ព័ត៌មានអន្ដរជាតិ

ឡាវគ្រោងបើកស្ថានីយថាមពលខ្យល់ធំបំផុតនៅអាស៊ាន

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ២២ ឧសភា ២០២៥

ដោយ

ប្រទេសឡាវគ្រោងបើកដំណើរការស្ថានីយថាមពលអគ្គិសនីដើរដោយកម្លាំងខ្យល់ដំបូងបង្អស់របស់ខ្លួន និងដ៏ធំបំផុតនៅអាស៊ីអាគ្នេយ៍ នាចុងឆ្នាំនេះ ដោយឥឡូវនេះបានដំឡើងទួរប៊ីនខ្យល់ចំនួន ១៣៣ រួចរាល់ហើយ។ នេះបើតាមការចុះផ្សាយរបស់កាសែត Laotian Times។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងខ្យល់មូសុង ដែលមានអនុភាព ៦០០ មេហ្គាវ៉ាត់ ក្នុងតម្លៃ ៩៣០ លានដុល្លារអាមេរិក លាតសន្ធឹងលើផ្ទៃដី ៦៨ ០០០ ហិកតា នៅទូទាំងស្រុក Dak Cheung ក្នុងខេត្តសេកុង និងស្រុក Sanxay ក្នុងខេត្ត Attapeu ។ វាគឺជាគំនិតផ្តួចផ្តើមថាមពលខ្យល់ឆ្លងព្រំដែនដំបូងគេរបស់តំបន់។

ស្ថានីយថាមពលខ្យល់ដដែល មានទួរប៊ីនដែលមានកម្ពស់ ១៤០ និង ១១០ ម៉ែត្រ ដែលត្រូវបានដំឡើងដាក់ដោយផ្អែកលើទិន្នន័យខ្យល់ ដែលគេប្រមូលបានចន្លោះពីឆ្នាំ ២០១៥-២០២៣។ អគ្គិសនីដែលផលិតបាន នឹងត្រូវនាំចេញទៅប្រទេសវៀតណាមក្រោមកិច្ចព្រមព្រៀងទិញថាមពលរយៈពេល ២៥ ឆ្នាំជាមួយក្រុមហ៊ុន Vietnam Electricity (EVN)។

បើតាម Laotian Times គម្រោងនេះត្រូវបានអភិវឌ្ឍដោយក្រុមហ៊ុន Impact Energy Asia Development Co., Ltd. ដែលបានចុះហត្ថលេខាលើអនុស្សរណៈនៃការយោគយល់គ្នាជាលើកដំបូងជាមួយរដ្ឋាភិបាលឡាវក្នុងឆ្នាំ ២០១១ ដើម្បីវាយតម្លៃលទ្ធភាពរបស់គម្រោង។ គម្រោងបានឈានទៅមុខជាផ្លូវការក្នុងឆ្នាំ ២០២២ បន្ទាប់ពីទទួលបានកិច្ចព្រមព្រៀងសម្បទាន ហើយស្ថិតនៅក្រោមប្រតិបត្តិការរបស់ក្រុមហ៊ុន Monsoon Wind Power Company Limited៕