ព័ត៌មានអន្ដរជាតិ

វៀតណាមគ្រោងផាកអ្នកជក់បារីអេឡិចត្រូនិកពី ១២០-២០០ ដុល្លារ

បានផុស

៣៥ វិនាទី មុន

នៅ

ថ្ងៃអង្គារ ១៧ មិថុនា ២០២៥

ដោយ

ក្រសួងសុខាភិបាលវៀតណាម មានគម្រោងផាកពិន័យជាប្រាក់ពី ៣-៥ លានដុង (១២០-២០០ ដុល្លារ) ចំពោះអ្នកប្រើប្រាស់បារីអេឡិចត្រូនិក និងផលិតផល អេចន៍ ធី ភី (HTPs-Heated Tobacco Products) ដោយគ្រោងនឹងបំផ្លាញផលិតផលទាំងនោះចោល តាមការគូសបញ្ជាក់ក្នុងសេចក្តីព្រាងក្រឹត្យរបស់ក្រសួងស្តីពីការពិន័យ ដែលបច្ចុប្បន្នកំពុងបើកទទួលមតិសាធារណៈ។ នេះបើតាមការចុះផ្សាយរបស់កាសែត VnExpress កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីព្រាងក្រឹត្យក៏ស្នើផងដែរ លើការផាកពិន័យពី ៥-១០ លានដុង ចំពោះបុគ្គលណាដែលអនុញ្ញាតឱ្យអ្នកដទៃប្រើប្រាស់ផលិតផលទាំងនោះ ក្នុងទ្រព្យសម្បត្តិ ឬក្រោមការគ្រប់គ្រងរបស់ពួកគេ ដោយគ្មានការអន្តរាគមន៍ ឬរាយការណ៍ទៅអាជ្ញាធរមានសមត្ថកិច្ច។

សេចក្ដីព្រាងក្រឹត្យដដែល ធ្វើឡើងក្រោយវៀតណាមក្លាយជាប្រទេសអាស៊ីអាគ្នេយ៍ទី ៦ និងទី ៤៣ នៅទូទាំងពិភពលោកក្នុងការហាមឃាត់បារីអេឡិចត្រូនិក និងផលិតផល អេចន៍ ធី ភី។

ខណៈទំនិញទាំងនោះ ត្រូវបានចុះបញ្ជីថាជាទំនិញហាមឃាត់ ហើយការបំពានណាមួយប្រឈមនឹង «ការផាកពិន័យ» ប៉ុន្តែវៀតណាមមិនទាន់មានការផាកពិន័យជាក់លាក់សម្រាប់ការកាន់កាប់ ឬប្រើប្រាស់ នៅឡើយទេ ដែលនាំឱ្យក្រសួងស្នើបទប្បញ្ញត្តិថ្មីទាំងនេះឡើង។

បើតាម VnExpress ការប្រើប្រាស់បារីអេឡិកត្រូនិក និងផលិតផល អេចន៍ ធី ភី កំពុងកើនឡើងយ៉ាងឆាប់រហ័សនៅវៀតណាម ជាពិសេសក្នុងចំណោមមនុស្សវ័យជំទង់។ កន្លងមក ក្រសួងសុខាភិបាលវៀតណាមបានព្រមានថា ការប្រើប្រាស់មានគ្រោះថ្នាក់ជាពិសេសសម្រាប់យុវជន។

កាលពី ២ ឆ្នាំមុន មនុស្ស ១ ២២៤ នាក់ ត្រូវបានបញ្ជូនទៅមន្ទីរពេទ្យដោយការពុល ឬជំងឺពីបារីអេឡិចត្រូនិក និងផលិតផល អេចន៍ ធី ភី ដោយសារសារធាតុរាវសម្រាប់បារីអេឡិចត្រូនិក មានផ្ទុកថ្នាំ៕