ក្រុមហ៊ុនថៃកំពុងស្វែងរកឱកាសវិនិយោគ និងពង្រីកអាជីវកម្មនៃការដាក់ឱ្យដំណើការអាកាស​យានដ្ឋាន​អន្តរជាតិតេជោ

បណ្តាទុរជន និងវិនយោគិនមកពីវិស័យទេសចរណ៍ អាកាសចរណ៍ និងវិស័យពាក់ព័ន្ធនានារបស់ថៃ កំពុងសំឡឹងមើលឱកាសវិនិយោគក្នុងការចាប់យកផលប្រយោជន៍នៃការដាក់ឱ្យដំណើការជំហ៊ានទី១របស់អាកាសយានដ្ឋាន​អន្តរជាតិតេជោ (TAI) នៅថ្ងៃទី៩ ខែកញ្ញាខាងមុខនេះ។​

នៅថ្ងៃទី ០៤ ខែមិថុនា ឆ្នាំ ២០២៥ លោក Tull Traisorat ឯកអគ្គរាជទូត នៃព្រះរាជាណាចក្រថៃ ប្រចាំកម្ពុជា បានដឹកនាំគណៈប្រតិភូ និងផ្នែកឯកជន ទស្សនកិច្ចអាកាសយានដ្ឋាន​អន្តរជាតិតេជោ ដើម្បីឱ្យក្រុមហ៊ុនស្វែងរកឱកាសវិនិយោគបន្ថែមទៀត។

លោក Tull Traisorat បានថ្លែងប្រាប់អ្នកសារព័ត៌មានថា គោលបំណងសំខាន់នៃទស្សន​កិច្ចនេះ ក៏ជា​ឱកាសក្នុង​ការស្វែងរកការវិនិយោគ​បន្ថែមរបស់​ក្រុមហ៊ុនថៃ ជាមួយក្រុមហ៊ុន​នៅក្នុងព្រលានយន្តហោះអន្តរជាតិតេជោ ដោយក្រុមហ៊ុនថៃ​ចង់វិនិយោគលើភោជនីយដ្ឋាន និងហាងកាហ្វេ។

លោក Tull Traisorat បានបន្ថែមថា ភាគីថៃចង់ចូលរួមចំណែកក្នុងការវិនិយោគ ក្នុងតំបន់​សេដ្ឋកិច្ចពិសេស របស់ព្រលានយន្តហោះ និងទំនាក់ទំនងផ្សេងៗ ដូចជាវិស័យ​ធនាគារ សុខាភិបាល។

លោកឯកអគ្គរាជទូតថៃ បានបញ្ជាក់ថា ក្នុងឆ្នាំនេះ ជាឆ្នាំស្ថាបនាទំនាក់ទំនងការទូត ៧៥ ឆ្នាំ កម្ពុជា-ថៃ ដោយលោករំពឹងថានឹងបង្កើនជើងហោះហើរត្រង់បន្ថែមទៀត មានដូចជា​ពីតំបន់ផ្សេងៗ​នៅប្រទេសថៃ មកកម្ពុជា ដែលជាចំណែកមួយក្នុងការជួយ​ជំរុញការធ្វើវិនិ​យោគ និង​ពាណិជ្ជកម្ម និងទេសចរណ៍។

យោងតាមក្រសួងទេសចរណ៍ នៅក្នុងឆ្នាំ ២០២៤ កម្ពុជា​ទទួលបានភ្ញៀវទេសចរណ៍​អន្តរជាតិ​ជាង ៦,៧ លាន​នាក់ ​កើន​ឡើង​ជិត ២៣ ភាគរយ ដោយទទួលបានប្រាក់ចំណូលសរុបជាង ៣,៦៣ ពាន់លានដុល្លារ កើនឡើង​ប្រមាណ​ជាង ១៧% ធៀបនឹងឆ្នាំ ២០២៣។

ក្នុងចំណោមភ្ញៀវទេសចរជាង ៦,៧ លាន​នាក់ ទេសចរណ៍ថៃឈរនៅ​លំដាប់​លេខរៀងទី ១ មាន​ចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥%​ ចិនជាង ៨៤ ម៉ឺននាក់ កើន ៥៥% ភ្ញៀវទេស​ចរ​ឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

អត្ថបទ៖ ឡេង ដេត