Tesla ​ព្រមាន​ពីហានិភ័យ​ពន្ធសងសឹក ដោយ​សារ​គោលនយោបាយ​ ត្រាំ

ក្រុមហ៊ុនផលិតរថយន្តអគ្គិសនី​ Tesla របស់​លោក អេឡុន ម៉ាសក៍ បាន​ព្រមាន​ពីហានិភ័យពន្ធសងសឹក​ដែល​ក្រុមហ៊ុននាំចេញ​អាមេរិកអាច​នឹង​ទទួលរង​ ​ក្រោម​ការឆ្លើយតប​របស់​ប្រទេស​ដទៃទៅនឹង​គោលនយោបាយពន្ធដ៏គឃ្លើន​របស់​ប្រធានាធិបតី ដូណាល់ ត្រាំ​។ នេះបើតាម​ការចុះ​ផ្សាយរបស់​ទីភ្នាក់ងារសារព័ត៌មាន​រ៉យទ័រ​។ ​

​ការព្រមាន​របស់​ក្រុមហ៊ុន Tesla កំពុងឆ្លុះបញ្ចាំងពីការព្រួយបារម្ភរបស់​អាជីវកម្មអាមេរិក​ អំពីផលប៉ះពាល់នៃពន្ធរបស់លោក ត្រាំ ចំពេល​សង្រ្គាម​ពាណិជ្ជកម្មពិភព​លោក​ផ្ទុះឡើង ដោយប្រទេស​ផ្សេងៗរួមទាំងចិន​ កាណាដា និងសហភាពអឺរ៉ុប បាន​ប្រកាសសងសឹក​។

​Tesla បាន​លើកឡើងពីកង្វល់របស់ខ្លួន​ក្នុង​លិខិត​ទៅកាន់​ការិយាល័យ​តំណាង​ពាណិជ្ជកម្ម​សហរដ្ឋ​អាមេរិក (USTR) ​ដែល​មាន​នៅ​លើ​គេហទំព័រ​របស់​ការិយាល័យនេះ​។ ​ចុះ​នៅថ្ងៃ​អង្គារ វា​ស្ថិត​ក្នុង​ចំណោមលិខិត​របស់​​ក្រុមហ៊ុនអាមេរិក​​រាប់រយ​ ដែល​បាន​បញ្ជូន​ទៅ​ការិយាល័យ​ អំពី​គោល​នយោបាយ​ពាណិជ្ជកម្ម​របស់​សហរដ្ឋ​អាមេរិក​។ ​

ក្រុមហ៊ុនបាននិយាយក្នុងលិខិតថា ​វាមានសារៈសំខាន់ណាស់ក្នុងការធានាថាកិច្ចខិតខំប្រឹងប្រែងរបស់រដ្ឋបាល ត្រាំ ក្នុងការដោះស្រាយបញ្ហាពាណិជ្ជកម្ម ដែល «មិនធ្វើឱ្យប៉ះពាល់ដល់ក្រុមហ៊ុនអាមេរិកដោយ​អចេតនា»។

ក្រុមហ៊ុនបានបន្តថា​ ​ខ្លួនចង់ជៀសវាងការសងសឹក ដែលក្រុមហ៊ុន​បាន​ប្រឈមមុខ​ក្នុងជម្លោះពាណិជ្ជកម្ម​ពីមុន ដែលបណ្តាលឱ្យមាន​កំណើន​ពន្ធលើរថយន្តអគ្គិសនី ដែលនាំចូលទៅកាន់ប្រទេស​ជាប់​ពន្ធរបស់សហរដ្ឋអាមេរិក ព្រោះប្រទេសនោះចេញវិធានការឆ្លើយ​តប​។ ​

គេមិនដឹង​ថា​តើ​មន្រ្តីរបស់ក្រុមហ៊ុន Tesla រូបណា​ជាអ្នក​ចេញ ឬ​សរសេរ​លិខិត​នោះទេ​ ខណៈក្រុមហ៊ុនក៏មិន​ទាន់ចេញ​ការបកស្រាយយ៉ាងណាដែរ​។ ការព្រមានរបស់ Tesla ធ្វើឡើង​​ខណៈ​លោក ដូណាល់ ត្រាំ បាន​គំរាម​ដាក់ពន្ធលើ​រថយន្តនាំចូល​​និងគ្រឿងបន្លាស់ ដែលផលិតក្រៅស្រុក ​រួមជាមួយ​ពន្ធ​លើទំនិញ​នាំចូល​ទូទៅផ្សេងៗ​ពីគ្រប់ប្រទេស​ «ដើម្បីជំរុញ​ផលិតកម្មក្នុងស្រុក​»។

Tesla ​លើកឡើងថា​ ទោះបីជាមានការខិតខំប្រឹងប្រែងដើម្បីធ្វើមូលដ្ឋានីយកម្មខ្សែច្រវ៉ាក់ផ្គត់ផ្គង់របស់ក្រុមហ៊ុន​ក៏ដោយ ក៏ខ្លួន​នៅតែពិបាក ឬ​មិន​អាច​ រក​ប្រភព​ផ្គត់ផ្គង់ក្នុងស្រុក​អាមេរិក​បាន។ ក្រុមហ៊ុន​ស្នើឱ្យមានវិធីសាស្រ្តជាដំណាក់កាល ដើម្បីអនុញ្ញាតឱ្យបណ្ដា​ក្រុមហ៊ុនអាមេរិក​រៀបចំ និងអនុវត្តតាម។ Tesla បន្តថា​ ក្នុងនាមជាក្រុមហ៊ុនផលិត និងអ្នកនាំចេញរបស់សហរដ្ឋអាមេរិក Tesla ជំរុញឱ្យ USTR ពិចារណាពីផលប៉ះពាល់​ធំ នៃ «សកម្មភាព​ដោះស្រាយការអនុវត្តពាណិជ្ជកម្មមិនយុត្តិធម៌»។

ក្រៅពី Tesla ​ក្រុមហ៊ុន​ Autos Drive America ដែលជាក្រុមពាណិជ្ជកម្មតំណាងឱ្យក្រុមហ៊ុនផលិតរថយន្តបរទេសធំៗ រួមមាន Toyota, Volkswagen, BMW, Honda និង Hyundai បានព្រមាន USTR នៅក្នុងលិខិត​ដាច់ដោយឡែកថា ការដាក់ពន្ធលើ​ទំនិញទូទៅរបស់​អាមេរិក នឹងរំខានដល់​ផលិតកម្ម​នៅរោងចក្រដំឡើង​ក្នុង​សហរដ្ឋអាមេរិក។

ចំណុចគួរឱ្យ​កត់សម្គាល់នោះគឺថា​ ការព្រមាន​របស់​ Tesla ធ្វើឡើងចំពេល​ដែលការលក់រថយន្តនៅដើមឆ្នាំនេះ ធ្លាក់ចុះ​នៅបណ្ដាទីផ្សារសំខាន់ៗរួមទាំងចិន និងអឺរ៉ុប ដោយសារតែកំណើននៃការប្រកួតប្រជែង និង​ការពាក់ព័ន្ធរបស់លោក ម៉ាសក៍ ទៅក្នុងនយោបាយរបស់អាមេរិក​ ដែល​បង្ក​ពហិការ​ពី​អ្នកប្រើប្រាស់​។ លោក​ ម៉ាសក៍ បច្ចុប្បន្ន​គឺជាសម្ព័ន្ធមិត្តដ៏ធំបំផុតរបស់លោក ត្រាំ ​ក្នុងចំណោមនាយកប្រតិបត្តិក្រុមហ៊ុនយក្សអាមេរិកទាំងអស់៕