ព័ត៌មានអន្ដរជាតិ
អតិផរណាខែកុម្ភៈរបស់អាមេរិក ថយចុះមកត្រឹម ២,៨ ភាគរយ
អតិផរណាប្រចាំខែកុម្ភៈរបស់សហរដ្ឋអាមេរិក បានថយចុះជាលើកដំបូងក្នុងរយៈពេល ៥ ខែ មកត្រឹម ២,៨ ភាគរយ ទោះបីជាមានការព្រួយបារម្ភពីសម្ពាធតម្លៃជុំវិញគោលនយោបាយពន្ធគយរបស់លោកប្រធានាធិបតី ដូណាល់ ត្រាំ ក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

របាយការណ៍អតិផរណារបស់ការិយាល័យស្ថិតិការងារអាមេរិក ដែលចេញផ្សាយកាលពីថ្ងៃពុធ បានបង្ហាញថា សន្ទស្សន៍តម្លៃទំនិញប្រើប្រាស់ (CPI) ដែលវាស់វែងការប្រែប្រួលតម្លៃទំនិញ ពោលគឺអតិផរណា បានកើនឡើងត្រឹម ២,៨ ភាគរយ ក្នុងអត្រាប្រចាំឆ្នាំ កាលពីខែកុម្ភៈ ដែលនេះទាបជាង ០,២ ភាគរយ ធៀបនឹងកំណើន ៣ ភាគរយ នៅខែមករា។
ចំណែកឯ CPI ស្នូល ដែលមិនរាប់បញ្ចូលប្រភេទអាហារ និងថាមពល វិញ បានកើនឡើង ៣,១ ភាគរយ នៅខែកុម្ភៈ ដោយធ្លាក់ចុះពី ៣,៣ ភាគរយ កាលពីខែមករា។ នេះគឺជាកម្រិតទាបបំផុតនៃអតិផរណាស្នូល រាប់តាំងពីខែមេសា ឆ្នាំ ២០២១។
តួលេខ CPI ចុងក្រោយនេះ បង្ហាញការថយចុះទាបជាងការរំពឹងទុករបស់សេដ្ឋវិទូ ប៉ុន្តែនៅតែខ្ពស់ជាងឆ្ងាយធៀបនឹងអត្រាគោលដៅ ២ ភាគរយ របស់ធនាគារកណ្ដាលសហព័ន្ធអាមេរិក។ អតិផរណាបានធ្លាក់ចុះដល់ ២,៤ ភាគរយ កាលពីខែកញ្ញាឆ្នាំមុន ដែលជាចំណុចទាបបំផុត រាប់តាំងពីវាបានកើនដល់ ៩,១ ភាគរយ នៅខែមិថុនា ឆ្នាំ ២០២២។

តួលេខចុងក្រោយបង្ហាញជាលម្អិតថា តម្លៃប្រេងសាំងអាមេរិកបានធ្លាក់ចុះ ១ ភាគរយ ចំពេលតម្រូវការសកលធ្លាក់ចុះដោយសារបញ្ហាសេដ្ឋកិច្ច។ ប៉ុន្តែតម្លៃចំណីអាហារកើនឡើង ០,២ ភាគរយ ជាពិសេសស៊ុត ដែលបានកើនឡើង ១០,៤ ភាគរយ នៅខែកុម្ភៈ។ តម្លៃទំនិញនៅហាងមិនសូវជាមានការប្រែប្រួលពីខែមករានោះទេ។
សេដ្ឋវិទូលើកឡើងថា អតិផរណានៅខែកុម្ភៈបានបង្ហាញពីភាពធូរស្បើយខ្លះ ប៉ុន្តែវាក៏កំពុងស្ថិតនៅក្នុងភាពមិនប្រាកដប្រជាផងដែរ ជាពិសេសក្នុងស្ថានភាពសេដ្ឋកិច្ចបច្ចុប្បន្ន ខណៈគោលនយោបាយពន្ធរបស់លោក ត្រាំ អាចនឹងបង្កើនសម្ពាធអតិផរណា។ សេដ្ឋវិទូខ្លះលើកឡើងថា តួលេខខែកុម្ភៈ អាចបង្ហាញពីភាព «ស្ងប់ស្ងាត់មុនពេលព្យុះបក់បោកមកដល់» ចំពេលដែលបញ្ហាពន្ធដែលគ្រោងនឹងចូលជាធរមាន អាចធ្វើឱ្យទំនិញសហរដ្ឋអាមេរិកកាន់តែឡើងថ្លៃ នាពេលខាងមុខ៕

-
ចរាចរណ៍២២ ម៉ោង ago
ស្នងការរងខេត្តឧត្ដរមានជ័យម្នាក់ គាំងបេះដូងស្លាប់ពេលបើកបររថយន្ដ រួចជ្រុលបុករថយន្តមួយគ្រឿងទៀត
-
សន្តិសុខសង្គម១ សប្តាហ៍ ago
មនុស្ស៩នាក់ស្លាប់ក្នុងគ្រោះថ្នាក់ចរាចរណ៍នាថ្ងៃទី២នៃពិធីបុណ្យចូលឆ្នាំថ្មី
-
ព័ត៌មានអន្ដរជាតិ៦ ថ្ងៃ ago
ខេត្ត Phuket របស់ថៃរងការវាយប្រហារដោយទឹកជំនន់ភ្លាមៗ ក្រោយមានភ្លៀងធ្លាក់ខ្លាំង
-
ព័ត៌មានអន្ដរជាតិ៦ ថ្ងៃ ago
រុស្ស៊ី បង្ហាញឈ្មោះ៤ប្រទេស ដែលនឹងភ្លក់គ្រាប់របស់ខ្លួនមុនគេ ពេលផ្ទុះសង្គ្រាមធំ
-
សុខភាព២ ថ្ងៃ ago
ដំណឹងល្អ! កម្ពុជានឹងដាក់ឱ្យប្រើប្រាស់ថ្នាំព្រឹបប្រភេទចាក់បង្ការ មុនពេលប្រឈមនឹងការឆ្លងមេរោគអេដស៍ នៅខែឧសភា ខាងមុខ
-
ព័ត៌មានអន្ដរជាតិ៦ ថ្ងៃ ago
ខ្លះៗអំពីរថយន្តដែលលោក ស៊ី ជីនពីង យកពីចិនមកជិះនៅកម្ពុជា
-
ព័ត៌មានអន្ដរជាតិ៤ ថ្ងៃ ago
ត្រាំ ប្រកាសថា អាចនឹងលែងជួយបញ្ចប់សង្គ្រាមរុស្ស៊ី-អ៊ុយក្រែន បើមើលទៅ ពិបាកពេក
-
ព័ត៌មានអន្ដរជាតិ៦ ថ្ងៃ ago
សង្ក្រាន្ត៥ថ្ងៃនៅថៃ គ្រោះថ្នាក់ចរាចរណ៍ សម្លាប់មនុស្ស ១៧១នាក់