ការកក់បន្ទប់ពេញណែននៅសៀមរាប ខណៈគោលដៅទេសចរណ៍ផ្សេងភ្ញៀវបុកចំថ្ងៃចូលឆ្នាំ

ការកក់បន្ទប់ផ្ទះសំណាក់ សណ្ឋាគារសម្រាប់​ស្នាក់នៅក្នុងខេត្តសៀមរាបមុន​ពេ​ល​​ព្រឹត្តិ​ការ​​ណ៍​អង្គរ​សង្ក្រាន្ត​ឆ្នាំ ២០២៥ និងពិធីបុណ្យចូលឆ្នាំខ្មែរនៅខេត្តសៀមរាបពេញណែន ខណៈគោលដៅ​ទេសចរណ៍​មួយចំនួនមិនទាន់ពេញ។

លោក ប៊ុនធឿន បុគ្គលិកផ្នែកលក់នៅសណ្ឋាគារ La Residence Blanc D’Angkor Hotel បានឱ្យដឹងនៅថ្ងៃទី ១១ ខែមេសា ឆ្នាំ ២០២៥ ថា ការកក់បន្ទប់ស្នាក់នៅក្នុងឱកាស​​ព្រឹត្តិ​ការ​​ណ៍​អង្គរ​សង្ក្រាន្ត​ឆ្នាំ ២០២៥ និងពិធីបុណ្យចូលឆ្នាំខ្មែរពេញណែនចាល់ ពោលគឺមានកំណើន​ខ្ពស់​ជាង​​ឆ្នាំ​មុន។

លោកប្រាប់ថា សម្រាប់បន្ទប់គ្រែមួយ តម្លៃ ៤០ ដុល្លារ ក្នុងមួយយប់ ខណៈគ្រែ ២ ឬគ្រែ ៣ តម្លៃ ៥០ ដុល្លារ។

កញ្ញា ម៉ាលិស បុគ្គលិកផ្នែកលក់នៅសណ្ឋាគារ La Palmeraie d’Angkor Charming Hotel ប្រាប់ថា សណ្ឋាគាររបស់ខ្លួនមានភ្ញៀវខ្មែរកក់ពេញហើយ ខណៈមានភ្ញៀវមួយចំនួន​បានចាល់​ទៅ​សណ្ឋាគារផ្សេងៗ។

ដោយឡែក សម្រាប់គោលដៅទេសចរណ៍ខេត្តកែប និងខេត្តព្រះសីហនុ ការកក់បន្ទប់​ស្នាក់នៅ​មិនទាន់ពេញនោះទេ ខណៈបុគ្គលិកផ្នែកលក់បង្ហើបថា ទាល់តែដល់ថ្ងៃតែម្ដង​ទើបភ្ញៀវបុក​ចូលស្នាក់នៅ។

អ្នកនាង ស្រីមុំ បុគ្គលិកនៅសណ្ឋាគារ SARA VOAN ​ក្នុងខេត្តកែប បានប្រាប់ថា កំណើន​កក់ក្នុងឱកាសបុណ្យចូលឆ្នាំខ្មែរមានមធ្យម ពោលគឺមិនទាន់ពេញនោះទេ ខណៈ​តម្លៃឡើង​បន្តិច​ក្នុងថ្ងៃបុណ្យ។

លោក លឹក ដាឡៃ បុគ្គលិកសណ្ឋាគារកំពង់សោមថ្មីប្រាប់ថា៖ «និយាយទៅដូចរាល់ឆ្នាំ មុនបុណ្យ​មិនមានអ្នកកក់ទេ ប៉ុន្តែដល់ថ្ងៃគេមករកពេញតែម្ដង ខណៈតម្លៃឡើងថ្លៃ ៥ ដុល្លារគ្រែ១ និង គ្រែ ២ ឡើង ១០ ដុល្លារ»។

សូមជំរាបថា ពិធីបុណ្យចូលឆ្នាំខ្មែរឆ្នាំនេះនឹងប្រព្រឹត្តទៅរយៈពេល៣ ថ្ងៃ គឺថ្ងៃទី ១៤-១៦ ខែមេសា ឆ្នាំ២០២៥៕

អត្ថបទ៖ ឡេង ដេត