កម្ពុជា-ចិនយកអង្គការពាណិជ្ជកម្មពិភពលោកជាស្នូលដើម្បីការពារប្រយោជន៍ពាណិជ្ជកម្ម

ប្រទេសកម្ពុជា និងចិន ឯកភាពរួមគ្នាប្រឆាំងចំពោះពាណិជ្ជកម្មគាំពារនិយម ដោយប្ដេជ្ញាចិត្តក្នុងការលើកកម្ពស់ប្រព័ន្ធពាណិជ្ជកម្មពហុភាគីដោយយកយន្តការ​អង្គការពាណិជ្ជកម្មពិភពលោកជាស្នូល។

ក្នុងសេចក្ដីថ្លែងការណ៍រួម​ចុះថ្ងៃទី១៨ ខែមេសា ឆ្នាំ២០២៥ កម្ពុជានិងចិនបានបញ្ជាក់ថា​មានតែយន្តការអង្គការពាណិជ្ជកម្មពិភពលោក​មួយគត់ដែលធានា​នូវការធ្វើសេរីភាពនៃការធ្វើពាណិជ្ជកម្ម ការវិនិយោគ និងការសម្របសម្រួល ព្រមទាំងការពារសិទ្ធិនិងផលប្រយោជន៍ស្របច្បាប់​របស់ប្រទេសទាំងអស់។

ក្នុងសេចក្ដីថ្លែងការណ៍នោះសរសេថា៖ «ភាគីទាំងពីរបញ្ជាក់នូវការ​ប្ដេជ្ញាចិត្តយ៉ាងមុតមាំ ក្នុងការលើកកម្ពស់ប្រព័ន្ធពាណិជ្ជកម្មពហុភាគី ដែលមានអង្គការពាណិជ្ជកម្មពិភពលោកជាស្នូល អាចព្យាករណ៍បាន ផ្អែកលើច្បាប់ បើកចំហ មានតម្លាភាព បរិយាប័ន្ន និងមិនរើសអើង»។

កម្ពុជា-ចិន ក៏ប្រកាសត្រៀមខ្លួនចូលរួមជំរុញកំណែទម្រង់អង្គការនេះ និងត្រៀមធ្វើការរួមគ្នាដើម្បីទទួលបានលទ្ធផលជាក់ស្ដែងនៃសន្នីសិទអង្គការពាណិជ្ជកម្ម​ពិភពលោក​ថ្នាក់​រដ្ឋមន្ត្រីលើកទី១៤ ដើម្បីជំរុញសកលភាវូបនីយកម្មសេដ្ឋកិច្ចកាន់តែបើកចំហ បរិយាប័ន្ន តុល្យភាព និងផលប្រយោជន៍សម្រាប់ទាំងអស់គ្នា។

ការប្រការរួមរវាងកម្ពុជានិងចិននៅពេលនេះ ស្របពេលដែលមានសង្គ្រាមពាណិជ្ជកម្ម​អាមេរិក-​ចិន ដោយអាមេរិកបានតម្លើងពន្ធដល់២៤៥%លើទំនិញរបស់ចិន ខណៈកម្ពុជាក៏ស្ថិតក្នុងបញ្ជីនៃប្រទេសដែលត្រូវតម្លើងពន្ធដល់៤៩%ផងដែរតែត្រូវបានពន្យាពេល៩០ថ្ងៃសិនដើម្បីចរចា៕

អត្ថបទដោយ ហ៊ុន សិរីវឌ្ឍន៍