រាជរដ្ឋាភិបាល​កំណត់ការគ្រប់​គ្រងប្រព័ន្ធបញ្ជរតែមួយជាតិដើម្បីសម្រួលពាណិជ្ជកម្ម

តប​តាមសំណើ​របស់​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ និង​ជា​ប្រធានគណៈកម្មាធិការ​ដឹកនាំ គម្រោង​បញ្ជរ​តែ​មួយជាតិ រដ្ឋាភិបាល​កម្ពុជា សម្តេច ធិបតី ហ៊ុន ម៉ាណែត បាន​ចេញ​អនុក្រឹត្យ កំណត់​អំពី​ការ​គ្រប់គ្រង និង​កិច្ចដំណើរការប្រព័ន្ធបញ្ជរតែមួយជាតិ ដើម្បីលើក កម្ពស់​ប្រសិទ្ធភាព​នៃ​កិច្ចសម្រួលពាណិជ្ជកម្ម។

យោង​តាម​អនុក្រឹត្យ​ដែល​ចេញ​ដោយ​សម្តេច​ធិបតី នៅ​ថ្ងៃ​ទី​១០ ខែ​មេសា ឆ្នាំ​២០២៥ បាន​ឱ្យ​ដឹង​ថា អនុក្រឹត្យនេះ មានវិសាលភាពអនុវត្តចំពោះការស្នើសុំនិងការផ្តល់អាជ្ញាបណ្ណ លិខិតអនុញ្ញាត វិញ្ញាបនបត្រ និងការអនុញ្ញាតផ្សេងទៀត សម្រាប់ការនាំចេញ នាំចូល ឬទំនិញឆ្លងកាត់ដូចជា​ ទំនិញហាមឃាត់ និង​ជាប់កម្រិតកំណត់, ទំនិញស្ថិត​ក្នុងកាតព្វកិច្ចនៃការអនុវត្តកិច្ចព្រមព្រៀងពាណិជ្ជកម្មសេរី, ទំនិញស្ថិត​ក្នុងកាតព្វកិច្ច​នៃការអនុវត្តអនុសញ្ញាឬកិច្ចព្រមព្រៀងអន្តរជាតិផ្សេងទៀត, ផលិតផលតេលសិលា និង​ទំនិញនៃ​អគារលក់ទំនិញរួចពន្ធ, ទំនិញទទួលបានការលើកលែងពន្ធនិង/ឬអាករ របស់គម្រោងវិនិយោគ, ទំនិញទទួលបានការលើកលែងពន្ធនិងអាកររបស់ក្រសួង ស្ថាប័ន បេសកកម្មការទូត បេសកកម្ម, កុងស៊ុលបរទេស និងអង្គការជាតិ/អន្តរជាតិនានា និង​ទំនិញទទួលបានការលើកលែងពន្ធនិងអាករផ្សេងទៀត តាមច្បាប់និងបទប្បញ្ញត្តិជាធរមាន។

ក្នុង​នោះ ប្រព័ន្ធបញ្ជរតែមួយជាតិ សំដៅដល់ផ្ទាល់បច្ចេកវិទ្យាព័ត៌មានដែលអនុញ្ញាតឱ្យបុគ្គលដែល ពាក់ព័ន្ធនឹងការនាំចេញ នាំចូល និងទំនិញឆ្លងកាត់អាចស្នើសុំ អាជ្ញាបណ្ណ លិខិតអនុញ្ញាត វិញ្ញាបនបត្រ និងឯកសារតម្រូវផ្សេងទៀត ទៅគ្រប់ក្រសួង ស្ថាប័ន មានសមត្ថកិច្ចតែមួយលើក រួមគ្នា ដើម្បីទទួលបាននូវការអនុញ្ញាត សម្រាប់យកទៅប្រើក្នុងការបំពេញបែបបទបញ្ចេញទំនិញ ពីគយ តាមប្រព័ន្ធអេឡិចត្រូនិក។

នៅ​ក្នុង​អនុក្រឹត្យ​ដដែល ក៏​បាន​ឱ្យ​ដឹង​បន្ថែម​ថា ចំពោះ​ស្ថាប័នមានសមត្ថកិច្ច ប្រព័ន្ធបញ្ជរតែមួយជាតិ ត្រូវស្ថិតក្រោមការ​គ្រប់គ្រងរបស់គណៈកម្មាធិការដឹកនាំគម្រោងបញ្ជារ តែមួយជាតិ។ ក្នុង​នោះ ក្រសួង ស្ថាប័ន មានសមត្ថកិច្ចពាក់ព័ន្ធត្រូវផ្តល់អាជ្ញាបណ្ណ លិខិតអនុញ្ញាត វិញ្ញាបនបត្រ និង ការអនុញ្ញាតផ្សេង​ទៀតតាម​ប្រព័ន្ធ​បញ្ជរ​តែ​មួយ​ជាតិ ដែល​មានអាសយដ្ឋាន https://nsw.gov.kh សម្រាប់មុខទំនិញ​ដែលស្ថិត​ក្រោមសមត្ថកិច្ចគ្រប់គ្រងរបស់ខ្លួន ស្របតាមមាត្រា២ នៃអនុក្រឹត្យនេះ។

មិន​តែ​ប៉ុណ្ណោះ​ក្រសួង ស្ថាប័ន មានសមត្ថកិច្ចពាក់ព័ន្ធ​ត្រូវកំណត់​អំពី​នីតិវិធី​លម្អិត​បន្ថែម ពាក់ព័ន្ធ​​នឹង​ការផ្តល់ អាជ្ញាបណ្ណ លិខិតអនុញ្ញាត វិញ្ញាបនបត្រ និងការអនុញ្ញាតផ្សេងទៀត តាមតម្រូវការចាំបាច់ ដើម្បីធានា ប្រសិទ្ធភាព​នៃដំណើរការ និងការអនុវត្តប្រព័ន្ធបញ្ជរតែមួយជាតិ ព្រម​ទាំង​ត្រូវផ្តល់កិច្ចសហការ និងផ្លាស់ប្តូរទិន្នន័យ ឯកសារ និង​ព័ត៌មានតាម ប្រព័ន្ធ​អេឡិច​ត្រូនិក ស្របតាម​ច្បាប់ និងបទប្បញ្ញត្តិជាធរមាន។ 

ដោយ​ឡែក​បុគ្គល​ដែល​ពាក់ព័ន្ធ​នឹងការនាំចេញ នាំចូល និងទំនិញឆ្លងកាត់ អាចចូលប្រើប្រព័ន្ធបញ្ជរតែមួយជាតិ មានដូចជា មន្ត្រីដែលមានសមត្ថកិច្ចនៃក្រសួង ស្ថាប័នពាក់ព័ន្ធ, អង្គការ ស្ថានទូត ឬស្ថានកុងស៊ុល, អ្នកនាំចេញនាំចូល, ជើងសាគយ និង បុគ្គលផ្សេងទៀត​ដែលទទួលបាន​ការអនុញ្ញាតពីក្រុម​អនុវត្ត​គម្រោ​ងបញ្ជរតែមួយជាតិ ត្រូវស្នើសុំចុះឈ្មោះដើម្បីចូលប្រើប្រព័ន្ធបញ្ជារ តែមួយជាតិ​ស្របតាមបែបបទ​ និង​នីតិវិធីដែល​កំណត់​ដោយ​ក្រុមអនុវត្តគម្រោងបញ្ជរតែមួយជាតិ។

អ្នក​ពាក់ព័ន្ធ​ខាង​លើ​នេះ ត្រូវតែ​រក្សា​សុវត្ថិភាពទិន្នន័យ ព័ត៌មាន និង​គោរព​ឱ្យ​បាន​ខ្ជាប់ខ្ជួន​នូវ​ក្រមសីលធម៌ ការ​សម្ងាត់វិជ្ជាជីវៈ ស្របតាមច្បាប់និងបទប្បញ្ញត្តិជាធរមាន និង ទទួលខុសត្រូវលើទិន្នន័យដែលខ្លួនបានបង្កើត កែសម្រួល ផ្លាស់ប្តូរ ឬធ្វើបច្ចុប្បន្នភាពក្នុង ប្រព័ន្ធបញ្ជរតែមួយជាតិ។

ប្រព័ន្ធបញ្ជរតែមួយជាតិ ត្រូវបានតភ្ជាប់ជាមួយប្រព័ន្ធអេឡិចត្រូនិក​របស់ក្រសួង ស្ថាប័ននានា តាមការចាំបាច់ ក្នុងគោល​បំណងធ្វើឱ្យប្រសើរឡើងនូវកិច្ចសម្រួលពាណិជ្ជកម្ម តាមរយៈការផ្លាស់ប្តូរ ទិន្នន័យឬឯកសារពាណិជ្ជកម្មក្នុងទម្រង់អេឡិចត្រូនិក។ ​មិន​តែ​ប៉ុណ្ណោះ វា​ត្រូវបានតភ្ជាប់​ជាមួយប្រព័ន្ធ​បញ្ជរតែ​មួយអាស៊ាន និង/ឬ ប្រព័ន្ធ អេឡិចត្រូនិករបស់ប្រទេសដៃគូពាណិជ្ជកម្មនានា ដើម្បីផ្លាស់​ប្តូរទិន្នន័យ ឬឯកសារ​ពាណិជ្ជកម្មឆ្លងកាត់ ព្រំដែន​ក្នុង​ទម្រង់​អេឡិចត្រូនិក​ជាមួយបណ្តាប្រទេសទាំងនោះ ស្រប​តាមកិច្ចព្រមព្រៀង​ពាក់ព័ន្ធ​​នានា ដែល​កម្ពុជាបានផ្តល់​សច្ចាប័នរួចហើយ។

នៅ​ក្នុង​អនុក្រឹត្យ​ដដែល បាន​បង្ហាញ​ថា ការស្នើសុំអាជ្ញាបណ្ណ លិខិតអនុញ្ញាត វិញ្ញាបនបត្រ និង​ការអនុញ្ញាត​ផ្សេង​ទៀតត្រូវ​ធ្វើឡើង ដោយម្ចាស់ទំនិញ ឬតំណាង​ដែល​ទទួលបាន​ការអនុញ្ញាត​ឱ្យបំពេញ​បែបបទក្នុងនាមម្ចាស់ទំនិញដោយ ត្រូវផ្តល់ព័ត៌មានស្របតាមនីតិវិធីនិងបទប្បញ្ញត្តិជាធរមាន។ ក្រសួង ស្ថាប័ន មានសមត្ថកិច្ចពាក់ព័ន្ធ មានភារកិច្ចពិនិត្យនិងសម្រេចលើការផ្តល់អាជ្ញាបណ្ណ លិខិតអនុញ្ញាត វិញ្ញាបនបត្រ និងការអនុញ្ញាតផ្សេងទៀត ដោយផ្អែកលើគោលការណ៍ហានិភ័យ ស្របតាមបទប្បញ្ញត្តិជាធរមាន។ លើស​ពី​នេះ​ទៀត ត្រូវពិនិត្យនិងសម្រេចក្នុងរង្វង់រយៈពេល ៣ (បី)ថ្ងៃនៃថ្ងៃ ធ្វើការ គិតចាប់​ពីពេលទទួល​បានការស្នើសុំ និងឯកសារគ្រប់គ្រាន់តាមការកំណត់។

ក្នុងករណីប្រធានសក្តិ ឬដោយ​សារបញ្ហាបច្ចេកទេសជាយថាហេតុ បណ្តាលឱ្យប្រព័ន្ធបញ្ជារ តែមួយជាតិ ឬ​ប្រព័ន្ធរបស់ក្រសួង ស្ថាប័ន មិន​អាច​ដំណើរការបាន ក្រសួង ស្ថាប័នមានសមត្ថកិច្ចពាក់ព័ន្ធ អាចចាត់ចែង​អនុវត្តនីតិវិធីនៅ​ក្រៅប្រព័ន្ធ​ជាបណ្តោះអាសន្នតាមបទប្បញ្ញត្តិជាធរមាន ដោយត្រូវជូន ដំណឹង​មក​គណៈកម្មាធិការ​ដឹកនាំ​គម្រោង​បញ្ជរ​​តែមួយជាតិ និងក្រុមអនុវត្តគម្រោងបញ្ជរតែមួយជាតិ រហូតដល់ប្រព័ន្ធដំណើរការឡើងវិញ។

ក្នុង​នោះ​ដែរ​ក្រុមអនុវត្តគម្រោងបញ្ជរតែមួយជាតិត្រូវ​តែ​គ្រប់គ្រង និង​ផ្តល់គណនីប្រើ​ប្រព័ន្ធជូន​បុគ្គលពាក់ព័ន្ធ​ដូចមានចែង​ស្របតាមការស្នើសុំ ថែទាំ រក្សាសុវត្ថិភាព និងធ្វើបច្ចុប្បន្នកម្មប្រព័ន្ធបញ្ជរតែមួយជាតិ និង​សម្របសម្រួល​ដើម្បីពង្រីកការតភ្ជាប់ ធានានិរន្តរភាពក្នុងការងារតភ្ជាប់ និងកិច្ចដំណើរការ នៃប្រព័ន្ធរបស់ក្រសួង ស្ថាប័នពាក់ព័ន្ធ។

ជា​មួយ​គ្នា​នោះ ការយកកម្រៃសេវាសាធារណៈ​សម្រាប់ការផ្តល់អាជ្ញាបណ្ណ លិខិតអនុញ្ញាត វិញ្ញាបនបត្រ និង ការអនុញ្ញាតផ្សេងទៀតតាមប្រព័ន្ធបញ្ជរតែមួយជាតិ ត្រូវស្របតាមបទប្បញ្ញត្តិជាធរមាន។ រាល់ការទូទាត់​កម្រៃ​សេវា​សាធារណៈ​​ក្នុងប្រព័ន្ធបញ្ជរតែមួយជាតិ ត្រូវធ្វើឡើងតាមរយៈប្រព័ន្ធ អេឡិចត្រូនិក លើកលែង​មាន​ការ​កំណត់​ដោយឡែក។ ក្រុមអនុវត្តគម្រោងបញ្ជរតែមួយជាតិត្រូវបន្តសម្របសម្រួលជាមួយបណ្តាក្រសួង ស្ថាប័នពាក់ព័ន្ធ ដើម្បីឱ្យការទូទាត់តាមប្រព័ន្ធអេឡិចត្រូនិកប្រព្រឹត្តទៅដោយរលូន ពេញលេញ និងមានប្រសិទ្ធភាព។

លិខិតបទដ្ឋានគតិយុត្តពាក់ព័ន្ធកិច្ចដំណើរការតាមប្រព័ន្ធបញ្ជរតែមួយជាតិ ត្រូវបន្តនិរន្តរភាព របស់ខ្លួន ដោយអនុលោមតាមលិខិតបទដ្ឋានគតិយុត្តពាក់ព័ន្ធជាធរមាន រហូតដល់មានលិខិតបទដ្ឋាន គតិយុត្តថ្មីមកជំនួស។ បទប្បញ្ញត្តិទាំងឡាយណាដែលផ្ទុយនឹងអនុក្រឹត្យនេះ ត្រូវទុកជានិរាករណ៍។

រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីគ្រប់ ក្រសួង និងប្រធានគ្រប់ស្ថាប័ន​ដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួន ចាប់​ពីថ្ងៃ​ចុះហត្ថលេខា​តទៅ៕