ព័ត៌មានជាតិ

SchneiTec នឹងធ្វើការកៀរគរទុនប្រមាណ ៥០ ដុល្លារពីការបោះផ្សាយសញ្ញាបណ្ណបៃតងពី CSX

បានផុស

១ year មុន

នៅ

ថ្ងៃអង្គារ ១ មេសា ២០២៥

ដោយ

ក្រុមហ៊ុនផលិតថាមពលកកើតឡើងវិញឈានមុខគេមួយនៅកម្ពុជា SchneiTec Dynamic គ្រោងនឹងធ្វើការបោះផ្សាយសញ្ញាបណ្ណបៃតងជាមួយនឹងផែនការប្រមូលទុនប្រមាណ៥០លានដុល្លារ ដើម្បីយកទៅពង្រីកការវិនិយោគលើការផលិតថាមពស្អាតនេះនៅកម្ពុជាបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

SchneiTec Dynamic បានសាងសង់រោងចក្រផលិតថាមពឡសូឡាតាមបណ្តាខេត្តមួយចំនួននៅកម្ពុជារួមមានខេត្តពោធិសាត់ កំពង់ឆ្នាំង កំពង់ស្ពឺ និងស្វាយរៀង ដែលមានទំហំសរុប ២៤០ មេហ្គាវ៉ាត់ តាមរយៈក្រុមហ៊ុនជើងសារមូលបត្រ Yuanta Securities (Cambodia)ក្នុងការដាក់ផែនការកៀរគរប្រមាណ៥០លានដុល្លារពីការបោះផ្សាយសញ្ញាបណ្ណបៃតងនេះ។

យោងតាមសេចក្តីប្រកាសព័ត៌មានរបស់ក្រុមហ៊ុន Yuanta ដែលកម្ពុជាថ្មីទទួលបាននៅថ្ងៃទី១ខែមេសានេះ ក្រុមហ៊ុន SchneiTec គ្រោងនឹងធ្វើការចុះបញ្ជីបោះផ្សាយជាផ្លូវការនៅលើផ្សារមូលបត្រកម្ពុជា (CSX) នៅថ្ងៃទី១០ខែមេសាសប្តាហ៍ក្រោយ។

លោក Han Kyung Tae នាយកប្រតិបត្តិនៃក្រុមហ៊ុន Yuanta Securities (Cambodia) មានប្រសាសន៍ថា៖«សញ្ញាប័ណ្ណបៃតងនេះគឺមិនត្រឹមតែជាឧបករណ៍ហិរញ្ញវត្ថុថ្មីមួយប៉ុណ្ណោះទេ វាគឺជាព្រឹត្តិការណ៍ដ៏សំខាន់មួយសម្រាប់ទាំងទីផ្សារមូលបត្របំណុលរបស់ប្រទេសកម្ពុជា និងវិស័យថាមពលកកើតឡើងវិញរបស់កម្ពុជា ។ តាមរយៈការចាប់ផ្តើមបោះផ្សាយសញ្ញាប័ណ្ណនេះ យើងកំពុងធ្វើដំណើរឆ្ពោះទៅរកការវិនិយោគបន្ថែមទៀតនៅក្នុងគម្រោងថាមពលកកើតឡើងវិញ ដែលមានសារៈសំខាន់សម្រាប់កំណើនសេដ្ឋកិច្ចកម្ពុជាប្រកបដោយនិរន្តរភាព»។

លោក KT Han បានបញ្ចប់ថា៖ «នៅពេលវិនិយោគិនកាន់តែច្រើនទទួលស្គាល់ឱកាសក្នុងវិស័យថាមពលកកើតឡើងវិញរបស់កម្ពុជា យើងរំពឹងថានឹងមានលំហូរទុនកើនឡើងដែលនឹងជំរុញគម្រោងបៃតងបន្ថែម»។

លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា (SERC) បានលើកឡើងកាលពីខែុមុនថា CSX នឹងស្វាគមន៍ការចុះបញ្ជីបោះផ្សាយសញ្ញាប័ណ្ណបៃតង និងនិរន្តរភាពពីក្រុមហ៊ុនចំនួន៣ ដែលនឹងកៀរគរទុនប្រមាណជា១០០លានដុល្លារនៅក្នុងឆ្នាំ២០២៥នេះ។

លោកថា គិតត្រឹមថ្ងៃទី៤ខែមិនាឆ្នាំ២០២៥នេះ CSX មានក្រុមហ៊ុនចុះបញ្ជីចំនួន ២៤ ដែលមានមូលនិធិសរុបជាង ៤៧២ លានដុល្លារ។ ក្នុងចំណោមក្រុមហ៊ុនទាំង ២៤ នេះ មានក្រុមហ៊ុនចំនួន ៣ ដែលបានចុះបញ្ជីសញ្ញាប័ណ្ណបៃតង និងនិរន្តរភាព ដែលគោរពតាមស្តង់ដារសញ្ញាប័ណ្ណបៃតងអាស៊ាន និងគោលការណ៍សមាគមទីផ្សារមូលធនអន្តរជាតិ (ICMA)។

លោកស៊ូ សុជាតិបានថ្លែងបញ្ជាក់ថា៖« SERC នៅតែប្តេជ្ញាធ្វើការយ៉ាងជិតស្និទ្ធជាមួយដៃគូអភិវឌ្ឍន៍របស់យើង ដើម្បីប្រមូលធនធានដែលគាំទ្រដល់ការចេញមូលបត្របំណុលប្រកបដោយនិរន្តរភាព។ ការផ្លាស់ប្តូរទៅជាការវិនិយោគបៃតង និងនិរន្តរភាព គឺជាទំនួលខុសត្រូវរួមទាំង SERC និងភាគីពាក់ព័ន្ធទាំងអស់ រួមទាំងរដ្ឋាភិបាល អាជីវកម្ម អ្នកវិនិយោគ និងអ្នកបោះផ្សាយសញ្ញាប័ណ្ណ »៕