ក្រុមហ៊ុនសំណង់ចិន​ចង់បោះទុនវិនិយោគនៅខេត្តព្រះសីហនុ ក្នុងការពង្រីកខ្លួនលើវិស័យនេះក្នុងតំបន់

ក្រុមហ៊ុន Guangwang Integrated Housing Co., Ltd ដែលជាក្រុមហ៊ុនវិនិយោគផ្នែកសំណង់លំនៅឋាន ផ្ទះចល័ត និងផ្ទះលំហែកាយធំជាងគេមួយរបស់ចិន រួមជាមួយក្រុមហ៊ុនសំណង់ចិន៥ផ្សេងទៀតបានធ្វើការសិក្សាឱកាសវិនិយោគនៅខេត្តព្រះសីហនុ ដើម្បីពង្រីកវត្តមានរបស់ខ្លួននៅក្នុងតំបន់។

ការបង្ហាញអំពីផែនការពង្រីកការវិនិយោគនេះត្រូវបានធ្វើឡើងកាលពីថ្ងៃទី ១៤ ខែមិថុនា ឆ្នាំ២០២៥ ក្នុងជំនួបរវាងលោក ម៉ាង ស៊ីណេត អភិបាលខេត្តព្រះសីហនុ ​ជាមួយក្រុមហ៊ុនវិនិយោគចំនួន ៥ក្រុមហ៊ុន មកពីសាធារណរដ្ឋប្រជាមានិតចិន ដឹកនាំដោយលោក Tang Choayang ប្រធានក្រុមហ៊ុន Guangwang Integrated Housing Co., Ltd ដែលជាក្រុមហ៊ុនវិនិយោគផ្នែកសំណង់លំនៅឋាន ផ្ទះចល័ត និងផ្ទះលំហែកាយ ក្នុងបំណង សិក្សាឱកាសវិនិយោគនៅខេត្តព្រះសីហនុ ដើម្បីពង្រីកទីផ្សារក្នុងតំបន់។

យោងតាមរដ្ឋបាលខេត្តព្រះសីហនុន ក្រុមហ៊ុនខាងលើ បានចូលរួមវេទិកាជំរុញវិនិយោគខេត្តព្រះសីហនុ នៅខេត្តអានហ៊ួយ សាធារណរដ្ឋប្រជាមានិតចិន កាលពីថ្ងៃទី៧ ខែមិថុនា ឆ្នាំ២០២៥ កន្លងទៅថ្មីៗនេះ។ ដោយមានការចាប់អារម្មណ៍ពីសក្តានុពលនៅខេត្តព្រះសីហនុ ទើបក្រុមហ៊ុនរបស់ពួកគាត់ បានសម្រេចចិត្តមកសិក្សាដោយផ្ទាល់ដើម្បីស្វែងយល់ឱ្យកាន់តែច្បាស់បន្ថែមទៀតនិងឈានទៅដល់ការសម្រេចចិត្តបណ្ដាក់ទុនវិនិយោគនៅក្នុងខេត្តព្រះសីហនុ។

«ទាំងនេះគឺជាលទ្ធផលប្រកបដោយផ្លែផ្កា បន្ទាប់ពីវេទិកាជំរុញការវិនិយោគខេត្តព្រះសីហនុ នៅសាធារណរដ្ឋប្រជាមានិតចិន ដើម្បីផ្សព្វផ្សាយ និងទាក់ទាញវិនិយោគមកកាន់ព្រះរាជាណាចក្រកម្ពុជានិយាយជារួម និងនិយាយដោយឡែកគឺនៅខេត្តព្រះសីហនុ។ ដោយត្រឹមតែរយៈពេល១សប្តាហ៍បន្ទាប់ពីការធ្វើវេទិកា គឺទទួលបានការចាប់អារម្មណ៍យ៉ាងច្រើនពីសំណាក់វិនិយោគិនចិន មកធ្វើការសិក្សាស្វែងយល់អំពីសក្តានុពល និងឱកាសវិនិយោគនៅក្នុងខេត្តព្រះសីហនុជាបន្តបន្ទាប់»។ នេះបើយោងតាមរដ្ឋបាលខេត្ត។​

​ តាមរយៈជំនួបរវាងលោកអភិបាលខេត្តព្រះសីហនុ និង លោកអភិបាលខេត្តជាំងស៊ូ នៃសាធារណរដ្ឋប្រជាមានិតចិន កាលពីថ្ងៃទី៧ ខែមិថុនា ឆ្នាំ២០២៥ កន្លងមក អភិបាលខេត្តជាំងស៊ូ បានបញ្ជាក់ថាលោកបានណែនាំដល់មន្ទីរពាណិជ្ជកម្មខេត្តជាំងស៊ូ ឱ្យដឹកនាំប្រតិភូអ្នកវិនិយោគចិនចំនួន៥០ក្រុមហ៊ុន ទៅធ្វើទស្សនកិច្ចសិក្សាស្វែងយល់ពីឱកាសវិនិយោគនៅខេត្តព្រះសីហនុ នាពេលឆាប់ៗខាងមុខនេះផងដែរ។

គិតចាប់ពីដើមឆ្នាំ២០២៤ ដល់ខែឧសភា ឆ្នាំ២០២៥ ក្រុមការងារជំរុញការវិនិយោគ​ខេត្តព្រះ​សីហនុបានអនុម័តគម្រោងចំនួន ២៩៦ ដែលមានទុនវិនិយោគប្រមាណ ៧ ពាន់លានដុល្លារ និងអាចបង្កើតការងារថ្មីចំនួន ៥៣ ២០៥កន្លែង។

គម្រោងដែលទទួលបានគោលការណ៍លើកទឹកចិត្តច្រើនជាងគេ គឺគម្រោងអគារជាប់គាំងចំនួន​១៣១ ស្មើនឹង ៤៤ភាគរយ គម្រោងវិនិយោគថ្មីចំនួន១៣០ ស្មើនឹង ៤៤ភាគរយ គម្រោងពង្រីក​ចំនួន២៤ ស្មើនឹង ៨ភាគរយ និងគម្រោងមានស្រាប់ចំនួន១១ ស្មើនឹង ៤ភាគរយ។

លើទិដ្ឋភាពវិស័យគម្រោងប្រមាណ ៩៤ភាគរយ ប្រមូលផ្តុំក្នុងវិស័យចំនួន៣ គឺវិស័យអចនទ្រព្យ​ចំនួន ១១៨គម្រោង វិស័យទេសចរណ៍មចំនួន ៩៨គម្រោង និងវិស័យឧស្សាហកម្មចំនួន ៦១គម្រោង។

គម្រោងប្រមាណ ៦,៤ភាគរយផ្សេងទៀត ឬ ១៩គម្រោង មាននៅក្នុងវិស័យ​សេវា​កម្ម វិស័យកសិកម្ម វិស័យអប់រំ និងវិស័យសុខាភិបាល។ ទន្ទឹមនេះក្នុងវិស័យឧស្សាហកម្ម ក្រុមការ​ងារបានផ្តល់គោលការណ៍លើកទឹកចិត្តដល់គម្រោងសួនឧស្សាហកម្ម និងតំបន់សេដ្ឋកិច្ច​ពិ​សេស​ថ្មី​ចំនួន៤ មានទុនវិនិយោគសរុបចំនួនប្រមាណ ១១០លានដុល្លារអាម៉េរិក ហើយរំពឹងថា នឹង​បង្កើត​ការងារថ្មីចំនួន ១៥,២២០កន្លែង។

«កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» រាជរដ្ឋាភិបាលកម្ពុជាបានសម្រេចយល់ព្រមបន្តអនុវត្តរហូតដល់ដំណាច់ឆ្នាំ២០២៥ ដើម្បីជំរុញការអភិវឌ្ឍខេត្តព្រះសីហនុ ឆ្លើយតបនឹងគោលបំណងរបស់រាជរដ្ឋាភិបាល និងធានាចីរភាពនៃមុខងារគាំទ្រ វិនិយោគតាមរយៈការផ្ទេរ និងកសាងសមត្ថភាពជូនដល់រដ្ឋបាលខេត្តព្រះសីហនុ ជាបន្តបន្ទាប់៕