ក្រុមហ៊ុនចិនចង់នាំចេញកសិផលសក្ដា​នុពលកម្ពុជា

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនៅថ្ងៃទី ០៧ ខែមេសា ឆ្នាំ ២០២៥ បានជួបពិភាក្សាការងារជាមួយលោក Lu Wei ប្រធាន​ក្រុមហ៊ុន​ Angkor International Airport Investment (Cambodia) Co.,Ltd នៅទីស្តីការក្រសួងកសិកម្ម។

លោករដ្ឋមន្ត្រី ឌិត ទីណា បានស្វាគមន៍គណៈប្រតិភូចិន​ ដែលមានបំណងចង់នាំចេញកសិផលសក្តានុពលកម្ពុជាទៅកាន់ទីផ្សារប្រទេសចិន និងទីផ្សារអន្តរជាតិតាមជើងយន្តហោះ និងពិនិត្យស្នេីសុំគោលការណ៍ណែនាំក្នុងវិស័យកសិកម្មកម្ពុជា។

លោករដ្ឋមន្ត្រី​បានផ្តល់អនុសាសន៍ណែនាំឱ្យគណៈប្រតិភូចិន​ បង្កើនការផ្សព្វផ្សាយ និងស្វែងរកទីផ្សារសម្រាប់កសិផលកម្ពុជាជាមុន​ ដោយផ្ដោតសំខាន់លើផលិតផលប្រណីត មានគុណភាពល្អ​ អាចលក់ចេញក្នុងតម្លៃខ្ពស់​ ដើម្បីផ្ដល់ផលចំណេញដល់កសិករ និងក្រុមហ៊ុន។

បើតាមលោករដ្ឋមន្ត្រី​ ភស្តុភារកម្មក៏ជារឿងមួយសំខាន់ផងដែរ​ ដែលត្រូវគិតគូរ បង្កើតកន្លែងប្រមូលផ្តុំមួយដែលមានស្តង់ដាអន្តរជាតិ​ និងអាចនាំចេញទៅក្រៅប្រទេស។

កម្ពុជានឹងជួយគាំទ្រការរៀបចំស្តង់ដា​ និងលក្ខណៈពិសេសនៃកសិផលកម្ពុជា​សម្រាប់ការនាំចេញ។ ម្យ៉ាងវិញទៀត ភាគី​ចិនត្រូវសហការជាមួយក្រសួងកសិកម្ម​ ដើម្បីសិក្សារួមគ្នាពីកសិផលដែលអាចនាំចេញបានតាមជេីងយន្តហោះ​ មានតម្លៃខ្ពស់​ និងទទួលបានផលចំនេញទាំងអស់គ្នា៕