត្វព្រៃ ប្រជាជន និងចម្ការដូងប្រេង។

កង្វល់ដ៏គួរឱ្យព្រួយបារម្ភបំផុតមួយគឺការធ្លាក់ចុះនៃទិន្នផលដូងប្រេង ដោយចម្ការរបស់ប្រទេសកូឡុំប៊ីទទួលរងនូវភាពតានតឹងផ្នែកអេកូឡូស៊ី រួមទាំងជំងឺ ដែលបណ្ដាលមកពីកម្ដៅខ្លាំង៕