ព័ត៌មានអន្ដរជាតិ

តម្លៃប្រេងអន្តរជាតិស្ទុះងើបឡើងវិញ ដោយតម្រូវការល្អនៅអាមេរិក

បានផុស

១០ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

តម្លៃប្រេងអន្តរជាតិស្ទុះងើបឡើងវិញពេលបញ្ចប់ការជួញដូរកាលពីថ្ងៃពុធ និងក្នុងការជួញដូរលើទីផ្សារអាស៊ីនៅព្រឹកព្រហស្បតិ៍នេះ ដោយសារតែការធ្លាក់ចុះខ្លាំងនៃប្រេងសាំងក្នុងស្តុកនៅសហរដ្ឋអាមេរិក ដែលនេះបង្ហាញពីតម្រូវការរឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ តម្លៃប្រេងនាពេលអនាគត ម៉ាក Brent បានកើនឡើងតិចតួច ២៦ សេន ឬ ០,៣៩ ភាគរយ ដល់ ៦៧,១០ ដុល្លារ/បារ៉ែល នៅព្រឹកថ្ងៃព្រហស្បតិ៍ ក្រោយពីកើនឡើង ១,៦ ភាគរយ ពេលបិទការជួញដូរនៅថ្ងៃពុធ។

ចំណែកប្រេងអាមេរិក ម៉ាក West Texas Intermediate (WTI) វិញ បានកើនឡើង ៨៦ សេន ឬ ១,៣៨ ភាគរយ ដោយជួញដូរនៅតម្លៃ ៦៣,២១ ដុល្លារ/បារ៉ែល លើទីផ្សារអាស៊ីព្រឹកថ្ងៃព្រហស្បតិ៍ដូចគ្នា បន្ទាប់ពីកើនឡើង ១,៤ ភាគរយ នៅថ្ងៃពុធ។

កាលពីថ្ងៃពុធ រដ្ឋបាលព័ត៌មានថាមពលអាមេរិក បានឱ្យដឹងថា ស្តុកប្រេងឆៅរបស់សហរដ្ឋអាមេរិកបានធ្លាក់ចុះចំនួន ៦ លានបារ៉ែលកាលពីសប្តាហ៍មុន មកត្រឹម ៤២០,៧ លានបារ៉ែល ធៀបនឹងការរំពឹងទុករបស់អ្នកវិភាគត្រឹម ១,៨ លាន បារ៉ែល។

អ្នកវិភាគនិយាយថា នេះជាសញ្ញាបង្ហាញថា តម្រូវការនៅសហរដ្ឋអាមេរិក ដែលជាប្រទេសប្រើប្រាស់ប្រេងច្រើនជាងគេមួយលើពិភពលោក មានភាពរឹងមាំ ដែលធ្វើឱ្យតម្លៃកើនឡើង។

យ៉ាងណាមិញ វិនិយោគិននៅតែបន្តឃ្លាំមើលពីកិច្ចប្រឹងប្រែងបញ្ចប់សង្រ្គាមឈ្លានពានអ៊ុយក្រែនរបស់រុស្ស៊ី ដែលជះឥទ្ធិពលដោយផ្ទាល់ដល់តម្លៃប្រេងអន្តរជាតិ ដោយសារតែរុស្ស៊ីជាប្រទេសផ្គត់ផ្គង់ប្រេងដ៏ធំរបស់ពិភពលោក។ ប្រសិនបើស្ថានភាពមិនប្រសើរឡើង ហើយសហរដ្ឋអាមេរិកបង្កើនទណ្ឌកម្មលើប្រេងរុស្ស៊ី នោះតម្លៃនឹងបន្តហក់ឡើង ប៉ុន្តែបើស្ថានភាពប្រសើរឡើង នោះលោកខាងលិចអាចដកទណ្ឌកម្មលើប្រេងរុស្ស៊ីជាបណ្ដើរៗ ដែលអាចឱ្យតម្លៃប្រេងធ្លាក់ចុះ៕