ព័ត៌មានអន្ដរជាតិ

អាមេរិកដាក់ពន្ធប្រឆាំងការលក់បង្ខូចតម្លៃលើក្រុមហ៊ុននាំចេញបង្គាវៀតណាមជាង ២០

បានផុស

២ ខែ មុន

នៅ

ថ្ងៃចន្ទ ៩ មិថុនា ២០២៥

ដោយ

ក្រសួងពាណិជ្ជកម្មសហរដ្ឋអាមេរិក (DOC) បានចាត់វិធានការបឋម ដោយដាក់ពន្ធប្រឆាំងការលក់បង្ខូចតម្លៃ ៣៥ ភាគរយ លើក្រុមហ៊ុននាំចេញបង្គាពីប្រទេសវៀតណាមចំនួន ២៤។ នេះបើតាមការចុះផ្សាយរបស់កាសែត VnExpress កាលពីថ្ងៃអាទិត្យ ដោយស្រង់របាយការណ៍របស់សមាគមអ្នកនាំចេញ និងផលិតអាហារសមុទ្រវៀតណាម (VASEP)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បានឱ្យដឹងថា ការសម្រេចចិត្តរបស់អាមេរិកនាពេលនេះ ធ្វើឡើងក្រោយពីបានត្រួតពិនិត្យ របាយការណ៍«ផ្នែករដ្ឋបាលលើកទី ១៩» របស់ DOC ដែលចេញផ្សាយកាលពីថ្ងៃសៅរ៍ អំពីការនាំចូលបង្គាបង្កកពីប្រទេសវៀតណាម ចន្លោះពីថ្ងៃទី ១ កុម្ភៈ ឆ្នាំ ២០២៣ ដល់ថ្ងៃទី ៣១ ខែមករា ឆ្នាំ ២០២៤។

យោងតាម VASEP ក្រសួង DOC បានកំណត់ថា ក្រុមហ៊ុនវៀតណាម Thong Thuan មិនបានលក់បង្គាក្រោមតម្លៃសមរម្យនោះ ដែលធ្វើឱ្យក្រុមហ៊ុនមិនជាប់គោលដៅពន្ធប្រឆាំងការលក់បង្ខូចតម្លៃ។

ផ្ទុយទៅវិញ ក្រុមហ៊ុននាំចេញបង្គា STAPIMEX បានរងនូវអត្រាពន្ធនេះខ្ពស់រហូតទៅដល់ ៣៥,២៩ ភាគរយ។ អត្រាដូចគ្នានេះ ក៏ត្រូវបានអនុវត្តចំពោះក្រុមហ៊ុនចំនួន ២២ ផ្សេងទៀតផងដែរ ទោះបីជាពួកគេមិនរងការស៊ើបអង្កេតដោយផ្ទាល់ក្ដី។

VASEP និងក្រុមហ៊ុនដែលរងផលប៉ះពាល់ទាំងអស់ បានសម្តែងការភ្ញាក់ផ្អើល និងការព្រួយបារម្ភយ៉ាងខ្លាំងចំពោះអត្រាពន្ធបឋមខ្ពស់ខុសពីធម្មតានេះ។ សមាគមបាននិយាយក្នុងសេចក្តីថ្លែងការណ៍ថា៖ «ក្នុងរយៈពេល ១៩ ឆ្នាំ ដែលវៀតណាមបានចូលរួមក្នុងការត្រួតពិនិត្យផ្នែករដ្ឋបាលសម្រាប់ករណីប្រឆាំងការលក់បង្ខូចតម្លៃ គ្មានក្រុមហ៊ុនណាមួយដែលទទួលពន្ធបឋមដល់ ២ ខ្ទង់ទេ»។

VASEP និងសហគ្រាសពាក់ព័ន្ធសង្ស័យថា មានកំហុស ឬការយល់ច្រឡំក្នុងលទ្ធផលស៊ើបអង្កេតរបស់ DOC។ សមាគមបានលើកឡើងថា ទោះមានការស៊ើបអង្កេតបន្តទៀត សេចក្តីប្រកាសចុងរបស់ DOC បានធ្វើឱ្យក្រុមហ៊ុននាំចូលទៅអាមេរិកជួបបញ្ហា បង្អាក់ផែនការពាណិជ្ជកម្ម និងរង្គោះរង្គើទំនុកចិត្តរបស់អ្នកចិញ្ចឹមបង្គាវៀតណាម ចំពេលដែលប្រទេសនេះប្រឈមមុខនឹងការដំឡើងពន្ធគយបដិការខ្ពស់ ៤៦ ភាគរយ រួចហើយ។

គួរគូសបញ្ជាក់ថា វៀតណាមគឺជាអ្នកផ្គត់ផ្គង់បង្គាក្លាសេធំជាងគេទី ៤ ទៅកាន់សហរដ្ឋអាមេរិក បន្ទាប់ពីឥណ្ឌា អេក្វាឌ័រ និងឥណ្ឌូណេស៊ី ដោយតម្លៃនៃការនាំចេញមានប្រមាណ ៦៩១ លានដុល្លារ កាលពីឆ្នាំមុន។