កិច្ចប្រជុំលើកទី២ ភាពដៃគូសហភាពអឺរ៉ុប-អាល្លឺម៉ង់ បន្តពិនិត្យលម្អិតលើវឌ្ឍនភាពក្រោមគម្រោងសំខាន់ៗ ៥

នៅ​ក្នុង​កិច្ចប្រជុំលើកទី២ នៃគណៈកម្មការតម្រង់ទិសកម្មវិធីភាពជាដៃគូសហភាពអឺរ៉ុប និងអាល្លឺម៉ង់ ដើម្បី​បើក​ច្រក​ទៅ​កាន់​ទីផ្សារសកល និងជំនាញពាណិជ្ជកម្ម បាន​សម្រេច​បន្ត​ពិនិត្យ​លម្អិត​ទៅ​លើ​វឌ្ឍនភាព​ក្រោម​គម្រោង​សំខាន់​ៗ​ចំនួន​ ៥។

កិច្ចប្រជុំលើកទី២ នេះ ត្រូវ​បាន​រៀប​ចំ​ឡើង​នៅ​ថ្ងៃ​ទី​២០ ខែ​សីហា ឆ្នាំ​២០២៥ ក្រោម​ការ​ដឹក​នាំ​លោកស្រី តឹករ៉េត កំរង រដ្ឋលេខាធិការ នៃក្រសួងពាណិជ្ជកម្ម នៅ​ទីស្ដីការ​ក្រសួង​ពាណិជ្ជកម្ម​។

ជាក់ស្តែង កិច្ចប្រជុំគណៈកម្មការតម្រង់ទិសលើកទី២ បានពិនិត្យលម្អិតលើវឌ្ឍនភាពនៃការអនុវត្តកម្មវិធីនីមួយៗ ក្រោមគម្រោងសំខាន់​ៗ ចំនួន ៥ រួម​មាន៖ ១) ការគាំទ្រលើការៀបចំនិងអនុវត្តគោលនយោបាយ ច្បាប់ឬបញ្ញាត្តិជាផ្នែកមួយនៃការត្រៀមខ្លួនចាកចេញពីចំណាត់ថ្នាក់ប្រទេសអភិវឌ្ឍតិចតួច

២) ការជំរុញការនាំចេញផលិតផលគោលដៅរួមមានស្វាយចន្ទី និងម្រេច, ៣) ការគាំទ្រលើការចរចារកិច្ចព្រមព្រៀងក្រមខណ្ឌសេដ្ឋកិច្ចអឌីជីថលអាស៊ាន និងការពង្រឹងការអនុវត្តច្បាប់ស្តីពី កិច្ចការពារអ្នកប្រើប្រាស់ , ៤) កិច្ចសម្រួលពាណិជ្ជកម្ម និង ៥) ការលើកម្ពស់ភាពប្រកួតប្រជែងលើវិស័យពាណិជ្ជកម្មរបស់សហគ្រាសធុនតូច និងមធ្យម។

ជាលទ្ធផល កិច្ចប្រជុំបានពិភាក្សា ពិនិត្យ និងផ្តល់អនុសាសន៍ណែនំាសំខាន់ៗសម្រាប់ជា​ជំហានបន្ទាប់​ក្នុងការ​បន្តអនុវត្តគម្រោងតាមសមាសភាគនីមួយ ប្រកបដោយភាពជោគជ័យ៕

​