ព័ត៌មានអន្ដរជាតិ

ចិន ឥណ្ឌា ចរចាគ្នាបើកពាណិជ្ជកម្មតាមព្រំដែនឡើងវិញក្រោយបិទ ៥ ឆ្នាំ

បានផុស

១០ ខែ មុន

នៅ

ថ្ងៃព្រហស្បតិ៍ ១៤ សីហា ២០២៥

ដោយ

ចិន និងឥណ្ឌា កំពុងពិភាក្សាគ្នាលើការបើកពាណិជ្ជកម្មព្រំដែនសារជាថ្មីសម្រាប់ទំនិញតាមមូលដ្ឋាន ក្រោយពីបិទដំណើរការអស់រយៈពេល ៥ ឆ្នាំ ដែលនេះជាជំហានចុងក្រោយនៃកិច្ចប្រឹងប្រែងបន្ធូរបន្ថយភាពតានតឹងរវាងប្រទេសទាំង២ ចំពេលរងហានិភ័យពន្ធរបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Bloomberg បានចុះផ្សាយពីបញ្ហានេះ ដោយស្រង់សម្ដីប្រភពមិនបញ្ចេញឈ្មោះពីទីក្រុងញូវដេលី។ ប្រភពបាននិយាយថា ភាគីទាំង២ បានស្នើឱ្យមានការធ្វើពាណិជ្ជកម្មឡើងវិញតាមច្រកព្រំដែនដែលបានកំណត់។

ទន្ទឹមនឹងនោះ ក្រសួងការបរទេសចិនបាននិយាយនៅថ្ងៃព្រហស្បតិ៍នេះថា ចិន «មានឆន្ទៈក្នុងការបង្កើនទំនាក់ទំនង និងការសម្របសម្រួលជាមួយឥណ្ឌា» លើបញ្ហាដែលបានលើកឡើង។ ក្រសួងបានប្រាប់រ៉យទ័រក្នុងអ៊ីម៉ែលថា ពាណិជ្ជកម្មតាមព្រំដែនរវាងចិន និងឥណ្ឌា បានដើរតួនាទីយ៉ាងសំខាន់ក្នុងការធ្វើឱ្យប្រសើរឡើងនូវជីវិតរបស់ប្រជាជនរស់នៅតាមព្រំដែននៃប្រទេសទាំង២។

ភាគីឥណ្ឌា មិនបានបញ្ចេញប្រតិកម្មយ៉ាងណាទេ ជុំវិញសេចក្ដីរាយការណ៍នេះ។

គួរគូសបញ្ជាក់ថា អស់រយៈពេលជាង ៣០ ឆ្នាំ ឥណ្ឌា និងចិនបានជួញដូរទំនិញផលិតតាមមូលដ្ឋាន ដូចជាគ្រឿងទេស កំរាលព្រំ គ្រឿងសង្ហារិម ចំណីសត្វ គ្រឿងស្មូន រុក្ខជាតិជាឱសថ របស់របរអគ្គិសនី និងរោមចៀមជាដើម។ ទំនិញទាំងនោះ ត្រូវបានជួញដូរតាមរយៈពេលច្រកព្រំដែនជាច្រើន តាមបណ្ដោយព្រំដែនប្រវែងជាង ៣ ៤០០ គីឡូម៉ែត្រ។ ទំហំពាណិជ្ជកម្មបែបនេះ មានកម្រិតតូចតាច ត្រឹមតែ ៣,១៦ លានដុល្លារ ប៉ុណ្ណោះ ក្នុងឆ្នាំ ២០១៧-២០១៨។ នេះបើតាមទិន្នន័យរដ្ឋាភិបាលចុងក្រោយបំផុត។

យ៉ាងណាមិញ វាត្រូវបានបិទទាំងស្រុងនៅឆ្នាំ ២០២០ ក្នុងអំឡុងវិបត្តិកូវីដ១៩ ដែលទំនាក់ទំនងរវាងប្រទេសទាំង២ បានធ្លាក់ចុះខ្លាំង ដោយសារតែជម្លោះព្រំដែន ដែលសម្រាប់ទាហានឥណ្ឌា ២០ នាក់ និងចិន យ៉ាងហោចណាស់ ៤ នាក់។

ផែនការបើកពាណិជ្ជកម្មឡើងវិញនាពេលនេះ ត្រូវបានគេមើលឃើញថាជាជំហានឆ្ពោះទៅរកភាពប្រសើរឡើងនៃទំនាក់ទំនង ខណៈប្រទេសទាំង២ កាលពីពេលថ្មី បានចាត់វិធានការដើម្បីបន្ធូរបន្ថយភាពតានតឹងនៅតាមព្រំដែន។

យោងតាមសារព័ត៌មាន Bloomberg News ឥណ្ឌា និងចិន គ្រោងនឹងបើកជើងហោះហើរត្រង់ឡើងវិញនៅដើមខែក្រោយ។ លើសពីនេះ នាយករដ្ឋមន្ត្រីឥណ្ឌា លោក Narendra Modi ក៏គ្រោងនឹងទៅបំពេញទស្សនកិច្ចនៅចិនក្នុងខែសីហា ជាលើកដំបូងក្នុងរយៈពេល ៧ ឆ្នាំ ដើម្បីចូលរួមកិច្ចប្រជុំកំពូលរបស់អង្គការសហប្រតិបត្តិការសៀងហៃ ហើយអាចនឹងជួបជាមួយប្រធានាធិបតីចិន លោក ស៊ី ជីងពីង។

ការស្ដារទំនាក់ទំនងឡើងវិញនាពេលថ្មីៗ ធ្វើឡើងក្រោយប្រទេស២ រងការគំរាមកំហែងផ្នែកសេដ្ឋកិច្ចដោយសារតែពន្ធគយរបស់ប្រធានាធិបតីសហរដ្ឋអាមេរិក ដូណាល់ ត្រាំ ដែលដាក់ពន្ធលើឥណ្ឌា ៥០ ភាគរយ និង ១៤៥ ភាគរយ លើចិន (ប៉ុន្តែបច្ចុប្បន្នអនុវត្តពន្ធលើចិន ត្រឹម ៣០ ភាគរយ សិន ដើម្បីចរចាគ្នា)៕